ຮອງຫົວໜ້າກົມຄວບຄຸມພະຍາດຕິດຕໍ່ ຕອບຂໍ້ສົງໄສກ່ຽວກັບພາຫະນະນຳເຊື້ອໂຄວິດ-19

ໃນໄລຜ່ານມາສັງຄົມໄດ້ສົງໄສ ແລະ ຕັ້ງຄຳຖາມກ່ຽວກັບເລື່ອງການຕິດຕໍ່ພະຍາດໂຄວິດ-19 ວ່າ: ໃນກໍລະນີຫາກມີແມງວັນ, ຍຸງ ໄປກັດ ຫລື ຈັບຕອມຜູ້ທີ່ຕິດເຊື້ອ ແລ້ວໄປກັດ ຫລື ຈັບຕອມ ໃສ່ບຸກຄົນອື່ນທີ່ບໍ່ມີເຊື້ອ ຈະສາມາດເຮັດໃຫ້ບຸກຄົນດັ່ງກ່າວນັ້ນຕິດເຊື້ອໄດ້ບໍ່?

ຕໍ່ກໍລະນີດັ່ງກ່າວນີ້, ທ່ານ ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ໃຫ້ສຳພາດຕໍ່ນັກຂ່າວໜັງສືພິມ ລາວພັດທະນາ ວ່າ: ການຕິດເຊື້ອໂຄວິດ-19 ແມ່ນບໍ່ສາມາດຕິດຕໍ່ຈາກແມງວັນ, ຍຸງ ຫລື ສັດອື່ນໆໄດ້ ເຖິງແມ່ນວ່າສັດດັ່ງກ່າວນັ້ນຈະໄດ້ໄປສຳພັດຜູ້ຕິດເຊື້ອ ແລ້ວໄປຈັບຕອມຄົນອື່ນກໍຕາມ ຈະບໍ່ນຳເຊື້ອໄປແພ່ສູ່ຄົນໄດ້,  ເພາະມັນຈະແຕກຕ່າງກັບພະຍາດໄຂ້ຍຸງລາຍທີ່ສາມາດຕິດຕໍ່ຈາກສັດສູ່ຄົນໄດ້.

ຍ້ອນວ່າພະຍາດໂຄວິດ-19 ແມ່ນພະຍາດຕິດຕໍ່ທີ່ເກີດຈາກໄວຣັສໂຄໂຣນາໃນມີການຄົ້ນພົບຫລ້າສຸດ ແລະ ເປັນການແພ່ເຊື້ອຈາກຄົນສູ່ຄົນຜ່ານທາງລະອອງຈາກປາກ-ດັງ, ໂດຍຄັດລັ່ງອອກມາ ໃນເວລາຜູ້ຕິດເຊື້ອໄອ ຫລື ຈາມ ຄົນທີ່ຢູ່ໃກ້ຈະຮັບເຊື້ອໄດ້ຈາກການຫາຍໃຈເອົາລະອອງເຊື້ອເຂົ້າໄປໃນຮ່າງກາຍ ຫລື ຈາກການເອົາມືໄປຈັບຜິວໜັງທີ່ມີລະອອງເຊື້ອເຫລົ່ານັ້ນ ແລ້ວໃຊ້ມືທີ່ມີລະອອງເຊື້ອໄປຈັບຕາ ແລະ ໃບໜ້າ ກໍຈະພາໃຫ້ຕິດເຊື້ອໄດ້, ເຊິ່ງໄລຍະເວລາການສະແດງອາການໃຫ້ຮູ້ວ່າເຮົາຕິດເຊື້ອແມ່ນນັບແຕ່ມື້ເຮົາໄດ້ຮັບເຊື້ອ 1-14 ວັນ ອາການເຊັ່ນ: ໄຂ້, ໄອ, ຈາມ, ປວດເມື່ອຍ, ຫາຍໃຈຍາກ, ດັງບໍ່ໄດ້ກິ່ນ ແລະ ລີ້ນບໍ່ໄດ້ລົດຊາດ,  ໂດຍຄ່າສະເລ່ຍ 97% ແມ່ນຈະມີການສະແດງອາການອອກໃນເວລາ 5-6 ວັນ.