ສະມາຊິກພັັກ-ພະນັກງານ ຄະນະພັກຮາກຖານຫ້ອງການກະຊວງ ເຊື່ອມຊຶມມະຕິກອງປະຊຸມໃຫຍ່ ຄັ້ງທີ XI ຂອງພັກ
ໃນວັນທີ 7 ກໍລະກົດ 2021 ທີ່ກະຊວງການເງິນ, ສະມາຊິກພັກ-ພະນັກງານ ຄະນະພັກຮາກຖານຫ້ອງການກະຊວງການເງິນ, ເຊື່ອມຊຶມມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວ, ໂດຍການເປັນປະທານ ຂອງສະຫາຍ ສົມບູນ ອິນຖະປັດຖາ ຄະນະປະຈຳພັກກະຊວງ, ຄະນະບໍລິຫານງານພັກກະຊວງການເງິນ, ເລຂາຄະນະພັກຮາກຖານຫ້ອງການ, ຫົວໜ້າຫ້ອງການກະຊວງການເງິນ, ມີສະຫາຍ ນາງ ຄຳຂວັນ ສີຊານົນ ຮອງເລຂາຄະນະພັກຮາກຖານຫ້ອງການ, ຮອງຫົວໜ້າຫ້ອງການກະຊວງການເງິນ, ມີບັນດາສະຫາຍກຳມະການຄະນະພັກຮາກຖານ, ບັນດາສະຫາຍຄະນະໜ່ວຍພັກ ແລະ ສະມາຊິກພັກທີ່ຍັງບໍ່ທັນໄດ້ເຂົ້າຮ່ວມຮັບຟັງ.
ໂອກາດດັ່ງກ່າວສະຫາຍ ສົມບູນ ອິນທະປັດຖາ ໄດ້ເຜີຍແຜ່ມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກໃຫ້ສະມາຊິກພັກ-ພະນັກງານຂອງຫ້ອງການກະຊວງການເງິນໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ, ສຳລັບເອກະສານທີ່ນຳມາເຜີຍແຜ່ເຊື່ອມຊຶມໃນຄັ້ງນີ້ປະກອບມີຄຳສັງວ່າດ້ວຍການຈັດຕັ້ງເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ເລກທີ 38/ຄລສພ, ລົງວັນທີ 9 ມີນາ 2021, ເອກະສານການຈັດຕັ້ງເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI, ຂອງພັກອະທິບາຍກ່ຽວກັບຄຳຂວັນຂອງກອງປະຊຸມໃຫຍ່ ຄັ້ງທີ XI ຂອງພັກ ຄຳຂວັນ ຫຼື ຫົວຂໍ້ຂອງກອງປະຊຸມໃຫຍ່ຍົກສູງຄວາມສາມາດນຳພາຂອງພັກ, ເພີ່ມທະວີຄວາມສາມັກຄີເປັນປຶກແຜ່ນຂອງປະຊາຊົນ, ຮັບປະກັນສະຖຽນລະພາບດ້ານການ ເມືອງຢ່າງໜັກແໜ້ນ, ຜັນຂະຫຍາຍແນວທາງປ່ຽນແປງໃໝ່ສູ່ລວງເລິກ, ສ້າງການຫັນປ່ຽນການພັດທະນາເສດຖະກິດ-ສັງຄົມໄປສູ່ຄຸນນະພາບໃໝ່ຢ່າງແຂງແຮງ, ຍົກລະດັບຄຸນນະພາບຊີວິດຂອງປະຊາຊົນໃຫ້ສູງຂຶ້ນ, ສືບຕໍ່ນຳພາປະເທດຊາດພົ້ນຈາກສະຖານະພາບດ້ອຍພັດທະນາ ແລະ ກ້າວເດີນສູ່ຈຸດໝາຍສັງຄົມນິຍົມ, ມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ, ການຈັດຕັ້ງເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນ ປະຕິວັດລາວ.
ໃນກອງປະຊຸມດັ່ງກ່າວຍັງໄດ້ມອບບັດສະມາຊິກພັກໃຫ້ແກ່ສະມາຊິກພັກສົມບູນຈຳນວນ 2 ສະຫາຍນຳອີກ.
