ນັກວິໄຈເຢຍລະມັນພົບວິທີແກ້ໄຂບັນຫາເລືອດແຂງຕົວ ຈາກວັກຊີນ “ແອສຕຣາເຊເນກາ-ຈອນສອນ ແອນ ຈອນສັນ”

ທີມນັກວິໄຈໃນເຢຍລະມັນເປີດເຜີຍການຄົ້ນພົບວິທີແກ້ບັນຫາຜົນຂ້າງຄຽງຈາກວັກຊີນໂຄວິດ-19 ຂອງແອສຕຣາເຊເນກາ ແລະ ຈອນສັນ ແອນ ສັນຈອນ ຫວັງເປັນກຸນແຈຢັບຢັ້ງອາການເລືອດແຂງຕົວຫລັງສັກວັກຊີນ 2 ຊະນິດນີ້.

ວັນທີ 27 ພຶດສະພາ 2021, ເວັບໄຊ The Guardian ລາຍງານວ່າ: ທີມນັກວິທະຍາສາດຈາກປະເທດເຢຍລະມັນ ນຳໂດຍສາສະດາຈານ ຣອບ ມາຊາເລກ ຈາກມະຫາວິທະຍາໄລເກີເທີ ແຫ່ງແຟຣງເຟີດ ປະກາດພົບວິທີແກ້ບັນຫາຜົນຂ້າງຄຽງເລືອດແຂງຕົວ ທີ່ພົບຈາກການໃຊ້ວັກຊີນໂຄວິດ-19 ຂອງບໍລິສັດແອສຕຣາເຊເນກາ (AstraZeneca) ແລະ ວັກຊີນຈາກບໍລິສັດຈອນສັນ ແອນ ຈອນສັນ (Johnson & Johnson).

ທີມນັກວິທະຍາສາດຈາກເຢຍລະມັນລະບຸວ່າ: ບັນຫາຜົນຂ້າງຄຽງເລືອດແຂງຕົວທີ່ພົບຈາກການໃຊ້ວັກຊີນ 2 ຊະນິດດັ່ງກ່າວ ເປັນຜົນມາຈາກການພັດທະນາວັກຊີນທີ່ໃຊ້ເຕັກໂນໂລຊີອະດິໂນໄວຣັສ (adenovirus) ຄືການໃຊ້ໄວຣັສໄຂ້ຫວັດທຳມະດາເປັນພາຫະ ເຊິ່ງແຕກຕ່າງຈາກການໃຊ້ເຊື້ອຕາຍແບບວັກຊີນຊິໂນແວກ (Sinovac) ຫລື ເຕັກໂນໂລຊີ mRNA ທີ່ພັດທະນາໃນລະດັບລະຫັດພັນທຸກຳໃນວັກຊີນຂອງໄຟເຊີ (Pfizer) ແລະ ໂມເດິນາ (Moderna).

ການວິໄຈນີ້ລະບຸວ່າ: ວັກຊີນແອສຕຣາເຊເນກາ ແລະ ຈອນສັນ ແອນ ຈອນສັນ ທີ່ໃຊ້ໄວຣັສເປັນພາຫະ ຈະມີຂະບວນການທີ່ເຫຍື່ອຫຸ້ມໂປຣຕີນຂອງໄວຣັສພາຫະໄປເຊື່ອມຕໍ່ ຫລື ແຍກຕົວກັບນິວເຄຼຍຂອງຈຸລັງໃນຮ່າງກາຍ ເຊິ່ງຈຸດນີ້ມີທ່າອ່ຽງເຮັດໃຫ້ເກີດໂປຣຕິນກາຍພັນ ເປັນສາເຫດຕໍ່ອາການເລືອດແຂງຕົວ.

