ຈີນລົງນາມສັນຍາຊື້ສິນຄ້າກະສິກຳຈາກລາວ 9 ລາຍການມູນຄ່າ 1,5 ຕື້ໂດລາສະຫະລັດ

ວັນທີ 28 ພຶດສະພາ ຜ່ານມາ ທີ່ກະຊວງອຸດສາຫະກຳ ແລະ ການຄ້າ (ກະຊວງ ອຄ); ຮ່ວມກັບເອກະຊົນ ຂອງລາວ ແລະ ບໍລິສັດ ລັດວິສາຫະກິດ ສະບຽງ ອາຫານ ຈີນ ສາຂາ ເມືອງ ເຈີງໂຈ ແຂວງເຫີໜານ ສປ ຈີນ ໄດ້ລົງນາມບົດບັນທຶກ ແບບທາງໄກ ເພື່ອຮ່ວມມື ໃນການຈັດຊື້ສິນຄ້າກະສິກຳປຸງແຕ່ງຈາກ ສປປ ລາວ ສົ່ງໄປ ສປ ຈີນ ໂດຍມີ ທ່ານ ຄຳແພງ ໄຊສົມແພງ ລັດຖະມົນຕີ ກະຊວງ ອຄ ແລະ ທ່ານ ເພັດ ພົມພິພັກ ລັດຖະມົນຕີ ກະ ຊວງກະສິກຳ ແລະ ປ່າ ໄມ້ (ກະຊວງ ກປ) .
ການຮ່ວມມືຄັ້ງນີ້ກໍເພື່ອຈັດຊື້ສິນຄ້າກະສິກຳປຸງແຕ່ງ ຈາກ ສປປ ລາວ ສົ່ງໄປ ສປ ຈີນ 9 ລາຍການໃຫຍ່ ລວມມູນຄ່າການສົ່ງອອກ 1,5 ຕື້ໂດລາ ພາຍອີກ 5 ປີ ຕໍ່ໜ້າ. ແມ່ນຈະເລີ່ມສົ່ງອອກ ຊຶ່ງການຮ່ວມມືດັ່ງກ່າວຈະເປັນໂຄງການ ທີ່ຈະສ້າງອາຊີບໃຫ້ແກ່ປະຊາຊົນລາວຫຼາຍແສນຄອບຄົວ ເຮັດໃຫ້ຊີວິດການເປັນຢູ່ຂອງປະຊາຊົນລາວດີຂຶ້ນ.
ສິນຄ້າທີ່ຈະສົ່ງປຂາຍໃນ ສປ ຈີນ ແມ່ນກວມເອົາສິນຄ້າກະສິກຳປຸງແຕ່ງ 9 ລາຍການໃຫຍ່ ຄື: ຖົ່ວດິນ 1 ແສນໂຕນ, ແປ້ງມັນຕົ້ນ 1 ແສນໂຕນ, ຊີ້ນງົວແຊ່ແຂງ 1 ແສນໂຕນ, ໝາກມ່ວງຫິມະພານ 2 ແສນໂຕນ, ໝາກມ່ວງ 1 ແສນໂຕນ, ຖຸລຽນ 5 ໝື່ນໂຕນ, ຖົ່ວເຫຼືອງ 2 ແສນໂຕນ, ກ້ວຍ 1 ແສນໂຕນ ແລະ ນ້ຳຕານ 5 ແສນໂຕນ.
ທ່ານ ລັດຖະມົນຕີ ກະຊວງ ອຄ ໄດ້ກ່າວວ່າ: ລາວ-ຈີນ ໄດ້ສຳເລັດການເຊັນສັນຍາຊື້-ຂາຍເຂົ້າ 20 ພັນໂຕນ ແລະ ສືບຕໍ່ສົ່ງອອກ ເຂົ້າ 50 ພັນໂຕນ ໃນອະນາຄົດ ໃນຄັ້ງນີ້ເປັນອີກສິ່ງໜຶ່ງທີ່ມີຄວາມໝາຍສຳຄັນ ເປັນໂອກາດ ທີ່ເປີດຊ່ອງທາງສ້າງມູນຄ່າການຄ້າທັງສອງປະເທດ ເຊິ່ງໄດ້ສຳເລັດອະນຸສັນຍາສອງຝ່າຍ ຊຶ່ງສາມາດສົ່ງອອກພືດ ແລະ ຜະລິດຕະພັນພືດ ໄປ ສປ ຈີນ ມີ 7 ຊະນິດພືດຄື: ສາລີ, ມັນຕົ້ນ, ກ້ວຍ, ເຂົ້າສານ, ໝາກໂມ, ມັນດ້າງ, ພືດຕະກູນຖົ່ວ; ນອກນີ້, ມີ ງົວ ອີກ. ກະຊວງ ກປ, ຍັງສຳເລັດການຮ່າງອະນຸສັນຍາ ເພື່ອລໍຖ້າເຊັນລົງນາມ ໃນການສົ່ງໄປພືດ ແລະ ຜະລິດຕະພັນພືດ ສປ ຈີນ ອີກ 6 ຊະນິດພືດ ເຊັ່ນ: ໝາກຜຸ, ໝາກກ້ຽງ, ໝາກນາວ, ໝາກໜ໊ອດ, ພືດເປັນຢາ, ໃບໝາກຕູມແຫ້ງ ຊຶ່ງແຕ່ນີ້ຮອດປີ 2025 ແມ່ນຈະສືບຕໍ່ເຈລະຈາທາງດ້ານເຕັກນິກເປີດຕະຫຼາດກັບ ສປ ຈີນ ຫຼາຍກວ່າ 90 ລາຍການ ຖືວ່າເປັນຄວາມສຳເລັດທີ່ດີມຫ້ແກ່ການຮ່ວມມືທັງສອງຝ່າຍ.