ຜ່າຕັດປ່ຽນມືໃຫ້ເດັກຄັ້ງທຳອິດ ຂອງໂລກປະສົບຜົນສຳເລັດ
ຄະນະແພດຢູ່ອາເມລິກາເປີດເຜີຍວ່າ: ການຜ່າຕັດປ່ຽນມືທັງສອງເບື້ອງຂອງເດັກຄົນທຳອິດຂອງໂລກປະສົບຜົນສຳເລັດ ໂດຍຫລັງການຜ່າຕັດແລ້ວ 18 ເດືອນ. ປັດຈຸບັນນີ້ເດັກທີ່ເຂົ້າຮັບການຜ່າຕັດ ສາມາດຂຽນໜັງສື, ຮັບປະທານອາຫານ ແລະ ນຸ່ງເຄື່ອງໄດ້ດ້ວຍຕົນເອງ.
ຄະນະແພດໄດ້ເປີດເຜີຍຄວາມຄືບໜ້າເທື່ອນີ້ໃນວາລະສານດ້ານສຸຂະພາບເດັກ ແລະ ຜູ້ໃຫຍ່ແລນແຊດ ເຊິ່ງເປັນລາຍງານດ້ານການແພດຢ່າງເປັນທາງການເທື່ອທຳອິດທີ່ເປັນຄວາມຄືບໜ້າຂອງໄຊອອນ ຮາວີ ເດັກຊາຍອາຍຸ 10 ປີ ທີ່ເຂົ້າຮັບການຜ່າຕັດ ເພື່ອປ່ຽນມືທັງສອງເບື້ອງຂອງລາວໃນປີ 2015. ແພດຢູ່ໂຮງໝໍເດັກໃນຟິລາເດວເຟຍຄົນໜຶ່ງກ່າວວ່າ: ພາຍຫລັງການຜ່າຕັດຜ່ານໄປ 18 ເດືອນ ຮາວີ ສາມາດອາໄສຕົນເອງໄດ້ຫລາຍຂຶ້ນ ແລະ ສາມາດດຳເນີນກິດຈະວັດປະຈຳວັນໄດ້ ແລະ ອາຄານຂອງລາວກໍປັບປຸງດີຂຶ້ນເລື້ອຍໆ ໂດຍມີການເຮັດກາຍະພາບບຳບັດເພື່ອໃຫ້ການເຮັດວຽກຂອງມືມີປະສິດທິພາບຫລາຍຂຶ້ນ. ແພດຈຳເປັນຕ້ອງຕັດມື ແລະ ຕີນຂອງ ຮາວີ ອອກເມື່ອລາວອາຍຸໄດ້ 2 ປີ ເນື່ອງຈາກອາການຕິດເຊື້ອ. ນອກຈາກນັ້ນ ລາວຍັງຕ້ອງຜ່າຕັດປ່ຽນໄຕ. ປັດຈຸບັນນີ້ ຮາວີ ໄດ້ຮັບຢາກົດພູມຄຸ້ມກັນ ເພ່ືອປ້ອງກັນບໍ່ໃຫ້ຮ່າງກາຍຂອງຄົນເຈັບສ້າງປະຕິກິລິຍາປະຕິເສດອະໄວຍະວະປູກຖ່າຍ.
