ເມືອງພຽງ ເກີດມີການລະບາດພະຍາດຜິວໜັງອັກເສບຕິດຕໍ່ງົວ-ຄວາຍ 30 ກ່ວາບ້ານ

ທ່ານ ຄຳພັນ ຄຳພູບົວ ຮອງເຈົ້າເມືອງພຽງ ແຂວງໄຊຍະບູລີ ພ້ອມທັງພະນັກງານຈາກຫ້ອງການກະສິກຳ ແລະ ປ່າໄມ້ເມືອງ, ສັດຕະວະແພດ ໄດ້ລົງຊຸກຍູ້ໃນການຕ້ານ, ສະກັດກັ້ນ ແລະ ແກ້ໄຂການລະບາດຂອງພະຍາດຜິວໜັງອັກເສບຕິດຕໍ່ງົວ-ຄວາຍ ຢູ່ທີ່ບ້ານຫ້ວຍຊາກ ໃນວັນທີ 18 ມິຖຸນານີ້.

ເພື່ອແນະນຳໃຫ້ປະຊາຊົນບັນດາເຜົ່າກ່ຽວກັບການປ້ອງກັນ, ສະກັດກັ້ນ ແລະ ແກ້ໄຂການລະບາດຂອງພະຍາດຜິວໜັງອັກເສບຕິດຕໍ່ງົວ-ຄວາຍ, ແນະນຳວິທີການສັກຢາ, ການແຍກປ່ຽວສັດລ້ຽງໂຕທີ່ເກີດພະຍາດ ເຊິ່ງເມືອງພຽງໄດ້ເກີດມີການລະບາດດັ່ງກ່າວແລ້ວ 30 ກ່ວາບ້ານ, ໃນນີ້ມີສັດລ້ຽງທີ່ເປັນພະຍາດ 200 ກ່ວາໂຕ. ກ່ຽວກັບການລະບາດຂອງພະຍາດດັ່ງກ່າວທາງອົງການປົກຄອງເມືອງ ກໍຄື ພາກສ່ວນທີ່ກ່ຽວຂ້ອງ ໄດ້ສົ່ງພະນັກງານລົງຕິດຕາມ ຢູ່ 6 ຈຸດ ຄື: ກຸ່ມກີ່ວແຄ່ມ, ເມືອງພຽງ, ນາຊີງ, ເທດສະບານ ໂພນສະອາດ ແລະ ນາແວນ ເພື່ອແນະນຳວິທີປ້ອງກັນເຂດທີ່ບໍ່ມີການລະບາດ ແລະ ປິ່ນປົວເຂດທີ່ມີການລະບາດແລ້ວ.

ໂອກາດນີ້, ທ່ານ ຮອງເຈົ້າເມືອງພຽງ ໄດ້ຮຽກຮ້ອງໃຫ້ປະຊາຊົນບັນດາເຜົ່າຈົ່ງມີສະຕິໃນການເບິ່ງແຍງສັດລ້ຽງຂອງຕົນໃຫ້ດີ ຖ້າຫາກພົບເຫັນສັດມີອາການເປັນຕຸ່ມຕາມຜິວໜັງ ແລະ ບໍ່ກິນຫຍ້າ ແມ່ນໃຫ້ແຍກອອກຈາກຝູງ ພ້ອມທັງ ປະສານງານຫາພາກສ່ວນທີ່ກ່ຽວຂ້ອງກໍຄື ຫ້ອງການກະສິກຳ ແລະ ປ່າໄມ້ເມືອງ ເພື່ອສັກຢາປິ່ນປົວໃຫ້ຖືກຕ້ອງຕາມຫຼັກວິທີການ ແລະ ເຮັດໃຫ້ພະຍາດດັ່ງກ່າວບໍ່ມີການລະບາດເປັນວົງກ້ວາງ.