ອາຟຣິກາໃຕ້ກຽມຮັບມືໂຄວິດ-19 ຮອບ 3 ຍົກລະດັບມາດຕະການເຂັ້ມງວດອີກ
ວັນທີ 30 ພຶດສະພາ 2021, ປະທານາທິບໍດີ ໄຊຣິລ ຣາມາໂຟຊາ ຂອງອາຟຣິກາໃຕ້ ປະກາດຍົກລະດັບມາດຕະການເຂັ້ມງວດກຽມຮັບມືການແຜ່ລະບາດຂອງພະຍາດໂຄວິດ-19 ຮອບ 3 ຫລັງຫລາຍພື້ນທີ່ທົ່ວປະເທດເລີ່ມມີທ່າອ່ຽງພົບຜູ້ຕິດເຊື້ອໃໝ່ເພີ່ມສູງຂຶ້ນອີກ.
ມາດຕະການເຂັ້ມງວດຈະເລີ່ມມີຜົນບັງຄັບໃຊ້ນັບແຕ່ວັນທີ 31 ພຶດສະພາ, ທຸລະກິດຮ້ານອາຫານ, ຮ້ານບັນເທີງ ລວມທັງສູນອອກກຳລັງກາຍຈະປິດໃຫ້ບໍລິການກ່ອນເວລາ 22:00 ໂມງ ຕາມເວລາທ້ອງຖິ່ນ ພ້ອມທັງຂະຫຍາຍໄລຍະເວລາເຄີຟິວອອກໄປອີກ 1 ຊົ່ວໂມງເປັນ 23:00-04:00 ໂມງ ຂອງທຸກວັນ. ຂະນະທີ່ການລວມຕົວກັນເພື່ອເຮັດກິດຈະກຳທາງການເມືອງ ຫລື ສາສະໜາ ພາຍນອກອາຄານຈະຈຳກັດບໍ່ເກີນ 250 ຄົນ, ຂະນະທີ່ພາຍໃນອາຄານບໍ່ເກີນ 100 ຄົນ.
ຫລ້າສຸດ, ອາຟຣິກາໃຕ້ມີຜູ້ຕິດເຊື້ອສະສົມ 1.659;070 ຄົນ, ເສຍຊີວິດແລ້ວ 56.363 ຄົນ, ປິ່ນປົວຫາຍແລ້ວຫລາຍກວ່າ 93%, ຜູ້ຕິດເຊື້ອໃໝ່ສະເລ່ຍໃນໄລຍະ 7 ວັນຜ່ານມາມີ 3.786 ຄົນ ເພີ່ມຂຶ້ນຈາກຄ່າສະເລ່ຍ 789 ຄົນ (8 ເມສາ) ໂດຍອາຟຣິກາໃຕ້ເຄີຍມີຜູ້ຕິດເຊື້ອໃໝ່ສູງສຸດ 21.980 ຄົນພາຍໃນວັນດຽວ ເມື່ອຕົ້ນເດືອນມັງກອນຜ່ານມາໃນຊ່ວງການແຜ່ລະບາດຮອບ 2.
ທາງການອາຟຣິກາໃຕ້ສັກວັກຊີນໂຄວິດ-19 ໃຫ້ພົນລະເມືອງແລ້ວເກືອບ 9 ແສນໂດສ ມີພົນລະເມືອງປະມານ 6,4 ແສນຄົນເຂົ້າຮັບວັກຊີນແລ້ວຢ່າງໜ້ອຍ 1 ໂດສ. ຂະນະທີ່ມີພຽງ 4,8 ແສນຄົນ ຫລື 0,8% ຂອງປະຊາກອນທົ່ວປະເທດປະມານ 60 ລ້ານຄົນເທົ່ານັ້ນ. ເບື້ອງຕົ້ນ ທາງການຍັງບໍ່ໄດ້ຮັບວັກຊີນທີ່ສັ່ງຊື້ໄປ ເຖິງວ່າຈະຈ່າຍເງິນໃຫ້ພຽງພໍຕໍ່ປະຊາກອນປະມານ 2 ໃນ 3 ເພື່ອສ້າງພູມຕ້ານທານກຸ່ມແລ້ວກໍຕາມ. ປັດຈຸບັນຈຶ່ງເລັ່ງພັດທະນາການຜະລິດ ແລະ ທົດລອງວັກຊີນໂຄວິດ-19 ເອງພາຍໃນປະເທດ ເພື່ອໃຫ້ມີວັກຊີນພຽງພໍຕໍ່ຄວາມຕ້ອງການ ໂດຍບໍ່ອີງຢູ່ກັບວັກຊີນຂອງຕ່າງປະເທດພຽງຢ່າງດຽວ.
ອ້າງອີງ:
- https://www.aljazeera.com/news/2021/5/30/south-africa-faces-third-covid-wave-returns-to-stricter-lockdown
- https://ourworldindata.org/covid-vaccinations?country=
- https://www.iol.co.za/news/politics/ramaphosa-announces-immediate-move-to-lockdown-level-2-b22a4953-9fbc-4858-8d91-bfc70f154a1e
