ຝ່າຍຄ້ານໃນອິສລາເອລ ຕົກລົງຕັ້ງລັດຖະບານແຫ່ງຊາດ ເນທັນຢາຮູ ອາດພາດຕົກຕຳແໜ່ງ

ພັກຝ່າຍຄ້ານຂອງອິສລາເອລ ບັນລຸຂໍ້ຕົກລົງຕັ້ງລັດຖະບານແຫ່ງຊາດ ຊຶ່ງອາດຈະເຮັດໃຫ້ທ່ານ ເບນຈາມີນ ເນທັນຢາຮູ ຕ້ອງເສຍຕຳແໜ່ງນາຍົກລັດຖິມົນຕີ ທີ່ເຂົາຄອບຄອງມາໄດ້ 12 ປີ.
ສຳນັກຂ່າວ ບີບີຊີ ລາຍງານເມື່ອວັນທີ 3 ມິຖຸນາ 2021 ນີ້ໃຫ້ຮູ້ວ່າ ທ່ານ ຢາອິ ລາພິດ ຜູ້ນຳຝ່າຍຄ້ານຈາກພັກສາຍກາງ ຢີສອາຕິດ ຂອງອີສລາເອລ ປະກາດການຈັດຕັ້ງລັດຖະບານປະສົມຮ່ວມກັບ 8 ຝ່າຍເມື່ອຄືນວັນພຸດທີ່ຜ່ານມາ ຫຼັງຈາກກຸ່ມພັກຝ່າຍຄ້ານບັນລຸຂໍ້ຕົກລົງຈັດຕັ້ງລັດຖະບານແຫ່ງຊາດໃນວັນດຽວກັນນີ້.
ພາຍໃຕ້ຂໍ້ຕົກລົງດັ່ງກ່າວ, 2 ຜູ້ນຳຂອງກຸ່ມຝ່າຍຄ້ານຄືທ່ານ ລາພິດ ແລະ ທ່ານ ນາຟຕາລີ ເບນເນັດ ຈາກພັກຝ່າຍຂວາ ຢາມິນາ ຈະຜັດປ່ຽນກັນເປັນນາຍົກລັດຖະມົນຕີ ຊຶ່ງຈະເລີ່ມຈາກທ່ານ ເບນເນັດ ຢູ່ໃນຕຳແໜ່ງຈົນເຖິງວັນທີ 27 ສິງຫາ 2023 ຈາກນັ້ນທ່ານ ລາພິດ ຈະສືບທອດຕຳແໜ່ງແທນ
ຢ່າງໃດກໍຕາມ ການຕັ້ງລັດຖະບານແຫ່ງຊາດຈຳເປັນຕ້ອງໄດ້ຜ່ານການເຫັນດີຂອງລັດຖະສະພາກ່ອນທີ່ລັດຖະບານຈະສາບານຕົນຮັບຕຳແໜ່ງໄດ້ ຊຶ່ງທ່ານ ລາພິດ ລະບຸວ່າ ໄດ້ແຈ້ງຕໍ່ປະທານາທິບໍດີ ຮູເວັນ ຣີຟລິນ ເລື່ອງຂໍ້ຕົກລົງຂອງກຸ່ມຝ່າຍຄ້ານແລ້ວ ຂະນະທີ່ທ່ານ ຣີບລິນ ກໍຮຽກຮ້ອງໃຫ້ລັດສະພາເປີດປະຊຸມໂດຍໄວທີ່ສຸດເພື່ອຈັດການອະພິປາຍ ແລະ ລົງມະຕິຢ່າງເປັນທາງການ