ໄທວິຕົກ ຢ້ານໂຄວິດກາຍພັນໃໝ່ ຫລັງກວດພົບຜູ້ຕິດເຊື້ອ 7 ຄົນ ມີ 2 ສາຍພັນໃນໂຕ

ສຳນັກຂ່າວໄທຣັດ ລາຍງານ ວັນທີ 12 ກໍລະກົດ 2021 ນີ້ ວ່າ: ນາຍແພດ ສຸພະກິດ ສິຣິລັກ ຫົວໜ້າກົມວິທະຍາສາດການແພດ ໄດ້ຢືນຢັນເຖິງ ກໍລະນີກວດພົບຜູ້ຕິດເຊື້ອໂຄວິດ-19 ໃນຈຳນວນ 7 ຄົນທີ່ມີສອງສາຍພັນໃນໂຕ ຈາກແຄັ້ມຂອງຄົນງານກໍ່ສ້າງ ໃນກຸງເທບ ເຊິ່ງເປັນເຊື້ອປະສົມສອງສາຍພັນ ຄືສາຍພັນເດລຕ້າ ແລະ ສາຍພັນອາລຟາ ພົບໃນຈຳນວນ 7 ຄົນ ຈາກການກວດພົບທັງໝົດ 200 ກວ່າຄົນ.

ເຖິງຢ່າງໃດກໍຕາມສຳລັບຜູ້ກວດພົບເຊື້ອສອງສາຍພັນໃນຕົວທັງ 7 ຄົນນັ້ນ ແມ່ນມີອາການບໍ່ຮຸນແຮງ, ມີສຸຂະພາບແຂງແຮງດີ ແຕ່ທາງການແພດຂອງໄທຢ້ານໂຄວິດຈະກາຍພັນໃໝ່ ຈຶ່ງໄດ້ມີການກຽມຄວາມພ້ອມຮັບມືຂັ້ນຕອນຕໍ່ໄປ ແລະ ເລັ່ງກວດຫາເຊື້ອຈາກບຸກຄົນໃກ້ຊິດໃຫ້ໄດ້ໄວເທົ່າທີ່ຈະໄວໄດ້.