ປກສ ເມືອງສັງທອງ ຈັບກຸມ ຊາຍ 60 ປີ ທີ່ເຄື່ອນໄຫວຄ້າຂາຍຢາເສບຕິດ

ເຈົ້າໜ້າທີ່ ປກສ ກຸ່ມຄົກເພີງ ເມືອງສັງທອງ ນະຄອນຫລວງວຽງຈັນ ໄດ້ເຂົ້າຈັບກຸມ ທ້າວໝັ້ນ ແກ້ວມະນີ ອາຍຸ 60 ປີ ອາຊີບເຮັດນາ ຢູ່ບ້ານຄົກເພີງ ເມືອງສັງທອງ, ພາຍຫລັງໄດ້ຮັບຂໍ້ມູນທີ່ຊັດເຈນຈາກປະຊາຊົນ ແລະ ໃນຂະນະທີ່ທຳການກວດຄົ້ນຕົວຜູ້ກ່ຽວນັ້ນພົບເຫັນຢາບ້າຈຳນວນ 405 ເມັດ ໃນຖົງໂສ້ງເຊິ່ງຜູ້ກ່ຽວອ້າງວ່າຈະໄປສົ່ງໃຫ້ລູກຄ້າທີ່ລໍຖ້າຢູ່ແຄມທາງບ້ານດັ່ງກ່າວ.

ພັທ ຄຳຜົງ ໂຊກຄຳແສນ ຫົວໜ້າ ປກສ ກຸ່ມຄົກເພີງ ເມືອງສັງທອງ ໃຫ້ຮູ້ວ່າ: ໃນເວລາປະມານ 19:21 ໂມງ ຂອງວັນທີ 1 ກໍລະກົດນີ້ ໄດ້ທຳການຈັບກຸມຜູ້ກ່ຽວຕາມການລາຍງານຂອງພົນລະເມືອງດີ ແລະ ຜ່ານການລົງຕິດຕາມຢ່າງໃກ້ຊິດຈາກກຳລັງ ປກສ. ຜ່ານການສອບສວນຂອງເຈົ້າໜ້າທີ່ ທ້າວ ໝັ້ນ ແກ້ວມະນີ, ອາຍຸ 60 ປີ ໄດ້ຮັບສາລະພາບວ່າ ຢາບ້າ 405 ເມັດ ເຈົ້າໜ້າທີ່ກວດພົບເຫັນໃນເວລາຈັບກຸມຢູ່ໃນຖົງໂສ້ງແມ່ນຂອງຕົນເອງແທ້ ແລະ ກະກຽມຈະເອົາມາສົ່ງໃຫ້ລູກຄ້າຢູ່ແຄມທາງບ້ານຄົກເພີງຕາມການນັດໝາຍທາງໂທລະສັບ ແລະ ຜ່ານມາຕົນເອງແມ່ນມີການພົວພັນຊື້-ຂາຍຢາບ້າມາຕັ້ງແຕ່ປີ 2017.

ຕໍ່ກັບຄະດີດັ່ງກ່າວ, ເຈົ້າໜ້າທີ່ກຳລັງເລັ່ງສືບສວນ-ສອບສວນເປີດກວ້າງ, ຂະຫຍາຍຜົນຊອກຫາກຸ່ມແກ້ງ, ພັກພວກຂະບວນການມາດຳເນີນຄະດີຕາມລະບຽບກົດໝາຍ.