ການພົບປະຄັ້ງປະຖົມມະລືກລະຫວ່າງ ປູຕິນ ແລະ ໄບເດັນ ຈະມີຂຶ້ນຢູ່ທີ່ ຈີເນວາ.

ສຳນັກຂ່າວ ອາທີ ລາຍງານເມື່ອວັນທີ 25 ພຶດສະພານີ້ວ່າ ຜູ້ນໍາສອງປະເທດລັດເຊຍ ແລະ ສະຫະລັດ ມີແຜນຈະພົບປະກັນຄັ້ງປະຖົມມະລືກ ຫຼື ການພົບປະກັນຄັ້ງສຸດຍອດຢູ່ທີ່ ຈີເນວາ ປະເທດ ສະວິດ ເຊີແລນ ໃນວັນທີ 16 ມີຖຸນາທີ່ຈະມາເຖິງນີ້.

ສຳນັກຂ່າວສານຂອງລັດເຊຍກໍຢືນຢັນເຊັ່ນດຽວກັນວ່າ ປະທານາທິບໍດີ ວະລາດີເມຍ ປູຕິນ ແລະ ຄູ່ຮ່ວມຕໍາແໜ່ງຂອງສະຫະລັດ ອາເມລິກາ ທ່ານ ໂຈໄບເດັນ ຈະຈັດກອງປະຊຸມສຸດຍອດລະຫວ່າງສອງຝ່າຍຢູ່ທີ່ ຈີເນວາ.

ເຖິງແມ່ນວ່າຄັ້ງນີ້ ຈະບໍ່ແມ່ນຄັ້ງທຳອິດທີ່ທັງສອງຄົນພົບກັນກໍຕາມ, ແຕ່ການພົບປະກັນໃນຄັ້ງທີ່ຜ່ານໆ ມານັ້ນບໍ່ແມ່ນໃນຖານະທີ່ທ່ານ ໄບເດັນ ເປັນປະທານາທິບໍດີ ຂອງສະຫະລັດ.

ສຳນັກຂ່າວ ອາທີ ໃຫ້ຮູ້ວ່າ ຜູ້ນ້ຳທັງສອງຄົນນີ້ໄດ້ມີການພົບປະກັນຫຼາຍຄັ້ງແລ້ວ ໃນໄລຍະທີ່ຜ່ານມາ ເພື່ອປຶກສາຫາລືກ່ຽວກັບການພົວພັນລະຫວ່າງສອງປະເທດ ໃນຂະນະທີ່ສາຍພົວພັນຂອງສອງປະເທດຢູ່ໃນຈຸດຕໍ່າສຸດ ໃນຫຼາຍທົດສະວັດທີ່ຜ່ານມາ.