ວັກຊີນອິນເດຍມີປະສິດທິຜົນສູງກວ່າ 65% ສຳລັບໂຄວິດ-19 ກາຍພັນ ເດລຕາ
ສຳນັກຂ່າວ ຊີເອັນເອັນ ລາຍງານວັນທີ 3 ກໍລະກົດ 2021ນີ້ວ່າ ຜົນຂອງການທົດລອງຄລິນິກໄລຍະທີ 3 ຂອງວັກຊິນ ‘ໂຄແວັກຊີນ’ ຖືກປະກາດອອກໄປໂດຍສະຖາບັນ ການຢາ Bharat Biotech ຂອງອິນເດຍ, ໂດຍມີອາສາສະໝັກເຂົ້າຮ່ວມທົດລອງ 25.800 ຄົນທີ່ມີອາຍຸແຕ່ 18 ຫາ 98 ປີ, ໃນນັ້ນ 2.433 ຄົນມີອາຍຸສູງກວ່າ 60 ປີ ແລະ 4.500 ຄົນມີພະຍາດປະຈຳຕົວ.
ຊຶ່ງວັກຊິນຕົວນີ້ມີພູມຕ້ານທານສູງເຖິງ 93,4% ສຳລັບຜູ້ທີ່ຜູ້ຕິດເຊື້ອໂຄວິດ-19 ອາການຮຸນແຮງ ແລະ 77,8% ສຳລັບອາການທຳມະດາ. ນອກຈາກນີ້, ວັກຊິນ ‘ໂຄແວັກຊີນ’ ຍັງສ້າງພູມຕ້ານທານທີ່ມີປະສິດທິພາບສູງຕໍ່ໂຄວິດ-19 ກາຍພັນ ເດລຕາເຖິງ 65,2% ຊຶ່ງເປັນໄວຣັດທີ່ມີການແພ່ກະຈາຍໄວໄປທົ່ວໂລກໃນຂະນະນີ້.
ຜົນຂອງການທົດລອງວັກຊິນ ‘ໂຄແວັກຊີນ’ ຖືກປະກາດເປັນເທື່ອທຳອິດໃນ ເວບໄຊ ວິທະຍາສາດ MedRxiv ເມື່ອວັນທີ 1 ກໍລະກົດນີ້. ທ່ານ ດອກເຕີ Krishna Ella ທັງເປັນປະທານ ແລະ ທັງເປັນ ຫົວໜ້າສະຖາບັນການຢາ Bharat Biotech ໃຫ້ຮູ້ວ່າ ຜົນສຳເລັດດັ່ງກ່າວ ສະແດງໃຫ້ເຫັນຄວາມສາມາຄົ້ນຄວ້າໃນການປ່ຽນແປງໃໝ່ຂອງອິນເດຍ ກໍຄືບັນດາປະເທດທີ່ກຳລັງພັດທະນາໃນໂລກ.
