WHO ເຜີຍ ພົບຜູ້ຕິດໂຄວິດ-19 ກາຍພັນ ສາຍພັນ B.1.617 ແລ້ວຢ່າງໜ້ອຍ 53 ປະເທດ
ວັນທີ 26 ພຶດສະພາ 2021, ອົງການອະນາໄມໂລກ (WHO) ລາຍງານວ່າ: ພົບຜູ້ຕິດໂຄວິດ-19 ກາຍພັນ ສາຍພັນ B.1.617 ແລ້ວຢ່າງໜ້ອຍ 53 ປະເທດ ທັງຍັງໄດ້ຮັບລາຍງານການພົບຜູ້ຕິດເຊື້ອຢ່າງບໍ່ເປັນທາງການໃນອີກ 7 ປະເທດ, ພົບປະເທດທີ່ມີຜູ້ຕິດເຊື້ອລວມແລ້ວຢ່າງໜ້ອຍ 60 ແຫ່ງ ໂດຍເຊື້ອກາຍພັນນີ້ແບ່ງອອກເປັນອີກ 3 ສາຍພັນຍ່ອຍ ສາຍພັນທີ່ກວດພົບຫລາຍທີ່ສຸດຄື B.1.617.2 ພົບແລ້ວ 54 ປະເທດ.
ຈາກການຕິດຕາມສະຖານະການການແຜ່ລະບາດຂອງເຊື້ອໂຄວິດ-19 ກາຍພັນໂດຍ Gisaid ຊີ້ວ່າ: ພົບຜູ້ຕິດໂຄວິດ-19 ກາຍພັນ ສາຍພັນ B.1.617 ຫລາຍທີ່ສຸດຢູ່ອັງກິດ 7.331 ຄົນ, ຮອງລົງມາແມ່ນອິນເດຍ 3.203 ຄົນ ແລະ ອາເມລິກາ 1.274 ຄົນ ໂດຍຜົນການສຶກສາເບື້ອງຕົ້ນລະບຸວ່າ: ສາມາດແຜ່ກະຈາຍເຊື້ອໄດ້ງ່າຍຍິ່ງຂຶ້ນ, ແອນຕິບໍດີກວດຈັບ ແລະ ຕ້ານເຊື້ອໄວຣັສໄດ້ຍາກຍິ່ງຂຶ້ນກວ່າເຊື້ອໄວຣັສສາຍພັນດັ້ງເດີມ. ອີກທັງ WHO ຍັງໄດ້ຈຳແນກໃຫ້ ສາຍພັນ B.1.617 ຢູ່ໃນປະເພດໄວຣັສກາຍພັນທີ່ໜ້າກັງວົນລະດັບໂລກ (A Variant of Global Concem).
ນອກຈາກນີ້ ລາຍງານຍັງຄາດກະອີກວ່າ: ໄວຣັສຈະຍັງວິວັດທະນາການ ແລະ ກາຍພັນຕໍ່ໄປ, ການຫລຸດໂອກາດແຜ່ກະຈາຍເຊື້ອຜ່ານມາດຕະການປ້ອງກັນ ແລະ ຄວບຄຸມພະຍາດຕ່າງໆ ຍັງເປັນວິທີສຳຄັນເພື່ອຫລຸດໂອກາດໃນການກາຍພັນທີ່ອາດສ້າງຊ່ອງຫວ່າງໃຫ້ລະບົບສາທາລະນະສຸກໂລກໄດ້. ປັດຈຸບັນ ຜູ້ຜະລິດ ແລະ ພັດທະນາວັກຊີນຕ້ານໂຄວິດ-19 ຕ່າງພະຍາຍາມສຶກສາ ແລະ ທົດລອງວັກຊີນໃຫ້ມີປະສິດທິພາບ ແລະ ຄວາມປອດໄພພຽງພໍໃນການຕ້ານໂຄວິດ-19 ກາຍພັນເຫລົ່ານີ້.
ອ້າງອີງ:
- https://www.aljazeera.com/news/2021/5/26/covid-strain-first-detected-in-india-found-in-53-territories-who
- https://www.gisaid.org/
- https://www.macleans.ca/news/what-we-know-about-the-covid-variant-first-found-in-india/
