ໄຟຟ້າລາວຈະຂາດທຶນ 6 ຕື້ກວ່າກີບຕໍ່ເດືອນສະເພາະການປະຕິບັດນະໂຍບາຍຫລຸດຄ່າໄຟຟ້າ 3%

ທ່ານ ຈັນທະບູນ ສຸກອາລຸນ ຜູ້ອຳນວຍການ ລັດວິສາຫະກິດ ໄຟຟ້າລາວ ໃຫ້ສໍາພາດຕໍ່ວິທະຍຸກະຈາຍແຫ່ງຊາດ ວັນທີ 28 ພຶດສະພາ 2021 ນີ້ວ່າ: ການຫລຸດຄ່າກະແສໄຟຟ້າ ພາກທີ່ຢູ່ອາໄສ 3% ຖືເປັນການປະກອບສ່ວນ ເພື່ອຊ່ວຍຫລຸດຜ່ອນຜົນກະທົບຈາກການລະບາດຂອງພະຍາດໂຄວິດ-19 ຮອບທີ 2 ທີ່ເກີດຂຶ້ນຢູ່ລາວໃນປັດຈຸບັນນີ້ ໂດຍປະຕິບັດເປັນເວລາ 3 ເດືອນ ຄື: ເດືອນພຶດສະພາ ຫາ ເດືອນກໍລະກົດ 2021 ເຊິ່ງລັດວິສາຫະກິດໄຟຟ້າລາວ ມີຄວາມສາມາດຫລຸດໄດ້ເທົ່ານີ້ ເພາະຍັງມີໜີ້ສິນທີ່ຕ້ອງຈ່າຍຈຳນວນຫລາຍ. ສະເພາະການປະຕິບັດນະໂຍບາຍຫລຸດຄ່າກະແສໄຟຟ້າດັ່ງກ່າວນີ້ ຈະເຮັດໃຫ້ລັດວິສາຫະກິດໄຟຟ້າລາວຂາດທຶນເດືອນລະ 6 ຕື້ກວ່າກີບ ໂດຍບໍ່ໄດ້ລວມການຂາດທຶນອື່ນໆທີ່ມີຢູ່ແລ້ວ.
ຜູ້ອຳນວຍການ ລັດວິສາຫະກິດ ໄຟຟ້າລາວ ກ່າວຕື່ມວ່າ: ການຫລຸດຄ່າກະແສໄຟຟ້າຄັ້ງນີ້ ເຖິງວ່າບໍ່ຫລາຍ ແລະ ບໍ່ຖືກໃຈຂອງຫລາຍຄົນ ແຕ່ຖືເປັນການປະກອບສ່ວນສໍາຄັນຂອງລັດວິສາຫະກິດໄຟຟ້າລາວທີ່ມີຕໍ່ປະຊາຊົນ ກໍຄື ຜູ້ຊົມໃຊ້ກະແສໄຟ ຟ້າໃນລາວທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ໃນທ່າມ ກາງສະພາບທີ່ລັດວິສາຫະກິດໄຟຟ້າລາວມີໜີ້ສິນທີ່ຕ້ອງຈ່າຍເປັນຈໍານວນຫລາຍ.