ລຸກຊຳບວກ ຊ່ວຍເຫລືອວຽກງານຕອບໂຕ້ການແຜ່ລະບາດຂອງພະຍາດໂຄວິດ-19 ໃນ ລາວຕື່ມອີກ 1 ລ້ານເອີໂຣ (ປະມານ 11,5 ຕື້ກີບ)

ວັນທີ 10 ມິຖຸນາ 2021 ນີ້ ທ່ານ Sam Schreiner ອຸປະທູດແຫ່ງຣາຊະອານາຈັກລຸກຊຳບວກ ຕ່າງໜ້າໃຫ້ແກ່ລັດຖະບານ ມອບເງິນ ຊ່ວຍເຫລືອວຽກງານຕອບໂຕ້ການແຜ່ລະບາດຂອງພະຍາດໂຄວິດ-19 ໃນ ລາວ ຕາງໜ້າຮັບໂດຍ ດຣ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ.
ການຊ່ວຍເຫລືອຄັ້ງນີ້ ແມ່ນໄລຍະ 2 (ໂຄງການ ລາວ/027) ແມ່ນໄດ້ສັນຍາໃຫ້ການສະໜັບສະໜູນເພີ່ມເຕີມ 1 ລ້ານເອີໂຣ (ປະມານ 11.5 ຕື້ກີບ) ເພື່ອນຳໃຊ້ເຂົ້າໃນວຽກງານບົ່ງມະຕິພະຍາດ, ຫລຸດຜ່ອນກໍລະນີ ແລະ ກັນ ການລະບາດຂອງເຊື້ອພະຍາດໂຄວິດ-19 ໃນ ສປປ ລາວ.
ໃນນັ້ນງົບປະມານສ່ວນໜຶ່ງຈະຖືກນຳໃຊ້ເຂົ້າໃນການຈັດຊື້ອຸປະກອນການແພດ, ນ້ຳຢາ ແລະ ເຄື່ອງໃຊ້ທີ່ກ່ຽວຂ້ອງ ເພື່ອຕອບສະໜອງໃຫ້ໄດ້ເຖິງຄວາມຕ້ອງການໃນການກວດວິເຄາະພະຍາດ.
ແຫ່ງຣາຊະອານາຈັກລຸກຊຳບວກ-ລາວ ເປັນປະເທດຄູ່ຮ່ວມພັດທະນາເພື່ອສ້າງຄວາມເຂັ້ມແຂງລະດັບຊາດ ແລະ ເສີມສ້າງຄວາມອາດສາມາດ ໃນການກວດຊອກຫາ, ການປະເມີນ ແລະ ການຕອບໂຕ້ຕໍ່ວິກິດການລະບາດຂອງພະຍາດໂຄວິດ-19 ທີ່ກຳລັງເກີດຂຶ້ນຢູ່ໃນ ສປປ ລາວ.