ແຜນຍຸດທະສາດແຫ່ງຊາດວ່າດ້ວຍການພັດທະນາຊາວໜຸ່ມ ແລະ ເຍົາວະຊົນ ໄດ້ຮັບການເປີດຕົວຄັ້ງທໍາອິດໃນລາວ

ອົງການສະຫະປະຊາຊາດ ກອງທຶນສຳລັບປະຊາກອນ (UNFPA) ແລະ ສູນກາງຊາວໜຸ່ມລາວ ໄດ້ຮ່ວມກັນຈັດກອງປະຊຸມເປີດຕົວແຜນຍຸດທະສາດແຫ່ງຊາດວ່າດ້ວຍການພັດທະນາຊາວໜຸ່ມ ແລະ ເຍົາວະຊົນເປັນຄັ້ງທໍາອິດຜ່ານລະບົບອອນລາຍ ໃນວັນທີ 17 ມິຖຸນານີ້ ທີ່ນະຄອນຫລວງວຽງຈັນ, ເພື່ອປຶກສາຫາລືກ່ຽວກັບຜົນກະທົບຂອງພະຍາດໂຄວິດ-19 ຕໍ່ກັບເຍົາວະຊົນ ແລະ ຊາວໜຸ່ມ.

ຍຸດທະສາດສະບັບນີ້ຈະໄດ້ຈັດຕັ້ງປະຕິບັດໃນບັນດາກະຊວງ ແລະ ໜ່ວຍງານຕ່າງໆ ລວມທັງອົງການຈັດຕັ້ງມະຫາຊົນນັບແຕ່ຂັ້ນສູງກາງຫາທ້ອງຖິ່ນ. ຍຸດທະສາດດັ່ງກ່າວໄດ້ໃຫ້ທິດທາງຍຸດທະສາດແກ່ບັນດາກະຊວງທີ່ກ່ຽວຂ້ອງເພື່ອສ້າງຂໍ້ກໍານົດທີ່ຈໍາເປັນ, ການຈັດສັນງົບປະມານ ແລະ ຈັດຕັ້ງປະຕິບັດແຜນງານ ແລະ ໂຄງການ ຕ່າງໆໃນຂົງເຂດສຸຂະພາບ, ການສຶກສາ, ການສ້າງວຽກເຮັດງານທໍາ, ການປ້ອງກັນ ແລະ ການມີສ່ວນຮ່ວມຂອງເຍົາວະຊົນ ແລະ ຊາວໜຸ່ມ. ຄຽງຄູ່ກັນນີ້, ກໍໄດ້ມີກິດຈະກຳລະດົມທຶນເພີ່ມເຕີມ ແລະ ງົບປະມານກໍຈະຖືກຈັດສັນ ໂດຍລັດຖະບານຜ່ານກະຊວງ ແລະ ອົງການຈັດຕັ້ງທາງລັດຖະບານ ເພື່ອນໍາໃຊ້ໃນການດຳເນີນກຳຈະກຳສະເພາະຕາມ ຄວາມຕ້ອງການ. ນອກນີ້, ຍັງເປັນການລະດົມການສະໜັບສະໜູນທາງດ້ານວິຊາການ ແລະ ແຫລ່ງທຶນຈາກບັນ ດາອົງການຈັດຕັ້ງສາກົນ, ຄູ່ຮ່ວມພັດທະນາ ແລະ ພາກເອກະຊົນ ເພື່ອເພີ່ມການການຈັດຕັ້ງປະຕິບັດໃນແນວທາງທີ່ໄດ້ ກ່າວໄວ້ໃນແຜນຍຸດທະສາດ.

ໂອກາດນີ້, ທ່ານ ອາລຸນໄຊ ສູນນະລາດ, ເລຂາທິການໃຫຍ່ສູນກາງຊາວໜຸ່ມລາວ ໃຫ້ຮູ້ວ່າ: ຍຸດທະສາດນີ້ຈະຊ່ວຍໃຫ້ປະເທດໃນການປັບປຸງແຫລ່ງທຶນມະນຸດທີ່ຈະປະກອບສ່ວນເຂົ້າໃນການບັນລຸຈຸດປະສົງຂອງແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີ 9 ແລະ ເປົ້າໝາຍການພັດທະນາແບບຍືນຍົງດ້ວຍວິໄສທັດທີ່ບໍ່ປ່ອຍປະຖິ້ມໃຜຢູ່ເບື້ອງຫລັງ. ພ້ອມທັງເນັ້ນໃຫ້ເຫັນເຖິງຜົນກະທົບຂອງພະຍາດໂຄວິດ-19 ທີ່ມີຕໍ່ເຍົາວະຊົນ ແລະ ໄວໜຸ່ມໃນຂົງເຂດ ຕ່າງໆເຊັ່ນ: ການສຶກສາ, ໄວຈະເລີນພັນ ແລະ ສຸຂະພາບທາງເພດ, ສຸຂະພາບຈິດ ແລະ ບັນຫາຈິດສັງຄົມ ຕະຫລອດເຖິງຜົນກະທົບທາງດ້ານເສດຖະກິດ- ສັງຄົມ.

ທ່ານ ນາງ ມາຣຽມ ເອ ຄານ, ຜູ້ຕາງໜ້າອົງການ UNFPA ປະຈໍາ ສປປລາວ ໄດ້ກ່າວວ່າ: “ການແພ່ລະບາດຮຽກຮ້ອງໃຫ້ມີການຕອບໂຕ້ຢ່າງທັນການ, ໃຫ້ມີແບບແຜນບໄລຍະກາງ ແລະ ໄລຍະຍາວເພື່ອແກ້ໄຂຜົນກະທົບຂອງພະຍາດໂຄວິດ-19 ໃນໝູ່ເຍົາວະຊົນ ແລະ ຊາວໜຸ່ມ ເພື່ອໃຫ້ຄວາມກ້າວໜ້າທີ່ບັນລຸໄດ້ໃນສອງ-ສາມທົດສະວັດທີ່ຜ່ານມາບໍ່ໃຫ້ຖອຍຫລັງ” ແລະ “ປະຊາກອນຫລາຍກວ່າເຄິ່ງໜຶ່ງຂອງປະເທດລາວມີອາຍຸຕໍ່າກວ່າ 24 ປີ ເຊິ່ງຍົກໃຫ້ເຫັນເຖິງການເຕີບໂຕຂອງເສດຖະກິດທີ່ແບ່ງຕາມໂຄງສ້າງອາຍຸຂອງປະຊາກອນໃນປະເທດນັ້ນ”.