ພັກລັດຖະບານຫວຽດນາມປະດັບຫລຽນໄຊຂັ້ນສູງສຸດໃຫ້ການນຳພັກ-ລັດຖະບານລາວ

ພິທີປະດັບຫລຽນໄຊລະດັບສູງສຸດຂອງພັກ ແລະ ລັດຖະບານແຫ່ງສາທາລະນະລັດສັງຄົມນິຍົມຫວຽດນາມ ໃຫ້ແກ່ບັນດາການນໍາພັກ ແລະ ລັດຖະບານຂັ້ນສູງແຫ່ງສາທາລະນະລັດ ປະຊາທິປະໄຕ ປະຊາຊົນລາວ ໄດ້ຈັດຂຶ້ນໃນວັນທີ 18 ກໍລະກົດນີ້ ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ, ໂດຍການໃຫ້ກຽດເຂົ້າຮ່ວມຂອງສະຫາຍເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດແຫ່ງ ສປປ ລາວ ບຸນຍັງ ວໍລະຈິດ, ໃນໂອກາດສະເຫລີມສະຫລອງ 2 ວັນປະຫວັດສາດລາວ-ຫວຽດນາມຄື: ວັນເຊັນສົນທິສັນຍາມິດຕະພາບ ແລະ ການຮ່ວມມືຄົບຮອບ 40 ປີ (18 ກໍລະກົດ 1977-18 ກໍລະກົດ 2017) ແລະ ວັນສ້າງຕັ້ງສາຍພົວພັນການທູດຄົບຮອບ 55 ປີ (5 ກັນຍາ 1962-5 ກັນຍາ 2017), ໂດຍສະຫາຍນາງ ຕ໋ອງ ທິ ຝ່ອງ ກໍາມະການກົມການເມືອງສູນກາງພັກ, ຮອງປະ ທານສະພາແຫ່ງຊາດໄດ້ຕາງໜ້າໃຫ້ແກ່ພັກ ແລະ ລັດຖະບານ ຫວຽດນາມປະດັບຫລຽນໄຊ ດາວຄໍາ 1 ໜ່ວຍໃຫ້ແກ່ສະຫາຍ ທອງລຸນ ສີສຸລິດ ກໍາມະການກົມ ການເມືອງສູນກາງພັກ, ນາຍົກລັດຖະມົນຕີແຫ່ງ ສປປ ລາວ ແລະ ປະດັບຫລຽນໄຊໂຮ່ຈິ ມິງໃຫ້ 6 ສະຫາຍຄື: ສະຫາຍ ຈັນສີ ໂພສີຄໍາ ກໍາມະການກົມການເມືອງສູນກາງພັກ, ເລຂາທິ ການສູນກາງພັກ, ຫົວໜ້າຄະນະ ຈັດຕັ້ງສູນກາງພັກ. ສະຫາຍ ໄຊ ສົມພອນ ພົມວິຫານ ກໍາມະການ ກົມການເມືອງສູນກາງພັກ, ປະ ທານສູນກາງແນວລາວສ້າງ ຊາດ. ສະຫາຍ ຈັນສະໝອນ ຈັນຍາລາດ ກໍາມະການກົມການ ເມືອງສູນກາງພັກ, ລັດຖະມົນ ຕີກະຊວງປ້ອງກັນປະເທດ. ສະຫາຍ ຄໍາພັນ ພົມມະທັດ ກໍາມະ ການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຫ້ອງວ່າການສູນກາງພັກ. ສະຫາຍ ສິນລະວົງ ຄຸດໄພທູນ ກໍາມະການກົມການເມືອງສູນ ກາງພັກ, ເຈົ້າຄອງນະຄອນ ຫລວງວຽງຈັນ ແລະ ສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກ, ຮອງ ນາຍົກລັດຖະມົນຕີ ແລະ ປະດັບຫລຽນໄຊເອກະລາດຊັ້ນ I ໃຫ້ 3 ສະຫາຍຄື: ສະຫາຍ ກິແກ້ວ ໄຂ ຄໍາພິທູນ ເລຂາທິການສູນກາງພັກຫົວໜ້າຄະນະໂຄສະນາອົບຮົມສູນກາງພັກ. ສະຫາຍ ສົມແກ້ວ ສີລາວົງ ເລຂາທິການສູນ ກາງພັກ, ລັດຖະມົນຕີກະຊວງປ້ອງກັນຄວາມສະຫງົບ ແລະ ສະຫາຍ ວິໄລ ຫລ້າຄໍາຟອງ ເລ ຂາທິການສູນກາງພັກ, ຫົວໜ້າກົມໃຫຍ່ການເມືອງກອງທັບປະຊາຊົນລາວ, ຮອງລັດຖະມົນຕີກະຊວງປ້ອງກັນປະເທດ. ການປະດັບຫລຽນໄຊໃນຄັ້ງນີ້ ເປັນການຍ້ອງຊົມຜູ້ທີ່ມີຄຸນງາມ ຄວາມດີ ແລະ ຜົນງານອັນດີເດັ່ນໃນການປະກອບສ່ວນຢ່າງໃຫຍ່ຫລວງເຂົ້າໃນການເພີ່ມພູນຄູນສ້າງ ແລະ ເພີ່ມທະວີສາຍພົວພັນຄວາມສາມັກຄີແບບພິເສດລາວ-ຫວຽດນາມ. ໃນໂອກາດນີ້, ສະຫາຍ ທອງລຸນ ສີສຸລິດ ໄດ້ຕາງໜ້າໃຫ້ ບັນດາການນໍາຂັ້ນສູງພັກ-ລັດ ແຫ່ງ ສປປ ລາວ ກ່າວມີຄໍາເຫັນ ວ່າ: ການທີ່ພັກ-ລັດຖະບານ ຫວຽດນາມໄດ້ຕົກລົງມອບ ຫລຽນໄຊຂັ້ນສູງສຸດໃຫ້ແກ່ບັນດາການນໍາຂັ້ນສູງພັກ-ລັດຖະບານລາວຄັ້ງນີ້ຖືເປັນກຽດອັນສູງສົ່ງຂອງພັກ-ລັດຖະບານລາວ, ທັງເປັນການຕີລາຄາສູງຕໍ່ການປະກອບສ່ວນອັນສໍາຄັນຂອງບັນດາສະຫາຍການນໍາຂອງລາວ ເຂົ້າໃນການເພີ່ມພູນ ຄູນສ້າງສາຍພົວພັນແບບພິເສດ ລາວ-ຫວຽດນາມ ຕະຫລອດໄລຍະຜ່ານມາ. ການນໍາຂັ້ນສູງ ພັກ-ລັດສອງປະເທດເຂົ້າໃຈຢ່າງເລິກເຊິ່ງວ່າໃນສະພາບການພາກພື້ນ ແລະ ສາກົນ ພວມມີການຜັນແປຢ່າງວ່ອງໄວຄືດັ່ງປັດຈຸບັນນີ້, ຍິ່ງຈະຕ້ອງໄດ້ຮ່ວມມືກັນເພື່ອພ້ອມກັນເພີ່ມພູນຄູນສ້າງສາຍພົວພົວມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະ ຫວ່າງລາວ-ຫວຽດນາມໃຫ້ນັບ ມື້ໄດ້ຮັບການເສີມຂະຫຍາຍ ຢ່າງບໍ່ຢຸດຢັ້ງ ທັງນີ້ກໍເພື່ອຜົນປະ ໂຫຍດຂອງປະຊາຊົນສອງປະເທດ ກໍຄືເພື່ອສັນຕິພາບ, ມິດຕະ ພາບ ແລະ ການຮ່ວມມືໃນການ ພັດທະນາພາກພື້ນ ແລະ ໃນ ໂລກ. ໃນໂອກາດນີ້, ສະຫາຍນາ ຍົກລັດຖະມົນຕີແຫ່ງ ສປປ ລາວ ໄດ້ຕາງໜ້າໃຫ້ພັກ-ລັດຖະບານ ແລະ ປະຊາຊົນລາວບັນດາເຜົ່າ ສະແດງຄວາມຂອບໃຈ ແລະ ຮູ້ບຸນຄຸນຢ່າງເລິກເຊິ່ງຕໍ່ພັກ-ລັດຖະບານ ແລະ ປະຊາຊົນຫວຽດນາມ ອ້າຍນ້ອງທີ່ໄດ້ໃຫ້ການສະໜັບສະໜູນ ແລະ ຊ່ວຍເຫລືອຢ່າງໃຫຍ່ຫລວງ, ລໍ້າຄ່າ, ມີປະສິດທິຜົນ ແລະ ທັນການແກ່ພາລະກິດປະຕິວັດຂອງປະຊາຊົນລາວໂດຍຕະຫລອດມາ, ບໍ່ວ່າໃນໄລຍະຕໍ່ສູ້ກູ້ຊາດໃນເມື່ອກ່ອນກໍຄື ໃນໄລຍະປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ.