ປະຊາຊົນມາເລເຊຍ “ປັກທຸງຂາວ” ຮ້ອງຂໍການຊ່ວຍເຫຼືອດ້ານອາຫານການກິນ ແລະ ເຄື່ອງໃຊ້ສອຍທີ່ຈຳເປັນ

ໜັງສືພິມ South China Morning Post (SCMP)ລາຍງານວ່າ: ຫຼາຍຫຼັງຄາເຮືອນໃນມາເລເຊຍໄດ້ປັກທຸງຂາວເພື່ອຮ້ອງຂໍການຊ່ວຍເຫຼືອອາຫານການກິນ ແລະ ເຄື່ອງໃຊ້ສອຍທີ່ຈຳເປັນ ອັນເນື່ອງມາຈາກການລ໋ອກດາວບໍ່ມີມື້ສິ້ນສຸດ

ຫຼາຍອົງການຈັດຕັ້ງຮຽກຮ້ອງໃຫ້ສາມັກຄີກັນ ເພື່ອຊ່ວຍເຫຼືອຜູ້ທີ່ພົບຄວາມຫຍຸ້ງຍາກ ແລະ ຮຽກຮ້ອງໃຫ້ລັດຖະບານຕ້ອງສູ້ຊົນໃຫ້ການຊ່ວຍເຫຼືອຫຼາຍກວ່ານີ້

ບຸກຄົນທີ່ມີຊື່ສຽງ ແລະ ຫ້າງຊັບພະສິນຄ້າຫຼາຍແຫ່ງໃຫ້ການສະໜັບສະໜູນຂະບວນການ “ປັກທຸງຂາວ” ຂອງປະຊາຊົນ, ພວກເຂົາໄດ້ເກັບເງິນ, ເກັບເຄື່ອງໃຊ້ສອຍ ເຕົ້າໂຮມກັນເພື່ອເອົາໄປຊ່ວຍເຫຼືອຜູ້ທຸກຍາກ. ນັກການເມືອງພັກຝ່າຍຄ້ານຈຳນວນໜຶ່ງກໍໄດ້ເຂົ້າຮ່ວມຂະບວນການດັ່ງກ່າວເຊັ່ນດຽວກັນ, ເຖິງແມ່ນຈະຖືກກ່າວຫາວ່າເຮັດເພື່ອຈຸດປະສົງທາງການເມືອງກໍຕາມ.

ສະພາບການຂາດແຄນສະບຽງອາຫານໃນມາເລເຊຍໃນຂະນະນີ້ແມ່ນຮ້າຍແຮງທີ່ສຸດ ຈົນເຖິງຂັ້ນວ່າຜູ້ເປັນພໍ່ ເປັນແມ່ຕ້ອງອົດຫິວເພື່ອໃຫ້ລູກໆ ໄດ້ກິນ, ມີຜູ້ຍິງບາງຄົນຖືພາກໍຕ້ອງອົດກິນມື້ລະຄາບເທົ່ານັ້ນ.

ສຳນັກຂ່າວ Bernama ຂອງມາເລເຊຍໃຫ້ຮູ້ວ່າ: ຂະນະນີ້ມາເລເຊຍກຳລັງປະຕິບັດມາດຕະການລ໋ອກດາວຢ່າງເຄັ່ງຄັດທີ່ສຸດ ຊຶ່ງເລີ່ມຕົ້ນມາແຕ່ວັນທີ 1 ມິຖຸນາ ແລະ ຍັງຈະສືບຕໍ່ໄປເລື້ອຍໆ ຈົນກວ່າເມື່ອໃດມີຜູ້ຕິດເຊື້ອຫຼຸດລົງເຖິງ 4.000 ຄົນຈຶ່ງຈະເຊົາ.