ອິສລາເອລ ແລະ ຮາມາສ ຕົກລົງຢຸດຍິງ ພາຍຫລັງຕໍ່ສູ້ກັນມາເປັນເວລາ 11 ວັນ
ອິສລາເອລ ກັບກຸ່ມ ຮາມາສ ອອກມາປະກາດຢຸດຍິງຊຶ່ງກັນ ແລະ ກັນແລ້ວ, ແຕ່ຍັງ ມີລາຍງານວ່າ ການໂຈມຕີໃນບໍລິເວນຊາຍແດນລະຫວ່າງທັງສອງຝ່າຍຍັງບໍ່ທັນຢຸດຕິລົງເທື່ອ.
ສຳນັກຂ່າວ ບີບີຊີ ລາຍງານເມື່ອວັນທີ 21 ພຶດສະພານີ້ວ່າ ຄະນະລັດຖະມົນຕີຄວາມໝັ້ນຄົງແຫ່ງອິສລາເອລເຫັນດີໃຫ້ມີການຢຸດຍິງກັນກັບຝ່າຍ ຮາມາສໃນເຂດກາຊາແລ້ວ ໃນຄໍ່າຄືນຂອງວັນທີ 20 ພຶດສະພາ, ພາຍຫລັງຕໍ່ສູ້ກັນມານານ 11 ວັນ. ຢ່າງໃດກໍຕາມລັດຖະບານອິສລາເອລຍັງບໍ່ທັນກຳນົດເວລາຢຸດຍິງທີ່ແນ່ນອນ.
ຖະແຫຼງການຈາກຄະນະລັດຖະມົນຕີຄວາມໝັ້ນຄົງອິສລາເອລ ລະບຸວ່າຄະນະລັດຖະມົນຕີ ມີມະຕິເປັນເອກະສັນຍອມ ຮັບປະຕິບັດຕາມຄຳແນະນຳຈາກເຈົ້າໜ້າທີ່ຄວາມໝັ້ນຄົງທຸກຝ່າຍທີ່ໃຫ້ຕອບຮັບຂໍ້ສະເໜີຈາກ ອີຢິບ ເພື່ອການຢຸດຍິງຢ່າງບໍ່ມີເງື່ອນໄຂຂອງທັງສອງຝ່າຍ ຊຶ່ງຈະມີຜົນບັງຄັບໃຊ້ຕາມມາ ໂດຍເບິ່ງຄວາມເປັນຈິງໃນພາກພື້ນວ່າຈະສານຕໍ່ການປະຕິບັດການທາງທະຫານຕໍ່ໄປຫຼືບໍ່
ການເຄື່ອນໄຫວຫຼ້າສຸດທາງຝ່າຍອິສລາເອລເກີດຂຶ້ນຫຼັງຈາກນານາຊາດນຳໂດຍອີຢິບ ແລະ ສະຫະລັດອອກມາກົດດັນຢ່າງໜັກໃຫ້ມີການຢຸດຍິງກັບກຸ່ມຕິດອາວຸດປາແລສຕິນຫຼັງການຕໍ່ສູ້ຄັ້ງໃໝ່ຊຶ່ງເລີ່ມຂຶ້ນຕັ້ງແຕ່ວັນທີ 10 ພຶດສະພາ ເຮັດໃຫ້ມີຜູ້ເສຍຊີວິດໃນເຂດດາຊາເຖີງ 232 ສົບ. ສ່ວນຝ່າຍອີສລາເອລ ມີຜູ້ເສຍຊິວິດ 12 ສົບ.
