ອິບຣາຮີມ ໄຣຊິ ຊະນະການເລືອກຕັ້ງປະທານາທິບໍດີ ອີຣານ

ອິບຣາຮີມ ໄຣຊິ ກຽມເຂົ້າຮັບຕຳແໜ່ງປະທານາທິບໍດີ ອີຣານ ຄົນຕໍ່ໄປໃນເດືອນສິງຫາ ທີ່ຈະມາເຖິງ ຫຼັງຄວ້າໄຊຊະນະການເລືອກຕັ້ງປະທານາທິບໍດີ ຂະນະທີ່ຖືກຂວໍ້າບາດ ໂດຍສະຫະລັດອາເມລິກາ.

ທ່ານ ອິບຣາຮີມ ໄຣຊິ ຜູ້ພິພາກສາຝ່າຍອະນຸລັກນິຍົມຂອງ ອີຣານ ໄວ 60 ປີ ຄວ້າໄຊຊະນະໃນການເລືອກຕັ້ງປະທານາທິບໍດີ ອີຣານ ທີ່ຈັດຂຶ້ນເມື່ອວັນທີ 18 ມິຖຸນານີ້ ໂດຍໄດ້ຮັບຄະແນນສຽງ 60% ຂະນະທີ່ຊາວ ອີຣ່ານ ບາງສ່ວນເບິ່ງວ່າການເລືອກຕັ້ງປະທານາທິບໍດີຄັ້ງນີ້ເປັນການເອື້ອປະໂຫຍດໃຫ້ທ່ານ ໄຣຊີ ຊະນະການເລືອກຕັ້ງ ສ່ວນຜົນສຳຫຼວດຊີ້ໃຫ້ເຫັນວ່າ ມີປະຊາຊົນຊາວ ອີຣານ ອອກມາໃຊ້ສິດຕໍ່າເປັນປະຫວັດການ ໂດຍມີຜູ້ອອກມາໃຊ້ສິດພຽງ 48,8% ເມື່ອທຽບກັບຈຳນວນຜູ້ໃຊ້ສິດ 70% ໃນປີ 2017.

ອິບຣາຮີມ ໄຣຊິ ຖືວ່າເປັນເຈົ້າໜ້າທີ່ລະດັບສູງຂອງ ອີຣານ ມີຈຸດຢືນສະໜັບສະໜູນຝ່າຍອະນຸລັກນິຍົມຢ່າງຊັດເຈນ ແລະ ຢູ່ໃນລະຫວ່າງການຖືກຂວໍ້າບາດຈາກສະຫະລັດອາເມລິກາ ຫຼັງຖືກກ່າວຫາວ່າເຊື່ອມໂຍງກັບການປະຫານນັກໂທດການເມືອງໃນອະດີດ ໂດຍຄາດວ່າຫລັງຈາກທີ່ທ່ານ ອິບຣາຮີມ ໄຣຊິ ເຂົ້າຮັບຕຳແໜ່ງຢ່າງເປັນທາງການໃນເດືອນສິງຫານີ້ຈະມີແນວໂນ້ມເຮັດໃຫ້ເກີດການປ່ຽນແປງຂອງນະໂຍບາຍໃນປະເທດ ແລະ ຄວາມສຳພັນລະຫວ່າງປະເທດຂອງອີຣານ.