ແພດຕົກໃຈພົບຄອນແທກເລນ 27 ອັນ ໃນຕາຄົນເຈັບຊາວອັງກິດ
ໝໍຜ່າຕັດຢູ່ອັງກິດຕົກໃຈຫລັງພົບຄອນແທກເລນ 27 ອັນຕົກຄ້າງຢູ່ໃນໜ່ວຍຕາຂອງຄົນເຈັບລະຫວ່າງເຂົ້າຮັບການຜ່າຕັດໜ່ວຍຕາໃນທ້າຍປີຜ່ານມາ.
ສຳນັກຂ່າວຊິນຮົວຂອງທາງການຈີນລາຍງານໂດຍອ້າງບົດຄວາມທີ່ມີການເຜີຍແຜ່ໃນວາລະສານການແພດຂອງອັງກິດ ໃນຕົ້ນເດືອນກໍລະກົດ ລະບຸວ່າ: ຜູ້ຍິງຄົນອັງກິດ ອາຍຸ 67 ປີ ຄົນໜຶ່ງເຂົ້າຮັບການປິ່ນປົວໜ່ວຍຕາຢູ່ໂຮງໝໍແຫ່ງໜຶ່ງ ເນື່ອງຈາກຮູ້ສຶກວ່າສາຍຕາຂອງຕົນເອງຜິດປົກກະຕິ ແລະ ມີອາການເຄືອງບໍລິເວນໜ່ວຍຕາ, ທຳອິດລາວສັນນິຖານວ່າ: ສາເຫດອາດຈະມາຈາກລາວມີອາຍຸຫລາຍຂຶ້ນ ເຮັດໃຫ້ສາຍຕາໃນການເບິ່ງເຫັນຫລຸດລົງ.
ທີມໝໍຜ່າຕັດໄດ້ນັດໃຫ້ລາວເຂົ້າຮັບການຜ່າຕັດອາການຕາຕໍ້ໃນເດືອນພະຈິກປີຜ່ານມາ, ແຕ່ຂະນະທີ່ກຳລັງຈະສັກຢາຊາໃຫ້ແກ່ຄົນເຈັບ ແພດສັງເກດເຫັນກ້ອນວັດຖຸສີຟ້າບໍລິເວນເປືອກຕາເທິງເບື້ອງຂວາ ກ່ອນຈະກວດສອບ ແລະ ພົບວ່າເປັນຄອນແທກເລນທີ່ຕົກຄ້າງຢູ່ໃນໜ່ວຍຕາຈຳນວນທັງໝົດ 27 ອັນ. ລາຍງານລະບຸວ່າ: ກ່ອນໜ້ານີ້ ຄົນເຈັບບໍ່ໄດ້ສົງໄສວ່າມີສິ່ງຕົກຄ້າງຢູ່ພາຍໃນໜ່ວຍຕາ ຈົນເຮັດໃຫ້ເກີດອາການຜິດປົກກະຕິ.
ທັງນີ້, ຍັງບໍ່ແນ່ນອນວ່າ: ຄອນແທກເລນ 27 ອັນຕົກຄ້າງຢູ່ພາຍໃນໜ່ວຍຕາຂອງຄົນເຈັບມາເປັນໄລຍະເວລາດົນເທົ່າໃດ, ແຕ່ຄົນເຈັບຍອມຮັບວ່າ: ລາວໃຊ້ຄອນແທກເລນແບບລາຍເດືອນມາເປັນໄລຍະເວລາ 35 ປີ, ບາງເທື່ອລາວພະຍາຍາມຈະຖອດຄອນແທກເລນອອກຈາກຕາເບື້ອງຂວາ ແຕ່ພັດຫາບໍ່ເຫັນ ລາວເລີຍຄິດວ່າມັນອາດຈະຫລຸດອອກມາແລ້ວ.
