ເລີ່ມວັນທີ 5-13 ກໍລະກົດ 2021 ແຂວງອັດຕະປື ຈະເປີດການສັກວັກຊີນປ້ອງກັນໂຄວິດ-19 ເຂັມທີ 1 ໃນຮອບທີ 2
ໃນວັນທີ 30 ມິຖຸນາ ນີ້ ທ່ານ ນາງ ສົມພັນ ອ້ວນວິໄລ ຫົວໜ້າຂະແໜງອະນາໄມ ແລະ ສົ່ງເສີມສຸຂະພາບ ພະແນກສາທາລະນະສຸກ ແຂວງອັດຕະປື ໄດ້ໃຫ້ສຳພາດຕໍ່ນັກຂ່າວແຂວງວ່າ: ປັດຈຸບັນ ແຂວງອັດຕະປື ກໍຄືພະແນກສາທາລະນະສຸກແຂວງ ຈະໄດ້ເລີ່ມສັກວັກຊີນປ້ອງກັນພະຍາດໂຄວິດ-19 ເຂັມທີ 1 ໃນຮອບ 2 ໃຫ້ປະຊາຊົນ, ຊາວຕ່າງປະເທດທີ່ມາອາໃສຢູ່ແຂວງອັດຕະປື ເລີ່ມແຕ່ວັນທີ 5-13 ກໍລະກົດ 2021 ນີ້ ວັນຈັນ-ສຸກ ຕາມໂມງລັດຖະການ.
ສໍາລັບການຮັບວັກຊີນໃນຮອບທີ 2 ນີ້ແຂວງອັດຕະປື ໄດ້ຮັບວັກຊີນຊີໂນຟາມ ທັງໝົດຈຳນວນ 7.000 ໂດສ, ສ່ວນກຸ່ມເປົ້າໝາຍທີ່ຈະໄດ້ຮັບວັກຊີນ ຮອບ 2 ແມ່ນບຸກຄົນທົ່ວໄປທີ່ມີອາຍຸ 18 ປີຂຶ້ນໄປ ເຊິ່ງປະປັດຈຸບັນນີ້ ອົງການອະນາໄມໂລກ ໄດ້ຮັບຮອງວັກຊີນຊິໂນຟາມເປັນວັກຊີນທີ່ປອດໄພຕໍ່ທຸກຄົນ, ຍົກເວັ້ນແມ່ຍິງຖືພາທີ່ຫ້າມສັກ. ການເປີດໃຫ້ບໍລິການຮັບວັກຊີນຄັ້ງນີ້ທາງແຂວງໄດ້ກຳນົດຢູ່ 6 ຈຸດຄື: ໂຮງໝໍແຂວງ, ໂຮງໝໍທະຫານແຂວງ ແລະ ໂຮງໝໍຊຸມຊົນ 4 ຕົວເມືອງ.
ທ່ານຫົວໜ້າຂະແໜງອະນາໄມສົ່ງເສີມສຸຂະພາບແຂວງ ໃຫ້ຮູ້ຕື່ມວ່າ: ໃນຮອບທີ 1 ຜ່ານມາ ແຂວງອັດຕະປື ໄດ້ຮັບວັກຊີນ ລວມທັງໝົດ 25.000 ໂດສ, ໃນນັ້ນ ມີວັກຊີນຊີໂນຟາມ 24.000 ໂດສ ແລະ ວັກຊີນແອສຕາເຊເນກາ 1.000 ໂດສ. ມາຮອດປັດຈຸບັນສັກໄດ້ທັງໝົດ 21.297 ໂດສ, ໃນນັ້ນເຂັມທີ 1 ສັກໄດ້ 11.906 ຄົນ ແລະ ເຂັມທີ 2 ສັກໄດ້ 9.391 ຄົນ ແລະ ຍັງສືບຕໍ່ສັກເຂັມທີ 2 ໃຫ້ສຳເລັດໂດຍໄວພາຍໃນຕົ້ນເດືອນກໍລະກົດ 2021.
