ເຢຍລະມັນ ແນະນຳໃຫ້ປະຊົນສັກວັກຊີນປ້ອງກັນໂຄວິດ-19 ແບບປະສົມ 2 ຊະນິດ
ອີງຕາມສຳນັກຂ່າວ CNN ລາຍງານວ່າ: ຄະນະກຳມະການສັກວັກຊີນ ( STIKO ) ຂອງເຢຍລະມັນ ປະກາດຂໍ້ແນະນຳໃຫ້ປະຊາຊົນສັກວັກຊີນຕ້ານໂຄວິດ-19 ແບບປະສົມຕ່າງຊະນິດກັນ ເພື່ອເພີ່ມປະສິດທິພາບໃນການຕ້ານທານເຊື້ອໄວຣັສ ໂດຍອ້າງອີງຜົນສຶກສາວິໄຈ ປັດຈຸບັນ ທີ່ພົບວ່າການສັກວັກຊີນແບບປະສົມນັ້ນສາມາດກະຕຸ້ນການສ້າງພູມຕ້ານທານໄດ້ດີກ່ວາຢ່າງຊັດເຈນ.
ພາຍໃຕ້ຂໍ້ແນະນຳດັ່ງກ່າວ STIKO ລະບຸວ່າ: ປະຊາຊົນທີ່ໄດ້ຮັບການສັກວັກຊີນໂດສ 1 ຈາກ Oxford-AstraZen ນັ້ນ ຄວນຈະໄດ້ຮັບການສັກວັກຊີນຊະນິດ mRNA, Pfizer-BioNTech ຫລື Modena ໃນໂດສ 2 ໂດຍບໍ່ຈຳແນກກຸ່ມອາຍຸ.
ທ່າທີດັ່ງກ່າວເຮັດໃຫ້ ເຢຍລະມັນ ກາຍເປັນປະເທດທຳອິດຂອງໂລກ ທີ່ປະກາດຂໍ້ແນະນຳຢ່າງໜັກແໜ້ນໃຫ້ປະຊາຊົນສັກວັກຊີນແບບປະສົມລະຫວ່າງ AstraZeneca ກັບວັກຊີນ mRNA ເຊິ່ງໃນເດືອນມິຖຸນາ 2021 ທ່ານ ອັງເກລາ ແມເຄິລ ນາຍົກລັດຖະມົນຕີ ຂອງເຢຍລະມັນ ກໍຮັບການສັກວັກຊີນໂດສ 2 ເປັນຂອງ Modena ຫລັງຈາກທີ່ສັກວັກຊີນ AstraZeneca ໂດສທີ 1 ແລ້ວ.
ກ່ອນໜ້ານັ້ນໃນວັນທີ 17 ມິຖຸນາ 2021 ຄະນະກຳມະການທີ່ປຶກສາແຫ່ງຊາດຂອງ ການາດາ ກໍປະກາດຂໍ້ແນະນຳການສັກວັກຊີນແບບປະສົມໃນລັກສະນະດຽວກັນ ໂດຍລະບຸວ່າປະຊາຊົນທີ່ຮັບການສັກວັກຊີນໂດສ 1 ຈາກ AstraZeneca ຄວນສັກວັກຊີນຊະນິດ mRNA ເປັນໂດສທີ 2 ໂດຍອ້າງອີງຂໍ້ມູນຈາກຜົນການສຶກສາວິໄຈທີ່ສະແດງໃຫ້ເຫັນຫລັກຖານປະກົດວ່າການສັກວັກຊີນແບບປະສົມນັ້ນສາມາດກະຕຸ້ນການຕອບສະໜອງຂອງພູມຕ້ານທານໄດ້ດີກວ່າ.
ສ່ວນຜົນວິໄຈຈາກມະຫາວິທະຍາໄລອັອກຟອດ ຊື່ງເຜີຍແຜ່ໃນວັນທີ 28 ມິຖນາ 2021 ພົບວ່າການສັກວັກຊີນຕ້ານໂຄວິດປະສົມ ລະຫວ່າງ AstraZeneca ກັບ Pfizer-BioNTech ເຖິ່ງຈະສັກວັກຊີນຊະນິດໃດກ່ອນ ຫລື ຫລັງ ຈະເຮັດໃຫ້ເກີດສານພູມຕ້ານທານໃນຮ່າງກາຍຢ່າງເຂັ້ມຂຸ້ນ.
