ໄຟໄໝ້ໂຮງງານຕັດຫຍິບຢູ່ເຂດພັດທະນາກວມລວມໄຊເສດຖາ ຍ້ອນເຄື່ອງຈັກຊັອດໄໝ້

ເຈົ້າໜ້າທີ່ພະແນກຕໍາຫລວດສະກັດກັ້ນ ແລະ ຕ້ານອັກຄີໄພ ນະຄອນຫລວງວຽງຈັນ ໄດ້ລາຍງານໃຫ້ຮູ້ວ່າ: ໃນເວລາ ປະມານ 09:20 ໂມງ ຂອງວັນທີ 24 ມິຖຸນາ 2021 ໄດ້ຮັບແຈ້ງທາງໂທລະສັບວ່າມີເຫດການໄຟໄໝ້ ໂຮງງານຕັດຫຍິບ ແຜ່ນພົມ ບໍລິສັດທຽນໄທລາວ ອຸດສະຫະກໍາຈໍາກັດ ຕັ້ງຢູ່ບ້ານນາໂນ ເມືອງໄຊເສດຖາ ນະຄອນຫລວງວຽງຈັນ, ເມື່ອໄດ້ຮັບແຈ້ງທາງພະແນກກໍກຽມພ້ອມທັງພາຫະນະ ແລະ ກໍາລັງພົນອອກໄປຫາຈຸດເກີດເຫດ ໂດຍໃຊ້ລົດມອດໄຟ 2 ຄັນ, ໂດຍສົມທົບກັບກົມຕໍາຫລວດສະກັດກັ້ນ ແລະ ຕ້ານອັກຄີໄພ ຈໍານວນ 7 ຄັນ, ລົດ ອພບ 3 ຄັນ, ເມືອງໄຊທານີ 2 ຄັນ, ຈໍານວນພະນັກງານອອກປະຕິໜ້າທີ່ທັງໝົດ 50 ສະຫາຍ, ໜ່ວຍງານກູ້ໄພ 1623 ແລະ 1628, ແລະ ພະນັກງານກໍາມະກອນຂອງບໍລິສັດດັ່ງກ່າວມາຊ່ວຍ. ເຊິ່ງສະຖານທີ່ເກີດເຫດໄຟໄໝ້ແມ່ນຕຶກ c ສອງເປັນອ່າງເກັບມ້ຽນເຄື່ອງວັດສະດຸ, ຜ້າຫົ່ມ, ດ້າຍຫຍິບ, ແພ່ປົກໜ້າພົ, ໂດຍໃຊ້ເວລາໃນການດັບມອດໄຟປະມານ 15 ຊົ່ວໂມງຈຶ່ງສາມາດສະກັດດັບມອດໄຟໄດ້, ສ່ວນສາເຫດໄຟໄໝ້ໃນຄັ້ງນີ້ແມ່ນຍ້ອນໄຟຊັອດເຄື່ອງຈັກແລ້ວໄໝ້ໄຍຜ້າລຸກລາມໄປຢ່າງໄວວາ.

ຜ່ານການສອບສວນຂອງເຈົ້າໜ້າທີ່ຮູ້ວ່າ: ຜູ້ຮັບຜິດຊອບບໍລິສັດດັ່ງກ່າວແມ່ນ ທ້າວ ຫວາງ ຢວນເຂົ້າ ອາຍຸ 49 ປີ ສັນຊາດຈີນ, ດຳເນີນທຸລະກິດເປັນໂຮງງານຕັດຫຍິບແຜ່ນພົມ ຢູ່ເຂດພັດທະນາກວມລວມໄຊເສດຖາ ນະຄອນຫລວງວຽງ, ເຊິ່ງລັກສະນະຂອງບໍລິສັດແມ່ນ ກວ້າງ-ຍາວ 40×15 ແມັດ, ແອ້ມດ້ວຍແຜ່ນອາລູຊິງ, ມຸງອາລູຊິງ ເປັນການຊໍາປະທານເວລາ 20 ປີ, ສ້າງຕັ້ງມາແຕ່ປີ 2019 ເຖິງປະຈຸບັນແມ່ນສໍາເລັດ 50% ແລະ ຍັງບໍ່ໄດ້ຊື້ປະກັນໄພເທື່ອ. ສຳລັບຜົນເສຍຫາຍຕາມຄຳໃຫ້ການໃນເບື້ອງຕົ້ນຄາດວ່າ 15.000 ໂດລາສະຫະລັດ ຫລື 150 ລ້ານກີບ. ແຕ່ຜົນເສຍຫາຍທັງໝົດຍັງຢູ່ໃນການປະການປະເມີນ.