ປກສ ແຂວງສະຫວັນນະເຂດ ນຳໂຕຜູ້ປ່ອຍຄລິບທີ່ບໍ່ມີມູນຄວາມຈິງມາສຶກສາອົບຮົມ

ອີງຕາມການໃຫ້ສຳພາດ ຂອງທ່ານ ພົນຈັດຕະວາ ສີ ທະວີໄຊ ຫົວໜ້າການເມືອງ ກອງບັນຊາການທະຫານແຂວງ, ຄະນະກໍາມະການຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ແຂວງສະຫວັນນະເຂດ ທີ່ໃຫ້ສຳພາດຕໍ່ວິທະຍຸກະຈາຍສຽງແຫ່ງຊາດ ກ່ຽວກັບການເຜີຍຄລິບວີດີໂອທາງສື່ສັງຄົມອອນລາຍໃນທ້າຍອາທິດຜ່ານມານີ້ ຢູ່ເນື້ອໃນຄລິບດັ່ງກ່າວໄດ້ມີການບັນຍາຍວ່າ: ມີແຮງງານລາວ ປະມານ 3-4 ຄົນ ທີ່ເຮັດວຽກຢູ່ປະເທດໄທກຳລັງລອຍຂ້າມນໍ້າຂອງເພື່ອກັບຄືນມາລາວ ຢູ່ເຂດເທດສະບານນະຄອນໄກສອນ ພົມວິຫານ, ແຂວງສະຫວັນນະເຂດ ຈົນເຮັດໃຫ້ເປັນຂ່າວດັງໃນສື່ສັງຄົມອອນລາຍ ແລະ ສ້າງຄວາມແຕກຕື່ນໃນສັງຄົມ ເພາະຢ້ານວ່າຈະນໍາເອົາເຊື້ອພະຍາດໂຄວິດ-19 ມາແພ່ລະບາດໃນລາວ.

ຕໍ່ເຫດການທີ່ເກີດຂຶ້ນ ທ່ານ ພົນຈັດຕະວາ ສີ ທະວີໄຊ ກ່າວວ່າ: ຂ່າວດັ່ງກ່າວບໍ່ມີມູນຄວາມຈິງແຕ່ຢ່າງໃດ ເພາະທັນທີທີ່ມີຂ່າວນີ້ເກີດຂຶ້ນ ຄະນະຮັບຜິດຊອບທີ່ກ່ຽວຂ້ອງໄດ້ໃຊ້ເຮືອໄວລົງໄປກວດກາເບິ່ງຕົວຈິງ ພົບວ່າ: ສິ່ງທີ່ເຫັນນັ້ນເປັນພຽງກະຕຸກນໍ້າດື່ມໃຫຍ່ 20 ລິດ ທີ່ປະຊາຊົນໃຊ້ເປັນໂປ່ມມອງເພື່ອຫາປາເທົ່ານັ້ນ ບໍ່ແມ່ນຄົນລອຍນໍ້າຂ້າມມາແຕ່ຢ່າງໃດ.

ທ່ານ ພັນເອກ ສົມໝາຍ ພົມມະຈັນ, ຫົວໜ້າກອງບັນຊາການ ປກສ ແຂວງສະຫວັນນະເຂດ ໃຫ້ສໍາພາດວ່າ: ສໍາລັບຜູ້ເຜີຍແຜ່ຄລິບທີ່ບໍ່ມີມູນຄວາມຈິງໃນຄັ້ງນີ້ ກອງບັນຊາການ ປກສ ແຂວງ ໄດ້ມອບໃຫ້ ປກສ ນະຄອນໄກສອນ ພົມວິຫານ ເພື່ອນໍາຜູ້ກ່ຽວມາສຶກສາອົບຮົມບໍ່ໃຫ້ເຮັດແບບນີ້ອີກຕໍ່ໄປ.