ຄ້າຂາຍ ເສບຢາເສບຕິດ ພ້ອມມີອາວຸດເສິກ ຖືກດຳເນີນຄະດີ

ທ່ານ ພັທ ບຸນມີ ກັນຕີຍາວົງ ຮອງຫົວໜ້າກອງບັນຊາການເມືອງນາຊາຍທອງ ໃຫ້ຮູ້ວ່າ: ເວລາ 15:20 ໂມງ ຂອງວັນທີ 7 ມີຖຸນາ 2021 ໄດ້ລົງກວດກາ ແລະ ກັກຕົວເປົ້າໝາຍເສບຢາເສບຕິດໄດ້ໜຶ່ງຄົນຊື່ທ້າວ ອອນ, ອາຍຸ 21 ປີ, ປະຊາຊົນ, ບ້ານນາຍາງ ເມືອງນາຊາຍທອງ ນວ ຜ່ານການກວດຄົ້ນຜູ້ກ່ຽວໄດ້ພົບເຫັນອາວຸດເສິກມີ: 1. ລູກປືນ AK ຈຳນວນ 14 ລູກ; 2. ລູກປືນ 50ມມ 2 ລູກ; 3. ປືນຍິງລູກຕະກົ່ວ 1 ກະບອກ; 4. ປືນແກັບ 2 ກະບອກ; 5. ເລົາປືນແກັບ 19 ເລົາ; 6. ບັ້ງປືນ AK 1 ບັ້ງ; 7. ລົດຈັກຍີ່ຫໍ້ HONDA MSX ສີດຳ 1 ຄັນ; 8. ລົດຈັກຍີ່ຫໍ້ HONDA TEANA ສີດຳ 1 ຄັນ; 9. ຕູ້ຈອດເຫຼັກ 1 ໜ່ວຍ ແລະ 10. ອຸປະກອນສ້ອມແປງປືນຈຳນວນໜຶ່ງ.
ຜ່ານການສອບສວນຜູ້ກ່ຽວຮັບສາລະພາບວ່າ: ເລີ່ມເສບຢາມາແຕ່ປີ 2015 ມາຮອດປີ 2020 ໄດ້ເລີ່ມຊື້ຫຼາຍຂຶ້ນມື້ລະ 2-3 ຄັ້ງ, ຄັ້ງລະ 15ເມັດ, ນຳມາເສບ ແລະ ຂາຍໃຫ້ຊາວໜຸ່ມຢູ່ພາຍໃນບ້ານ, ພ້ອມດຽວກັນກໍໄດ້ຮັບສ້ອມແປງປືນ, ລູກແມັກ ແລະ ປືນແກັບ ເຊິ່ງເລີ່ມເຮັດແຕ່ເດືອນມີນາ 2021 ເປັນຕົ້ນມາ.
ການຊື້-ຂາຍ ແລະ ມົ້ວສຸມຢາເສບຕິດເປັນປັນຫາອັນຕະລາຍຕໍ່ສັງຄົມອັນກໍ່ໃຫ້ເກີດປະກົດການຫຍໍ້ທໍ້ປຸ້ນຈີ້, ຊີງຊັບ, ລັກຊັບ, ອາລະວາດຕີກັນ, ສ້າງຄວາມບໍ່ສະຫງົບໃຫ້ແກ່ຄອບຄົວ ໜັກໄປກວ່ານັ້ນແມ່ນກໍ່ເຫດຄາດຕະກຳ ແລະ ອື່ນໆ.

ກອງບັນຊາການ ປກສ ນະຄອນຫຼວງວຽງຈັນ ຮຽກຮ້ອງມາຍັງ ບັນດາເຈົ້າຂອງຮ້ານອິນເຕີເນັດຄາເຟ່, ຮ້ານເກມ, ຮ້ານສະນຸກເກີ ຈົ່ງຄຸ້ມຄອງກິດຈະການຂອງຕົນໃຫ້ດີ, ບໍ່ສ້າງເງື່ອນໄຂໃຫ້ເກີດການຊື້-ຂາຍ ແລະ ມົ້ວສຸມຢາເສບຕິດໃນສະຖານທີ່ກິດຈະການຂອງທ່ານ. ຂໍຄວາມຮ່ວມມືຈາກພົນລະເມືອງດີ ຖ້າຫາກຮູ້ຂໍ້ມູນຂອງການຄ້າ-ຂາຍ, ມົ້ວສຸມຢາເສບຕິດແຈ້ງຂໍ້ມູນມາໃຫ້ເຈົ້າໜ້າທີ່ບ່ອນທີ່ໃກ້ທີ່ສຸດ ຫຼື ແຈ້ງທາງເບີວອດແອັບ 02028899774