ກົງສູນໃຫຍ່ ສສ ຫວຽດນາມ ປະຈຳແຂວງຫລວງພະບາງ ມອບເງິນຊ່ວຍເຫລືອ 500 ລ້ານດົງ ໃຫ້ແຂວງອຸດົມໄຊ ເພື່ອຕ້ານໂຄວິດ
ໃນວັນທີ 28 ມິຖຸນາ 2021 ນີ້ ກົງສູນໃຫຍ່ ສສ ຫວຽດນາມ ປະຈຳແຂວງຫລວງພະບາງ ນຳໂດຍທ່ານຫງຽນດັງຮຸງ ພ້ອມຄະນະໄດ້ຕາງ ຫນ້າໃຫ້ແກ່ອົງການປົກຄອງ ແລະ ປະຊາຊົນແຂວງນິ່ງວິ່ງ ແຫ່ງ ສສ ຫວຽດນາມ ໄດ້ນຳເອົາເງິນສົດ ຈຳນວນ 500 ລ້ານດົງ ຫລື ປະມານ 200 ກວ່າລ້ານກີບມາມອບໃຫ້ແກ່ອົງການປົກຄອງແຂວງອຸດົມໄຊ ເພື່ອນຳໃຊ້ເຂົ້າໃນການປ້ອງກັນພະຍາດໂຄວິດ-19 ຢູ່ແຂວງອຸດົມໄຊ.
ໂອກາດນີ້, ທ່ານ ບຸນຄົງ ຫລ້າຈຽມພອນ ເລຂາພັກແຂວງ, ເຈົ້າແຂວງອຸດົມໄຊ ຕາງຫນ້າໃຫ້ແກ່ອົງການປົກຄອງແລະປະຊາຊົນຊາວແຂວງອຸດົມໄຊກ່າວສະແດງຄວາມຂອບໃຈຕໍ່ທ່ານ ຫງຽນດັງຮຸງ ແລະຄະນະ ພ້ອມທັງໄດ້ຝາກຄວາມຂອບໃຈໄປຍັງອົງການປົກຄອງ ແລະ ປະຊາຊົນແຂວງນິ່ງວິງ ທີ່ໄດ້ນຳເອົາເງິນມາຊ່ວຍເຫລືຶອແກ່ແຂວງອຸດົມໄຊໃນຄັ້ງນີ້ ທ່ານ ເຈົ້າແຂວງກ່າວອີກວ່າ ໄລຍະຜ່ານມາແຂວງອຸດົມໄຊແມ່ນໄດ້ຮັບການຊ່ວຍເຫລືອອຸປະກອນການປ້ອງກັນໂຄວິດ-19 ຈາກບັນດາແຂວງພາກເຫນືອຂອງສສຫວຽດນາມ ເຊັ່ນ: ແຂວງດຽນບຽນ, ເຊີນລາ, ລາຍເຈົາ, ວິງຟຸກ.
ຂະນະດຽວກັນທ່ານເຈົ້າແຂວງອຸດົມໄຊຍັງໄດ້ລາຍງານສະພາບການລະບາດແລະການປ້ອງກັນພະຍາດໂຄວິດ-19 ຢູ່ແຂວງອຸດົມໄຊໄລຍະຜ່ານມາໃຫ້ທ່ານ ກົງສູນໃຫຍ່ຮັບຊາບຕື່ມອີກ.
