ພ້ອມກັນປ້ອງກັນສະກັດກັ້ນເຊື້ອພະຍາດໂຄວິດ-19 ກາຍພັນ
ໂດຍ: ທິດກ່ຳ
ມາຮອດປັດຈຸບັນນີ້ ເຫັນວ່າສະພາບການແຜ່ລະບາດຂອງເຊື້ອພະຍາດໂຄວິດ-19 ຍັງບໍ່ທັນມີທ່າທີຫລຸດຜ່ອນ ແລະ ມະຫັບມະຫາຍໄປຈາກໂລກໃບນີ້ແຕ່ປະການໃດ, ກົງກັນຂ້າມ ມັນຍິ່ງແຜ່ຂະຫຍາຍອອກເປັນຫລາຍສາຍພັນທີ່ອັນຕະລາຍ ແລະ ຮ້າຍກາດກວ່າເກົ່າເຊັ່ນ: ຈາກເຊື້ອພະຍາດໂຄວິດ-19 ທຳມະດາອອກເປັນສາຍພັນອັງກິດ, ອິນເດຍ ຫລື ທີ່ເອີ້ນກັນວ່າ: Alpha Delta, ສ່ວນສາຍພັນອາຟຣິກາໃຕ້ກໍວ່າ Beta ແລະ ສາຍພັນເບຣຊິນກໍວ່າ Gamma ແລະ ອີກຕໍ່ໄປໃນອະນາຄົດກໍອາດຈະມີສາຍພັນອື່ນມາປະປົນເກີດຂຶ້ນ ຫລື ຈະຖືກດັບສູນ ຍ້ອນມະນຸດເຮົາໄດ້ຄົ້ນຄວ້າຢາຊະນິດຕ່າງໆທີ່ທັນສະໄໝມາປິ່ນປົວ ຫລື ສາມາດປາບກັບການລະບາດໄດ້ຢ່າງທັນການ.
ແນວໃດກໍຕາມ, ໃນສະພາບປັດຈຸບັນ ເຖິງວ່າມະນຸດເຮົາໄດ້ຄົ້ນຄວ້າຢາວັກຊິນຫລາຍປະເພດອອກມານຳໃຊ້ ແຕ່ກໍເປັນພຽງສ້າງຄວາມຄຸ້ມກັນໃຫ້ຮ່າງກາຍຂອງຄົນເຮົາແຂງແຮງ ແລະ ສາມາດສູ້ກັບມັນໄດ້ສ່ວນໃດສ່ວນໜຶ່ງເທົ່ານັ້ນ. ຕາມການຄົ້ນຄວ້າຂອງນັກວິທະຍາສາດການແພດກໍຢັ້ງຢືນວ່າ: ເຊື້ອພະຍາດໂຄວິດ-19 ສາຍພັນອິນເດຍແມ່ນມີຄວາມອັນຕະລາຍຮ້າຍກາດກວ່າເຊື້ອໂຄວິດ-19 ທຳມະດາຕັ້ງຫລາຍເທົ່າ ທັງຕິດຕໍ່ໃສ່ກັນໄວພຽງຍ່າງກາຍກັນສອງສາມວິນາທີກຊສາມາດຕິດແປດໃສ່ກັນໄດ້ຢ່າງໄວວາທີ່ສຸດ.
ສຳລັບໂຄວິດ-19 ສາຍພັນອິນເດຍໄດ້ກວດພົບຢູ່ລາວເຮົາ ແມ່ນຍ້ອນແຮງງານລາວນຳເຂົ້າມາຈາກປະເທດໄທ.
ຈາກສະພາບການແຜ່ລະບາດຂອງເຊື້ອພະຍາດໂຄວິດ-19 ກາຍພັນທີ່ກ່າວມານີ້ ເຮົາສາມາດປ້ອງກັນ ສະກັດກັ້ນໄດ້ດ້ວຍວິທີສ້າງແບບແຜນການດຳລົງຊີວິດແບບໃໝ່ດ້ວຍຕົນເອງເຊັ່ນ: ງົດການໄປຫລິ້ນໄປທ່ຽວໃນຊຸມຊົນແອອັດ ຫລື ຊຸມຊົນທີ່ມີຄວາມສ່ຽງ, ໄປໃສມາໃສຕ້ອງໃສ່ຜ້າປິດປາກ-ດັງສະເໝີ, ໝັ່ນລ້າງມືດ້ວຍນ້ຳຢາຂ້າເຊື້ອ ແຕ່ອັນສຳຄັນທີ່ສຸດຕ້ອງໃຫ້ໄດ້ສັກຢາວັກຊິນກັນໂຄວິດ-19 ຄົບຕາມກຳນົດ ເພາະຢາວັກຊິນແມ່ນເປັນການສ້າງພູມຕ້ານທານໃຫ້ຮ່າງກາຍຂອງຄົນເຮົາໃຫ້ແຂງແຮງ ສາມາດສູ້ກັບພະຍາດໂຄວິດ-19 ເຊິ່ງຢາບາງຊະນິດຮັບປະກັນເຖິງ 70 ຫາ 90%. ອີກປະການໜຶ່ງ ໃນຍຸກໂຄວິດ-19 ທີ່ພວມລະບາດໃນທົ່ວໂລກ ບໍ່ວ່າຈະໄປໃສຢູ່ໃສ, ຢູ່ພາຍໃນ ຫລື ໄປຕ່າງປະເທດ ໃບຢັ້ງຢືນການສັກຢາວັກຊິນຄືໃບເດີນທາງທີ່ສະດວກສະບາຍຂອງຄົນໃນສັງຄົມທົ່ວໂລກ.
ເຖິງຢ່າງໃດກໍດີ, ສຳລັບປະເທດເຮົາແລ້ວ ເຖິງວ່າພັກ ແລະ ລັດຖະບານໄດ້ມີມາດຕະການຫລາຍຢ່າງ ເພື່ອປ້ອງກັນ ສະກັດກັ້ນ ຄວບຄຸມ ແລະ ແກ້ໄຂ, ແຕ່ກໍເຫັນວ່າສະພາບການແຜ່ລະບາດຍັງເດີນໜ້າ ແລະ ສະຖິຕິຄົນຕິດເຊື້ອແຕ່ລະວັນຂ້ອນຂ້າງມີຂຶ້ນມີລົງ ຍ້ອນສາເຫດປະການໜຶ່ງແມ່ນຍ້ອນແຮງງານລາວນຳເຂົ້າມາຈາກປະເທດເພື່ອນບ້ານທີ່ມີການລະບາດຢ່າງໜັກໜ່ວງ ຈຶ່ງຂໍໃຫ້ທຸກຄົນພ້ອມກັນປ້ອງກັນ ສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19 ສາຍພັນໃໝ່ໃຫ້ເຖິງກົກເຖິງຮາກ ປະເທດຊາດຈຶ່ງຈະມີຄວາມສະຫງົບໄດ້.
