ທ່ານ ໄຊສົມພອນ ພົມວິຫານ ຮ່ວມພິທີອັງເຊີນຮູບຫລໍ່ເຄິ່ງຄີງ ປະທານ ໄກສອນ ພົມວິຫານ ສະຖິດແທ່ນອະນຸສາວະລີ ເມືອງວິລະບູລີ

ວັນທີ 15 ມິຖຸນາ 2021 ເມືອງວິລະບູລີ ໄດ້ມີພິທີແຮ່ເອົາຮູບຫລໍ່ເຄິ່ງຄີງ ປະທານໄກສອນ ພົມວິຫານ ວິລະບູລຸດແຫ່ງຊາດລາວ ແຮ່ຈາກອະນຸສອນສະຖານປະທານໄກສອນພົມວິຫານ ເທສະບານແຂວງສະຫວັນນະເຂດ ເພື່ອໄປອັງເຊີນສະຖິດແທ່ນທີ່ອະນຸສາວະລີ ຫ້ອງວ່າການປົກຄອງເມືອງວິລະບູລີ. ເຂົ້າຮ່ວມໃນພິທີມີ ທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສະພາແຫ່ງຊາດ ພ້ອມຄະນະ, ທ່ານ ສັນຕິພາບ ພົມວິຫານ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ ພ້ອມການນຳຂັ້ນແຂວງ ແລະ ການນຳເມືອງວິລະບູລີ ພ້ອມພະນັກງານຫຼັກແຫຼ່ງ ນ້ອງນ້ອຍເຍົາວະຊົນເຂົ້າຮ່ວມ.
ທ່ານ ຄຳຜຸຍ ສີບຸນເຮືອງ ກຳມະການພັກແຂວງ ເລຂາພັກເມືອງ ເຈົ້າເມືອງວິລະບູລີ ກ່າວຕໍ່ພິທີວ່າ: ກ້ອນກຳລັງທຸກພາກສ່ວນ ແລະ ປະຊາຊົນຊາວເມືອງວິລະບູລີ ຮູ້ສຶກເປັນກຽດຢ່າງສູງ ທີ່ໄດ້ຕ້ອນຮັບຮູບຫລໍ່ເຄິ່ງຄີງ 75ຊັງຕີແມັດ ຂອງປະທານໄກສອນພົມວິຫານ ເພື່ອສະຖິດທີ່ອະນຸສາວະລີຂອງເມືອງວິລະບູລີ ເພື່ອເປັນບ່ອນເຄົາລົບ ສັກກະລະບູຊາ ໃຫ້ຄົນຮຸ່ນຫລັງ ແລະ ຮຸ່ນສືບທອດ ເຫັນໄດ້ຜົນງານ ແລະ ພາລະກິດປະຕິວັດຂອງປະທານໄກສອນພົມວິຫານ, ເປັນການສືບສານ ກໍ່ສ້າງ ຝຶກຝົນຫລໍ່ຫລອມບຳລຸງຕົນເອງ, ຄົ້ນຄ້ວາຮ່ຳຮຽນເອົາແບບຢ່າງຄຸນສົມບັດສິນທຳປະຕິວັດ ແລະ ແບບແຜນດຳລົງຊີວິດ ກໍຄືວິທີນຳພາເຮັດວຽກຂອງທ່ານປະທານເຂົ້າໃນພາກປະຕິບັດໜ້າທີ່ຕົວຈິງ.
ໃນພິທີ ໄດ້ວາງກະຕ່າດອກໄມ້, ຫົດສົງຮູບຫລໍ່ເຄິ່ງຄີງທ່ານປະທານ ໄກສອນ ພົມວິຫານ ຂອງທ່ານ ປອ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສະພາແຫ່ງຊາດ ພ້ອມຄະນະ, ທ່ານ ສັນຕິພາບ ພົມວິຫານ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນະເຂດ ພ້ອມການນຳຂັ້ນແຂວງ ແລະ ການນຳເມືອງວິລະບູລີ ພ້ອມພະນັກງານຫຼັກແຫຼ່ງ ນ້ອງນ້ອຍເຍົາວະຊົນ ທີ່ເຂົ້າຮ່ວມຕາມລຳດັບ.
ທັງນີ້ກໍເພື່ອສະແດງຄວາມກະຕັນຍູຮູ້ບຸນຄຸນ, ສະແດງຄວາມເຄົາລົບຮັກ, ສັນລະເສີນເຖິງຄຸນງາມຄວາມດີ ແລະ ຜົນງານອັນໃຫຍ່ຫລວງຂອງປະທານໄກສອນ ພົມວິຫານ ທີ່ໄດ້ອຸທິດເພື່ອປະເທດຊາດ ແລະ ການປະຕິວັດ. ທ່ານແມ່ນນັກປະຕິວັດຜູ້ຍິ່ງໃຫຍ່ຂອງຊາດ, ຜູ້ນຳຂອງພັກ-ລັດ ທີ່ປີຊາສາມາດ ສະຫລາດສ່ອງໃສ ແລະ ສະດຸ້ງໄວ ເປັນສັນຍາລັກ ແລະ ເປັນແກ່ນສານຂອງຄວາມສາມັກຄີພາຍໃນພັກ ແລະ ໃນຊາດ. ເປັນຜູ້ນຳທີ່ມີຄຸນສົມບັສິນທຳປະຕິວັດສູງສົ່ງ, ມີທັດສະນະມະຫາຊົນກ້ວາງຂວາງ, ເປັນຜູ້ນຳທີ່ດຸໝັ່ນ ດຳລົງຊີວິດແບບງ່າຍດາຍ ປະຢັດ ບໍລິສຸດ ປອດໃສ, ປະທານ ໄກສອນ ພົມວິຫານ ແມ່ນນັກເຄື່ອນໄຫວສາກົນຜູ້ດີເດັ່ນ. ຜົນງານ ແລະ ຄຸນງາມຄວາມດີຂອງທ່ານ ປວງຊົນລາວທັງຊາດໄດ້ຈາລຶກບຸນຄຸນ ແລະ ຮ່ຳຮຽນເອົາມາໝູນໃຊ້ໃນຊີວິດປະຈຳວັນ.
ພ້ອມນັ້ນ ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ພ້ອມຄະນະ, ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມການນຳຂັ້ນແຂວງ ກໍໄດ້ຮ່ວມປູກຕົ້ນໄມ້ເປັນທີ່ລະນຶກ ທີ່ອະນຸສາວະລີປະທານໄກສອນພົມວິຫານ ເມືອງວິລະບູລີ.