ໄບເດນ-ປູຕິນ ນັດຫາລື 16 ມິຖຸນາ ຄາດເຈລະຈາຫລາຍບັນຫາຮ້ອນ
ຜູ້ນຳອາເມລິກາ ແລະ ຣັດເຊຍ ນັດພົບກັນວັນທີ 16 ມິຖຸນານີ້ ທ່າມກາງການເຝົ້າຕິດຕາມການພົວພັນ ອາເມລິກາ-ຣັດເຊຍ ທີ່ເຄັ່ງຕຶງເພີ່ມຂຶ້ນ ຫລັງທ່ານ ໂຈ ໄບເດນ ເປັນປະທານາທິບໍດີອາເມລິກາ.
ວັນທີ 26 ພຶດສະພາ 2021, ສຳນັກຂ່າວຣອຍເຕີ ລາຍງານອ້າງຄຳຢືນຢັນຈາກລັດຖະບານອາເມລິກາ ແລະ ລັດຖະບານຣັດເຊຍວ່າ: ທ່ານ ໂຈ ໄບເດນ ປະທານາທິບໍດີອາເມລິກາ ແລະ ທ່ານ ວະລາດິເມຍ ປູຕິນ ປະທານາທິບໍດີຣັດເຊຍ ຈະປະຊຸມຮ່ວມກັນໃນວັນທີ 16 ມິຖຸນານີ້ ທີ່ນະຄອນເຈນີວາຂອງສະວິດ.
ຖະແຫລງການຈາກທັງສອງລັດຖະບານຍັງໃຫ້ເຫດຜົນຄ້າຍຄືກັນວ່າ: ການພົບກັນຂອງຜູ້ນຳທັງສອງທ່ານມີເປົ້າໝາຍເພື່ອຟື້ນການພົວພັນລະຫວ່າງ ອາເມລິກາ ກັບ ຣັດເຊຍ ໃຫ້ມີສະຖຽນລະພາບ ໂດຍຖະແຫລງການຂອງຣັດເຊຍລະບຸຕື່ມວ່າ: ກອງປະຊຸມຄັ້ງນີ້ຈະຫາລືເຖິງບັນຫາຕໍ່ການສ້າງສະຖຽນລະພາບລະຫວ່າງສອງປະເທດ ລວມທັງບັນຫາລະຫວ່າງປະເທດອື່ນໆ ແລະ ການແກ້ໄຂພະຍາດໂຄວິດ-19.
ການພົບກັນລະຫວ່າງຜູ້ນຳອາເມລິກາກັບຣັດເຊຍ ຈະຖືເປັນການເດີນທາງຕ່າງປະເທດຄັ້ງທຳອິດຂອງທ່ານ ໂຈ ໄບເດນ ໃນຖານະປະທານາທິບໍດີອາເມລິກາ ແລະ ເປັນຄັ້ງທຳອິດໃນຮອບເກືອບ 3 ປີທີ່ຜູ້ນຳສອງປະເທດໄດ້ພົບກັນ ຫລັງຈາກຄັ້ງຫລ້າສຸດເມື່ອປີ 2018 ລະຫວ່າງທ່ານ ປູຕິນ ກັບອະດີດປະທານາທິບໍດີ ໂດນັລ ທຣຳ.
ນັກວິເຄາະປະເມີນວ່າ: ການພົບກັນໃນຄັ້ງນີ້ຈະແຕກຕ່າງກັບຄັ້ງກ່ອນຢ່າງຊັດເຈນ ເນື່ອງຈາກທ່າທີຂອງອະດີດປະທານາທິບໍດີ ທຣຳ ເປັນມິດກັບຣັດເຊຍຫລາຍກວ່າ ໂດຍຫລາຍຝ່າຍຕິດຕາມທ່າທີຂອງທ່ານ ໄບເດນ ວ່າຈະສະແດງຄວາມເຫັນແນວໃດຕໍ່ໜ້າຜູ້ນຳຣັດເຊຍ ຫລັງຈາກຜ່ານມາຖືກເບິ່ງວ່າ: ປະທານາທິບໍດີ ໄບເດນ ມີທ່າທີແຂງກະດ້າງຕໍ່ປະທານາທິບໍດີ ປູຕິນ ຜ່ານການຮຽກຮ້ອງໃຫ້ຣັດເຊຍຢຸດແຊກແຊງການເລືອກຕັ້ງອາເມລິກາ ແລະ ກ່າວຫາວ່າຣັດເຊຍຢູ່ເບື້ອງຫລັງການໂຈມຕີໄຊເບີໃນອາເມລິກາ.
ນອກຈາກນີ້ ຜູ້ນຳອາເມລິກາຍັງອາດຍົກເອົາບັນຫາໄຄຣເມຍ ເຊິ່ງອາເມລິກາເບິ່ງວ່າ: ຣັດເຊຍຮຸກຮານອະທິປະໄຕຂອງຢູເຄຣນ ແລະ ການຈັບກຸມທ່ານ ອາເລັກເຊ ນາວາລນີ ຜູ້ນຳຝ່າຍຄ້ານຂອງຣັດເຊຍ ເຊິ່ງຜູ້ນຳຣັດເຊຍອາດຈະມີທ່າທີຕອບໂຕ້ກັບໃນທັງສອງບັນຫານີ້.
ອ້າງອີງ:
https://www.channelnewsasia.com/…/biden-putin-to-meet…
https://edition.cnn.com/…/biden-putin-summit…/index.html
