ລາຍງານເບື້ອງຕົ້ນກ່ຽວກັບເຫດເສຍຊີວິດ 3ຄົນໃນວັນດຽວຢູ່ເມືອງຫີນເຫີບ
ວັນທີ 18 ມິຖຸນາ 2021 ນີ້ ກອງບັນຊາການ ປກສ ເມືອງ ຫີນເຫີບ ລາຍງານ ເບື້ອງຕົ້ນກ່ຽວກັບ ເຫດການເສຍມີຄົນຊີວິດ 3 ຄົນ ໃນວັນທີ 17 ມິຖຸນາຜ່ານມາ ຢູ່ເມືອງຫີນເຫີບ ແຂວງວຽງຈັນ.
1. ທ້າວ ຄໍາພັນ ອາຍຸ 51 ປີ ພະນັກງານຂັບລົດ ຢູ່ ບໍລິສັດ ຫົງຊິງ ບ້ານ ຖິ່ນແກ້ວ ເມືອງແກ້ວອຸດົມ ແຂວງວຽງຈັນ ເວລາ 13:00 ນາທີ ໄດ້ມີອຸບັດຕິເຫດລົດບັນທຸກ 10 ລໍ້ເສຍຫຼັກລົງຮ່ອງແຄມທາງເຂດ ບ້ານ ວຽງທອງ ເຮັດໃຫ້ຜູ້ຂັບຂີ່ເສຍຊີວິດ, ຜ່ານການຊັນນະສູດຂອງເຈົ້າໜ້າທີ່ ປກສ ເມືອງ ແລະ ສາທາເມືອງ ເຫັນວ່າບໍ່ມີຮ່ອງຮອຍກະທົບຕາມຮ່າງກາຍຂອງຜູ້ເສຍຊີວິດແຕ່ຢ່າງໃດ ຜູ້ກ່ຽວເສຍຊີວິດຍ້ອນພະຍາດຂອງຜູ້ກ່ຽວເອງ, ຕາມການໃຫ້ການຂອງ ທ້າວ ວິ ອາຍຸ 27 ປີ ພະນັກງານຂັບລົດຢູ່ບໍລິສັດດຽວກັບຜູ້ເສຍຊີວິດ ໃຫ້ການວ່າ: ໃນຄັ້ງວັນທີ 17 ພວກກ່ຽວທັງສອງແມ່ນໄດ້ຂັບລົດຄົນລະຄັນອອກມາຈາກບ້ານ ທ່າບົກ ເມືອງ ທ່າພະບາດ ແຂວງ ບໍລິຄໍາໄຊ ໄລຍະການເດີນທາງຜູ້ເສຍຊີວິດແມ່ນບໍ່ໄດ້ກິນເຂົ້າເຊົ້າ, ແຕ່ໄດ້ດື່ມກາເຟເບີດີ້ 02 ປ່ອງ, ເບຍ 01 ປ່ອງ ແລະ ກະທິງແດງເຄິ່ງແກ້ວ.
2. ທ້າວ ໄມພອນ ອາຍຸ 50 ປີ ອາຊີບ ຊາວນາ ບ້ານ ໂພນມ່ວງ ເມືອງ ຫີນເຫີບ ນອນແລ້ວເສຍຊີວິດ ເວລາ 00:10 ນາທີ, ກ່ອນການເສຍຊີວິດຜູ່ກ່ຽວແມ່ນໄດ້ດື່ມເຫຼົ້າເມົາຢູ່ເຮືອນຂວັນຢູ່ບ້ານ ໄລຍະຜ່ານມາຜູ້ກ່ຽວແມ່ນໄດ້ດື່ມເຫຼົ້າເປັນປະຈໍາ.
3. ທ້າວ ສີທອນ ອາຍຸ 17 ປີ ອາຊີບ ນັກຮຽນ ຢູ່ບ້ານນາຜາບ່ອງ(ຄຸ້ມນາເລື່ອງ) ເມືອງ ຫີນເຫີບ ແຂວງ ວຽງຈັນ ເສຍຊີວິດ ເວລາ 20:00 ໂມງ ກ່ອນການເສຍຊີວິດຜູ້ກ່ຽວແມ່ນໄດ້ໄປເຮັດວຽກຢູ່ ໂຮງງານຫົວອາຫານ ຢູ່ບ້ານ ຫາດສ້ຽວ ເມືອງ ທຸລະຄົມ ແຂວງ ວຽງຈັນ ພໍຕົກມາຮອດເວລາ 16 ໂມງແລງ ຜູ້ກ່ຽວໄດ້ໄປເລາະຍ່າງຫລິ້ນຢູ່ເດີ່ນໂຮງງານ ແລ້ວຜູ້ກ່ຽວໄດ້ເປັນວິນ ແລ້ວກໍນຳໄປສົ່ງຜູ້ກ່ຽວໄປໂຮງໝໍເມືອງນາຊາຍທອງ ແລະ ໄດ້ເສຍຊີວິດ ໃນເວລາ 20:00 ໂມງ.
ຕໍ່ເຫດການດັ່ງກ່າວນີ້, ເຈົ້າໜ້າທີ່ຈະໄດ້ຊັນນະສູດຫາສາເຫດຂອງການເສຍຊີວິດທີ່ແທ້ຈິງຕໍ່ໄປ.
