ຮຽກຮ້ອງໃຫ້ທຸກຄົນໃນສັງຄົມທີ່ມີເງື່ອນໄຂ ຮ່ວມກັນບໍລິຈາກເລືອດເພື່ອຕໍ່ລົມຫາຍໃຈໃຫ້ເພື່ອນຮ່ວມໂລກ

ເນື່ອງໃນໂອກາດວັນຜູ້ບໍລິຈາກເລືອດໂລກ 14 ມິຖຸນາທີ່ຈະມາເຖິງນີ້, ທ່ານ ພູທອນ ເມືອງປາກ ປະທານອົງການກາແດງລາວ, ຮອງປະທານຄະນະກຳມະການສົ່ງເສີມການບໍລິຈາກເລືອດ-ສົ່ງເລືອດແຫ່ງຊາດ ໄດ້ຖະແຫລງຂ່າວໃນວັນທີ 11 ມິຖຸນານີ້ ທີ່ສູນເລືອດແຫ່ງຊາດ ນະຄອນຫລວງວຽງຈັນ, ໂດຍທ່ານໄດ້ຍົກໃຫ້ເຫັນຄວາມເປັນມາຂອງວັນຜູ້ບໍລິຈາກເລຶອດສາກົນທີ່ອົງການອະນາ ໄມໂລກກຳນົດເລີ່ມຕົ້ນແຕ່ປີ 2005 ເປັນຕົ້ນມາ  ແລະ ຄວາມສຳຄັນຂອງເລືອດທີ່ມີຕໍ່ສິ່ງທີ່ມີຊີວິດ. ພາຍໃຕ້ຄຳຂວັນໃນປີວ່າ: “ໃຫ້ເລືອດເພື່ອຕໍ່ລົມຫາຍໃຈໃຫ້ເພື່ອນຮ່ວມໂລກ” ໂດຍມີພ້ອມທັງມີເປົ້າຫມາຍໃຫ້ທຸກປະເທດໃນໂລກ ໄດ້ຮັບເລືອດຈາກຜູ້ບໍລິຈາກເລືອດດ້ວຍຄວາມຕື່ນຕົວສະຫມັກໃຈ ແລະ ບໍ່ຮຽກຮ້ອງສິ່ງຕອບແທນ.

ປີນີ້ເນື່ອງຈາກສະພາບການທົ່ວໂລກ ກໍຄືຢູ່ປະເທດລາວເຮົາຍັງຢູ່ໃນໄລຍະເຝົ້າລະວັງ ການລະບາດຂອງພະຍາດໂຄວິດ-19, ຈຶ່ງບໍ່ມີຄວາມສະດວກ ທີ່ຈະຈັດຂະບວນການທີ່ມີຄົນເຂົ້າຮ່ວມເປັນ ຈໍານວນຫຼາຍ, ອົງການກາແດງລາວ ຈຶ່ງໄດ້ມີແຈ້ງການແນະນໍາໃຫ້ສູນເລືອດແຫ່ງຊາດ ແລະ ສູນເລືອດ ແຂວງໃນທົ່ວປະເທດ ຈັດຕັ້ງການສະເຫຼີມສະຫຼອງວັນຜູ້ບໍລິຈາກເລືອດໂລກແບບກະທັດຮັດ ໂດຍການເຜີຍແຜ່ຂໍ້ມູນຂ່າວສານ, ປຸກລະດົມຜ່ານສື່ມວນຊົນປະເພດຕ່າງໆ ແລະ ສື່ສັງຄົມ Online ຈັດພິທີມອບ-ຮັບໃບຍ້ອງຍໍ ໃຫ້ຂອງຂວັນແກ່ຜູ້ບໍລິຈາກເລືອດ ໃຫ້ເຫມາະສົມຕາມເງື່ອນໄຂຕົວຈິງຂອງແຕ່ລະແຂວງ ແລະ ຈັດຕາຕະລາງການບໍລິຈາກເລືອດດ້ວຍວິຖີແບບໃຫມ່ ປະຕິບັດມາດຕະການປ້ອງກັນພະຍາດໂຄວິດ 19 ຢ່າງເຂັ້ມງວດ.

ປີ 2020 ຜ່ານມາ ອົງການກາແດງລາວ ຈັດຂະບວນການປຸກລະດົມບໍລິ ຈາກເລືອດໄດ້ 1.873 ຄັ້ງ, ມີຜູ້ເຂົ້າຮ່ວມ 215.600 ເທື່ອຄົນ ໄດ້ຮັບເລືອດຕົວຈິງ 60.358 ຖົງ, ໃນນີ້ ມີຜູ້ບໍລິຈາກເລືອດແບບສະຫມັກໃຈ ບໍ່ຮຽກຮ້ອງສະງຕອບແທນ ກວມເອົາ 90%. ສະເພາະປີ 2021 ມະຕິສະພາແຫ່ງຊາດໄດ້ຮັບຮອງເອົາຕົວຊີ້ວັດທີ່ໄດ້ກຳນົດຄາດຫມາຍຈຳນວນຖົງເລຶອດທີ່ຈະຕ້ອງຂົນຂວາຍໃຫ້ໄດ້ 64.000 ຖົງ.

ດັ່ງນັ້ນ ປະທານອົງການກາແດງລາວ ໄດ້ຮຽກຮ້ອງໃຫ້ທຸກຄົນໃນສັງຄົມທີ່ມີເງື່ອນໄຂ ຈົ່ງຮ່ວມກັນບໍລະຈາກເລືອດແບບບໍ່ຮຽກຮ້ອງສິ່ງຕອບແທນໃຫ້ຫລາຍຂຶ້ນກວ່າເກົ່າ ເພາະເລືອດແມ່ນມີຄວາມສໍາຄັນຕໍ່ຊີວິດ, ຂາດບໍ່ໄດ້, ຂາດເລືອດກໍ່ຄືຂາດຊີວິດ, ບໍ່ມີສິ່ງອື່ນໃດມາທົດແທນໄດ້, ບໍ່ມີໂຮງງານ ຫຼື ວິທີການອັນໃດ ທີ່ຈະຜະລິດເລືອດໄດ້ເທື່ອ ນອກຈາກເລືອດຂອງຄົນເຮົາທີ່ບໍລິຈາກໃຫ້ແກ່ກັນ ແລະ ກັນ.