3 ວາລະແຫ່ງຊາດ ຄືເປົ້າໝາຍສູ່ຄວາມສະຫງົບ ມັ່ງຄັ່ງ ເຂັ້ມແຂງຂອງຊາດ
ໂດຍ: ທິດກ່ຳ
ໃນທີ່ສຸດມາຮອດວັນທີ 21 ຫວັນທີ 25 ມິຖຸນາ 2021 ຢູ່ສຳນັກງານສູນກາງພັກ ຄະນະບໍລິຫານງານສູນກາງພັກສະໄໝທີ XI ກໍໄດ້ເປີດກອງປະຊຸມຄົບຄະນະສະໄໝວິສາມັນຂອງຕົນຂຶ້ນຢ່າງເປັນທາງການ ແລະ ມີຄວາມໝາຍຕໍ່ພາລະກິດຊີ້ນຳ-ນຳພາຂອງຕົນທີ່ຈະຕ້ອງປະຕິບັດຢ່າງເຄັ່ງຮ້ອນນັ້ນກໍຄື ໄດ້ກຳນົດເອົາ 3 ບັນຫາມາເປັນວາລະແຫ່ງຊາດຄື: ອັນທີໜຶ່ງ ແມ່ນການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ, ສອງ ດ້ານການສະກັດກັ້ນ ແລະ ແກ້ໄຂບັນຫາຢາເສບຕິດ ແລະ ອັນທີສາມ ແມ່ນດ້ານສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງທຸກຂອດໃນວຽກງານພະນັກງານຂອງພັກ.
ກອງປະຊຸມຄັ້ງນີ້ແມ່ນພາຍໃຕ້ການເປັນປະທານຂອງສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ ໂດຍມີບັນດາສະຫາຍກຳມະການກົມການເມືອງສູນກາງພັກສົມບູນ ແລະ ສຳຮອງເຂົ້າຮ່ວມຢ່າງຄົບຖ້ວນ. ໃນໂອກາດເປີດກອງປະຊຸມສະໄໝວິສາມັນຂອງຄະນະບໍລິຫານງານສູນກາງພັກຄັ້ງນີ້ ເປົ້າໝາຍໃຫຍ່ໆລວມຍອດທີ່ສຸດກໍແມ່ນເພື່ອຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມ 5 ປີຄັ້ງທີ IX (2021-2025) ໃຫ້ໄດ້ຮັບຜົນຢ່າງເປັນຮູບປະທຳ ແລະ ໄປຕາມຈັງຫວະເວລາທີ່ໄດ້ຄາດໝາຍເອົາໄວ້.
ແນວໃດກໍຕາມ, ໃນເງື່ອນໄຂທີ່ປະເທດຊາດຂອງພວກເຮົາພວມຜະເຊີນກັບການແຜ່ລະບາດຂອງເຊື້ອພະຍາດໂຄວິດ-19 ພັກ ແລະ ລັດຖະບານພວກເຮົາກໍມານະພະຍາຍາມໃຊ້ມາດຕະການຕ່າງໆຢ່າງເໝາະສົມ ໄປຄຽງຄູ່ກັບການຈັດຕັ້ງຜັນຂະຫຍາຍມະຕິຄັ້ງທີ XI ຂອງພັກ ເຊິ່ງໜຶ່ງໃນມາດຕະການແກ້ໄຂບັນຫາຄວາມຫຍຸ້ງຍາກຂອງປະເທດຊາດນັ້ນກໍແມ່ນການກຳນົດເອົາ 3 ເນື້ອໃນທີ່ກ່າວມານີ້ເປັນວາລະແຫ່ງຊາດ. ຄວາມຈຳເປັນໃນການກຳນົດເອົາບັນຫາເສດຖະກິດ-ການເງິນ, ບັນຫາແກ້ໄຂຢາເສບຕິດ ແລະ ບັນຫາການຫັນປ່ຽນບຸກຄະລາກອນຂອງພັກມາເປັນວາລະແຫ່ງຊາດນັ້ນແມ່ນຄວາມຈຳເປັນທາງດ້ານພາວະວິໄສ ຍ້ອນວ່າ ໃນໄລຍະຫລາຍປີຜ່ານມາ ລາວເຮົາໄດ້ປະສົບກັບບັນຫາວິກິດຫລາຍ ອັນຕົ້ນຕໍກໍແມ່ນໃນ 3 ບັນຫາວາລະແຫ່ງຊາດນີ້, ຊ້ຳບໍ່ໜຳຍັງຖືກການລະບາດຂອງພະຍາດໂຄວິດ-19 ມາກະທົບຊ້ຳຕື່ມ ຈົນເຮັດໃຫ້ລະບົບເສດຖະກິດ-ສັງຄົມຂອງປະເທດຊາດມີຜົນກະທົບຢ່າງໃຫຍ່ຫລວງ.
ເຖິງຢ່າງໃດກໍດີ, ພາຍຫລັງມີການກຳນົດເອົາ 3 ບັນຫາມາເປັນວາລະແຫ່ງຊາດ ຈະເປັນເງື່ອນໄຂ ແລະ ປັດໄຈອັນໃຫຍ່ຫລວງ ເພື່ອກະຕຸ້ນໃຫ້ລະບົບການພັດທະນາຂອງປະເທດຊາດຍິ່ງກ້າວສູ່ຄວາມສະຫງົບ, ມັ່ງຄັ່ງເຂັ້ມແຂງ ຍ້ອນວ່າບັນຫາເສດຖະກິດ-ການເງິນກໍຈະນັບມື້ຄ່ອງຕົວໄປຕາມກົນໄກເສດຖະກິດຕະຫລາດ, ບັນຫາຢາເສບຕິດກໍຈະຖືກກຳຈັດປາບປາມ ແລະ ບຸກຄະລາກອນຂອງພັກກໍນັບມື້ເລືອກເຟັ້ນເອົາຜູ້ທີ່ດີ, ມີຄວາມຮູ້, ເປັນແບບຢ່າງ ບໍ່ພາກັນເສເພ ແລະ ສໍ້ລາດບັງຫລວງ, ປະຊາຊົນກໍຍິ່ງເຊື່ອໝັ້ນຕໍ່ການນຳພາຂອງພັກ.
