ລາວ-ສ.ເກົາຫລີ ເພີ່ມທະວີ ຮ່ວມມືດ້ານຕະຫລາດຫລັກຊັບ

ພິທີລົງນາມບົດບັນທຶກຄວາມເຂົ້າໃຈການຮ່ວມມືວຽກງານຫລັກຊັບລະຫວ່າງທ່ານ ສົມພາວ ໄຟສິດ ຜູ້ວ່າການທະນາຄານ ແຫ່ງ ສປປ ລາວ ແລະ ທ່ານ ຊັນອູຈອງ ປະທານ ແລະ ຜູ້ອໍານວຍການໃຫຍ່ຕະຫລາດຫລັກຊັບ ສ.ເກົາຫລີ ໄດ້ມີຂຶ້ນເມື່ອບໍ່ດົນມານີ້ ຢູ່ນະຄອນຫລວງວຽງຈັນ ໂດຍການເຂົ້າຮ່ວມຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ທັງ ເປັນປະທານຄະນະກໍາມະການຄຸ້ມຄອງຫລັກຊັບລາວ ເພື່ອແນໃສ່ເສີມຂະຫຍາຍການຮ່ວມມືລະຫວ່າງສອງຝ່າຍໃຫ້ແໜ້ນແຟ້ນ ກວ່າເກົ່າ ກໍຄືເສີມສ້າງຄວາມເຂັ້ມແຂງໃຫ້ແກ່ຕະຫລາດທຶນຂອງລາວ.

ການຮ່ວມມືລະຫວ່າງຕະຫລາດຫລັກຊັບລາວ ແລະ ຕະຫລາດຫລັກຊັບ ສ.ເກົາຫລີ ໄດ້ດໍາເນີນມາແຕ່ເດືອນກໍລະກົດ 2009 ເຊິ່ງໄດ້ມີການເຊັນສັນຍາຮ່ວມທຶນລະຫວ່າງທະນາຄານແຫ່ງ ສປປ ລາວ ຖືຮຸ້ນ 51% ແລະ ຕະຫລາດຫລັກຊັບ ສ.ເກົາຫລີ ຖືຮຸ້ນ 49% ເພື່ອສ້າງຕັ້ງຕະຫລາດຫລັກຊັບລາວຢ່າງເປັນທາງການ ແລະ ໄດ້ເປີດການຊື້-ຂາຍຄັ້ງທໍາອິດໃນ 1 ພະຈິກ 2011 ເຊິ່ງເບື້ອງ ຕົ້ນມີພຽງສອງບໍລິສັດຈົດທະບຽນ ຄືບໍລິສັດຜະລິດ-ໄຟຟ້າລາວ ມະຫາຊົນ ແລະ ທະນາຄານການຄ້າຕ່າງປະເທດລາວ ມະຫາຊົນ ແລະ ມາຮອດປັດຈຸບັນມີບໍລິສັດ ລາວເວີນ ມະຫາຊົນ, ບໍລິສັດ ປີໂຕຣລ້ຽມ ເທຣດດີ້ງລາວ ມະຫາຊົນ ແລະ ບໍລິສັດ ສຸວັນນີ ໂຮມ ເຊັນເຕີ ມະຫາຊົນ ໄດ້ເຂົ້າມາຈົດທະບຽນເພີ່ມໃນຕະຫລາດດັ່ງກ່າວ.

ສໍາລັບການຮວ່ມມືລະຫວ່າງຕະຫລາດຫລັກຊັບລາວ ແລະ ສ.ເກົາຫລີ ໃນໄລຍະຜ່ານມາແມ່ນໄດ້ດໍາເນີນໄປດ້ວຍບັນຍາກາດ ທີ່ດີ ໂດຍສະເພາະພາຍຫລັງສ້າງຕັ້ງຕະຫລາດຫລັກຊັບລາວຂຶ້ນ ກໍໄດ້ມີການສົ່ງພະນັກງານຈໍານວນໜຶ່ງໄປແລກປ່ຽນ ແລະ ຖອດ ຖອນບົດຮຽນຢູ່ ສ.ເກົາຫລີ ໃນຫລາຍລະດັບ ເພື່ອນໍາເອົາບົດຮຽນ ແລະ ປະສົບການຕົວຈິງຂອງຕະຫລາດຫລັກຊັບມາໝູນໃຊ້ໃນ ການພັດທະນາຕະຫລາດຫລັກຊັບລາວໃຫ້ເຕີບໃຫຍ່ເຂັ້ມແຂງຂຶ້ນເທື່ອລະກ້າວ.