ໄຟຟ້າລາວອອກມາຍອມຮັບຜິດຊອບກໍລະນີຜິດພາດຄ່າໄຟຟ້າ ແລະ ເລັ່ງຕັ້ງຄະນະກວດສອບເພື່ອແກ້ໄຂຮີບດ່ວນ
ຈາກກໍລະນີບິນໄຟຟ້າມີຕົວເລກ ແລະ ຄ່າຊຳລະໄຟຟ້າສູງເກີນຂອບເຂດ ຫລື 100 ເທົ່າຕົວ ສ້າງຄວາມຕົກໃຈແກ່ຜູ້ຖືກຜົນກະທົບ ແລະ ຮືຮາໃຫ້ກັບສັງຄົມຈຳນວນຫລາຍ.
ຫຼ້າສຸດ ວັນທີ 26 ມິຖຸນາ 2021 ນີ້ ລັດວິສາຫະກິດໄຟຟ້າລາວໄດ້ອອກມາໂພສລົງໃນເພຈທາງການຂອງໄຟຟ້າລາວວ່າ:
ຈາກກໍລະນີ ການອອກບິນຄ່າໄຟຟ້າ ເລກບັນຊີ 00408348 ບ້ານຫ້ວຍນໍ້າເຢັນ ເມືອງນາຊາຍທອງ ນະຄອນຫລວງ ວຽງຈັນ ທີ່ມີຕົວເລກມູນຄ່າການຄິດໄລ່ລາຄາການຊົມໃຊ້ໄຟຟ້າສູງເກີນຄວາມເປັນຈິງ.
ຕໍ່ກັບເຫດການດັ່ງ ວັນທີ 26 ມິຖຸນາ 2021 ຄະນະກໍາມະການຄົ້ນຄ້ວາ ແລະ ປະຕິບັດລະບຽບວິໄນ ລັດວິສາຫະກິດ ໄຟຟ້າລາວ ຈະໄດ້ທໍາການສອບສວນຫາສາເຫດທີ່ກໍ່ໃຫ້ເກີດຄວາມຜິດພາດ ແລະ ດໍາເນີນການແກ້ໄຂໂດຍໄວ.
ລັດວິສາຫະກິດໄຟຟ້າລາວ ຕ້ອງຂໍອະໄພຕໍ່ຜູ້ຊົມໃຊ້ໄຟຟ້າທຸກທ່ານ ແລະ ພ້ອມຈະແກ້ໄຂຂໍ້ຜິດພາດທີ່ເກີດຂື້ນ.
ຖ້າໃບບິນຄ່າໄຟຟ້າຂອງທ່ານ ມີມູນຄ່າການໃຊ້ພະລັງງານສູງຜິດປົກກະຕິ ຫລື ມີການຄິດໄລ່ລາຄາການຊົມໃຊ້ໄຟຟ້າສູງ ຜິດປົກກະຕິ, ຂໍຄວາມກະລຸນາ ແຈ້ງເບີສາຍດ່ວນ 1199 ຫລື ສູນບໍລິການໄຟຟ້າ ໃກ້ບ້ານຂອງທ່ານ ເພື່ອດໍາເນີນການ ກວດກາໃຫ້ທັນເວລາ.
ຖ້າທ່ານບໍ່ໄດ້ຮັບຄໍາຕອບພາຍໃນ 7 ວັນ ທ່ານສາມາດເຂົ້າມາປະສານງານ ທີ່ສໍານັກງານ ຝ່າຍຈໍາໜ່າຍ ບ້ານໜອງບຶກເໜືອ ເມືອງສີໂຄດຕະບອງ ຫລື ສໍານັກງານໃຫຍ່ ລັດວິສາຫະກິດໄຟຟ້າລາວ ບ້ານທົ່ງກາງ ເມືອງສີສັດຕະນາກ ນະຄອນຫລວງວຽງຈັນ.
