ຂະແໜງສ່ວຍສາອາກອນຈະບໍ່ສາມາດເກັບລາຍຮັບໄດ້ບັນລຸຕາມແຜນ ຍ້ອນການລະບາດໂຄວິດ-19

ອີງຕາມການລາຍງານຂອງ ທ່ານພູ ທະນູເພັດ ໄຊສົມບັດ ຫົວໜ້າກົມສ່ວຍສາອາກອນ ຕໍ່ກອງປະຊຸມສະຫລຸບການຈັດຕັ້ງປະຕິບັດ 5 ເດືອນຕົ້ນປີ ແລະ ຄາດຄະເນແຜນການໝົດປີຂອງຂແໜງການເງິນ ເມື່ອທ້າຍອາທິດຜ່ານມານນີ້ ໃຫ້ຮູ້ວ່າ: ປີ 2021 ຂະແໜ່ງສ່ວຍສາອາກອນ ໄດ້ຮັບຕົວເລກແຜນການຈັດເກັບລາຍຮັບໝົດ 12.112 ຕື້ກີບ, ກົມສ່ວຍສາອາກອນ 7.068,97 ຕື້ກີບ, ທ້ອງຖິ່ນ 5.043,03 ຕື້ກີບ. ຜ່ານການປະຕິບັດຕົວຈິງໃນໄລຍະ 4 ເດືອນຕົ້ນປີ ສາມາດປະຕິບັດໄດ້ 3.250,4 ຕື້ກີບ ເທົ່າກັບ 26,9% ແລະ ຄາດຄະເນ 6 ເດືອນຕົ້ນປີຈະສາມາດປະຕິບັດໄດ້ 4,642,1 ຕື້ກີບ ເທົ່າກັບ 38,3% ແຕ່ຖ້າທຽບໃສ່ໄລຍະດຽວກັນກັບປີ 2020 ເຫັນວ່າເພີ່ມຂຶ້ນ 11,1% ຫລື ປະມານ 465,2 ຕື້ກີບ ຈາກອາກອນປົກກະຕິ, ອາກອນເງິນເດືອນ, ອາກອນກຳໄລ, ອາກອນມູນຄ່າເພີ່ມ ແລະ ອາກອນຊົມໃຊ້.
ເຖິງແມ່ນວ່າການຈັດເກັບລາຍຮັບຈາກອາກອນປົກກະຕິເພີ່ມຂຶ້ນ ແຕ່ຖ້າທຽບໃສ່ຕົວເລກລາຍຮັບ 6 ເດືອນຕົ້ນປີ ແມ່ນຈະບໍ່ສາມາດບັນລຸແຜນການທີ່ກຳນົດໄວ້ ປັດໄຈຫລັກແມ່ນເກີດຈາກການລະບາດໂຄວິດ-19 ເຊິ່ງນັບຕັ້ງແຕ່ຕົ້ນປີ 2020 ເປັນຕົ້ນມາ ໂຄງສ້າງເສດຖະກິດຂອງປະເທດລາວຢຸດສະງັກ ລວມທັງປະຕິບັດມາດຕະການເພື່ອສະກັດກັ້ນ ແລະ ເຝົ້າລະວັງຕາມຄຳສັ່ງຂອງທ່ານນາຍົກລັດຖະມົນຕີເລກທີ 15/ນຍ ແລະ ມີການຂະຫຍາຍເວລາ ຕື່ມອີກ ສົ່ງຜົນກະທົບຕໍ່ການຂະຫຍາຍຕົວຂອງເສດຖະກິດປະເທດໂດຍລວມ ເຊິ່ງມີຫລາຍວິສາຫະກິດໄດ້ຢຸດເຊົາກິດຈະການ ຫລື ໄດ້ມີການຢຸດທຸລະກິດການຊົ່ວຄາວ ໂດຍສະເພາະຂະແໜງການທ່ອງທ່ຽວ, ໂຮງແຮມ, ຮ້ານອາຫານ, ຮ້ານບັນເທີງ ແລະ ຂະແໜງການກ່ຽວຂ້ອງອື່ນໆ.
ອີງຕາມການຄາເຄະເນໝົດປີເບື້ອງຕົ້ນການເກັບລາຍຮັບຈະປະຕິບັດໄດ້ 10.096,5 ຕື້ກີບ ເທົ່າກັບ 83,4% ໃນນັ້ນ ຂະແໜງສ່ວຍສາອາກອນຄາດຄະເນຈະປະຕິບັດໄດ້ 6.145,4 ຕື້ກີບ ເທົ່າກັບ 86,9% ແລະ ທ້ອງຖິ່ນ 3,951,1 ຕື້ກີບ ເທົ່າກັບ 78,3% ຂອງແຜນການປີ.