ສູນກາງກຳມະບານລາວເປີດສາຍດ່ວນ 1512

ສູນກາງສະຫະພັນກຳມະບານລາວໄດ້ເປີດໂທລະສັບສາຍດ່ວນ 1512 ແລະ ສື່ສັງຄົມອອນລາຍທາງເຟສບຸກ (Facebook) ເພື່ອໃຫ້ຄຳປືກສາແກ່ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານ.

ພິທີຖະແຫລງຂ່າວເປີດສາຍດ່ວນດັ່ງກ່າວມີຂຶ້ນໃນວັນທີ 17 ກໍລະກົດນີ້, ໂດຍທ່ານ ສີມູນ ອຸ່ນລາສີ ຮອງປະທານສູນກາງສະຫະພັນກຳມະບານລາວ ວ່າ: ການເປີດສາຍດ່ວນ ກໍເພື່ອໃຫ້ມີຄວາມສະດວກ, ວ່ອງໄວ ແລະ ທັນສະໄໝ ແທດເໝາະກັບຍຸກການສື່ສານທີ່ບໍ່ມີພົມແດນໃຫ້ແກ່ສະມາຊິກກຳມະບານລາວ, ກຳມະກອນລາວ ແລະ ຊາວຜູ້ອອກແຮງງານໃນທົ່ວປະເທດ ໄດ້ເຂົ້າເຖິງວຽກງານກຳມະບານ, ວຽກງານແຮງງານ, ສາຍພົວພັນແຮງງານທີ່ດີ ເພື່ອຕອບຂໍ້ຂ້ອງໃຈ, ໃຫ້ຄຳແນະນຳທີ່ຖືກຕ້ອງ ແລະ ໃຫ້ການຊ່ວຍເຫລືອໂດຍສອດຄ່ອງກັບໝົດໝາຍແຫ່ງລັດຂອງ ສປປ ລາວ ເປັນຕົ້ນ: ກົດໝາຍແຮງງານ, ກົດໝາຍກຳມະບານລາວ, ກົດໝາຍປະກັນສັງຄົມ, ກົດໝາຍຕ້ານການຄ້າມະນຸດ ແລະ ບັນດານິຕິກຳຕ່າງໆທີ່ກ່ຽວຂ້ອງກັບການປົກປ້ອງສິດ, ຜົນປະໂຫຍດອັນຊອບທຳຂອງສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານ.

ທ່ານຮອງປະທານສູນກາງກໍາມະບານ ກ່າວວ່າ: ສາຍດ່ວນ 1512 ແມ່ນມີຄວາມໝາຍມາຈາກ 15 ໝາຍເຖິງວັນສ້າງຕັ້ງວັນກຳມະກອນສາກົນ (ວັນທີ 1 ພຶດສະພາ) ແລະ 12 ໝາຍເຖິງວັນສ້າງຕັ້ງອົງການກຳມະບານລາວ (ວັນທີ 1 ກຸມພາ), ເຊິ່ງສາມາດໂທເຂົ້າໄດ້ທຸກເຄືອຄ່າຍຂອງລະບົບໂທລະສັບໂດຍບໍ່ເສຍຄ່າແຕ່ວັນຈັນ-ສຸກ ນັບແຕ່ເວລາ 8:00-16:00. ພ້ອມນີ້ສາມາດເບິ່ງຂໍ້ມູນ, ມີຄຳເຫັນ ຫລື ຕັ້ງຄຳຖາມເພື່ອສອບຖາມກ່ຽວກັບວຽກງານດ້ານແຮງງານ ແລະ ກຳມະບານຜ່ານທາງ  Facebook ຂອງສູນກາງສະຫະພັນກຳມະບານລາວ ຕະຫລອດ 24 ຊົ່ວໂມງ, ໂດຍພິມຄຳວ່າສູນກາງສະຫະພັນກຳມະບານລາວ ເຂົ້າໃນໂປແກມ Facebook.