ການຄົ້ນພົບຄັ້ງນີ້ສ້າງສຽງຮືຮາເປັນວົງກວ້າງ ເພາະຖ້າເປັນໄປຕາມຜົນການວິໄຈແທ້ ຈະເປີດທາງໃຫ້ຜູ້ຜະລິດວັກຊີນທັງສອງບໍລິສັດຫາທາງແກ້ໄຂ ເພື່ອຫລຸດຄວາມສ່ຽງເກີດຜົນຂ້າງຄຽງເລືອດແຂງຕົວ ເຊິ່ງສາສະດາຈານ ມາຊາເລກ ລະບຸວ່າ: ທີມວິໄຈໄດ້ເຈລະຈາກັບບໍລິສັດຈອນສັນ ແອນ ຈອນສັນ ແລ້ວ, ແຕ່ຍັງບໍ່ເລີ່ມເຈລະຈາກັບແອສຕຣາເຊເນກາ.

ເຖິງຢ່າງໃດກໍຕາມ, ນັກວິໄຈຈຳນວນໜຶ່ງຍັງຕັ້ງຄຳຖາມເຖິງການຄົ້ນພົບຂອງທີມນັກວິທະຍາສາດເຢຍລະມັນ ໂດຍເບິ່ງວ່າເປັນພຽງການຕັ້ງສົມມຸດທີ່ຕ້ອງມີການກວດສອບຢ່າງລະອຽດຫລາຍກວ່ານີ້.

ປັດຈຸບັນ ຜູ້ຊ່ຽວຊານໃນເອີຣົບຢືນຢັນກົງກັນວ່າ: ການນຳໃຊ້ວັກຊີນແອສຕຣາເຊເນກາອາດເຮັດໃຫ້ເກີດອາການເລືອດແຂງຕົວໃນອັດຕາທີ່ຕໍ່າ ໂດຍໃນອັງກິດພົບຜູ້ໄດ້ຮັບວັກຊີນແອສຕຣາເຊເນກາມີອາການເລືອດແຂງຕົວ 4 ຄົນ ຕໍ່ຜູ້ໄດ້ຮັບວັກຊີນ 1 ລ້ານຄົນ, ແຕ່ຜົນຂ້າງຄຽງດັ່ງກ່າວເຮັດໃຫ້ອັງກິດເປີດທາງໃຫ້ຜູ້ມີສິດໄດ້ຮັບວັກຊີນອາຍຸຕໍ່າກວ່າ 30 ປີ ສາມາດເລືອກວັກຊີນໂຄວິດ-19 ໄດ້ ຕາບໃດທີ່ມີວັກຊີນພຽງພໍ ແລະ ບໍ່ເຮັດໃຫ້ການໄດ້ຮັບວັກຊີນຊ້າລົງ.

ສ່ວນອີກຫລາຍປະເທດເຊັ່ນ: ເຢຍລະມັນ, ສະເປນ, ອິຕາລີ ໂຈະການນຳໃຊ້ວັກຊີນແອສຕຣາເຊເນກາກັບຄົນທີ່ມີອາຍຸຕໍ່າກວ່າ 60 ປີ ເຊັ່ນດຽວກັບຝຣັ່ງ ຫລື ອົດສະຕຣາລີ ທີ່ອອກຂໍ້ແນະນຳການນຳໃຊ້ລັກສະນະດຽວກັນ ເພື່ອເປັນການປອດໄພໄວ້ກ່ອນ.

ຂະນະທີ່ວັກຊີນຈອນສັນ ແອນ ຈອນສັນ ເຊິ່ງເປັນວັກຊີນຊະນິດສັກເຂັມດຽວ ໃຊ້ເຕັກໂນໂລຊີການພັດທະນາແບບດຽວກັບວັກຊີນແອສຕຣາເຊເນກາ ພົບຜົນຂ້າງຄຽງເລືອດແຂງຕົວຈາກການໃຊ້ແທ້ໃນອາເມລິກາ ຈົນຕ້ອງໂຈະການນຳໃຊ້ຊົ່ວຄາວເປັນເວລາ 11 ວັນ ກ່ອນຈະກັບມາໃຫ້ໃຊ້ໄດ້ອີກເມື່ອທ້າຍເດືອນເມສາຜ່ານມາ.

ອ້າງອີງ:

https://www.theguardian.com/…/german-scientists-say…

https://www.bbc.com/news/health-56665517