ຢູ່ລາວມີພຽງ1 ສູນ ແລະ 19 ບໍລິສັດຈັດຫາງານຖືກກົດໝາຍ.

ກະຊວງແຮງງານ ແລະ ສະຫວັດດີການສັງຄົມ ໃຫ້ຮູ້ວ່າ: ປັດຈຸບັນມີພຽງ 1 ສູນ ແລະ 19 ບໍລິສັດຈັດຫາງານທີ່ຖືກຕ້ອງຕາມລະບຽບກົດໝາຍຄື: ສູນບໍລິການຈັດຫາງານ, ບໍລິສັດ ສົ່ງເສີມແຮງງານລາວ ຈຳກັດ, ບໍລິສັດ ໄຊຍາ ຈັດຫາງານ ຈຳກັດ, ບໍລິສັດ ອິນເຕີເລເປີ ບໍລິການຈັດຫາງານ ຈຳກັດ, ບໍລິສັດ ບົວສະຫວັນ ຈັດຫາງານ ຈຳກັດ, ບໍລິສັດ ສິນໄຊ ຈັດຫາງານ ຈຳກັດ, ບໍລິສັດ ດວງພະຈັນ ບໍລິການຈັດຫາງານ ຈຳກັດ, ບໍລິສັດ ວຽງຈັນ ບໍລິການຈັດຫາງານ ຈຳກັດ, ບໍລິສັດ ເອັນພີ ບໍລິການຈັດຫາງານ ຈຳກັດ, ບໍລິສັດ ຄຳມະນີ ບໍລິການຈັດຫາງານ ຈຳກັດ, ບໍລິສັດ ເຄພີ ບໍລິການຈັດຫາງານ ແລະ ພັດທະນາສີມືແຮງງານ ຈຳກັດ, ບໍລິສັດ ຈຳປານະຄອນ ບໍລິການຈັດຫາງານ ຈຳກັດ, ບໍລິສັດ ສາມມິດ ຈັດຫາງານ ຈຳກັດ, ບໍລສັດ ໄອຈ໋ອບ ຈຳກັດ, ບໍລິສັດ ລາວ ເອເຊຍບໍລິການຈັດຫາງານ ຈຳກັດ, ບໍລິສັດ ຍົດຊະນະບໍລິການຈັດຫາງານ ຈຳກັດ, ບໍລິສັດ ສະຫວັນ ບໍລິການຈັດຫາງານ ຈຳກັດ, ບໍລິສັດ ເອັນເອັມເອັສ ລາວ ບໍລິການຈັດຫາງານ ຈຳກັດ, ບໍລິສັດ ສົມເດັດ ບໍລິການຈັດຫາງານ ຈຳກັດ, ບໍລິສັດ ສອນພະສັກ ບໍລິການຈັດຫາງານ ຈຳກັດ, ນອກນີ້ ຍັງມີ 2 ບໍລິສັດທີ່ຈັດຫາງານພາຍໃນປະເທດໂດຍສະເພາະຄື: ບໍລິສັດ ຄຳປະເສີດຮຸ່ງເຮືອງ ບໍລິການຈັດຫາງານ ພາຍໃນປະເທດຈຳກັດ ແລະ ບໍລິສັດ ໄຊຈະເລີນບໍລິການຈັດຫາງານ ພາຍໃນປະເທດ ຈຳກັດ, ເພື່ອເຮັດ ໜ້າທີ່ເປັນຜູ້ຈັດສົ່ງແຮງງານລາວໄປເຮັດວຽກຢູ່ຕ່າງປະເທດມີຄວາມວ່ອງໄວ, ປະຢັດເວລາ ແລະ ເສຍຄ່າໃຊ້ຈ່າຍໜ້ອຍ, ຊຶ່ງປັດຈຸບັນການຈັດຫາງານໄປຕ່າງປະເທດໄດ້ມີການຕັດຂັ້ນຕອນຂອງການໄປຜ່ານລາຍຊື່ຢູ່ຂັ້ນບ້ານ ແລະ ຫ້ອງການແຮງງານ ແລະ ສະຫວັດດີການສັງຄົມເມືອງອອກແລ້ວ, ມີພຽງແຕ່ໃຫ້ບໍລິສັດຈັດຫາງານແຈ້ງລາຍຊື່ຈໍານວນແຮງງານທີ່ຈະສົ່ງອອກໃຫ້ພະແນກແຮງງານ ແລະ ສະຫວັດດີການສັງຄົມແຂວງ, ແຈ້ງໃຫ້ຂັ້ນເມືອງ ແລະ ຂັ້ນບ້ານຊາບ ເພື່ອຕິດຕາມແຮງງານທີ່ຈະຖືກຈັດສົ່ງໃຫ້ຖືກຕ້ອງ.

+ ລາວ-ໄທຮ່ວມມືປັບສະຖານະພາບແຮງງານໃຫ້ຖືກຕ້ອງຕາມລະບຽບກົດໝາຍ

+ ລາວ-ໄທຫາລືການຈ້າງງານແຮງງານຕ່າງປະເທດ

ສໍາລັບຢູ່ປະເທດໄທ ຍັງໄດ້ດຳເນີນການເປີດສູນຮັບຕ້ອນແຮງງານ, ໂດຍມີບໍລິການຝຶກອົບຮົມໃຫ້ຄວາມຮູ້ກ່ຽວຂ້ອງກັບການເຮັດວຽກ ແລະ ໃຊ້ຊີວິດຢູ່ປະເທດໄທ, ການກວດກາແຮງງານກ່ອນອະນຸຍາດເດີນທາງເຂົ້າມາເຮັດວຽກ ແລະ ຂໍຮັບສິດທິຂອງແຮງງານກ່ອນກັບຄືນປະເທດຕົ້ນທາງ, ຊຶ່ງຈະຊ່ວຍປ້ອງກັນບໍ່ໃຫ້ເກີດບັນຫາການຄ້າມະນຸດ, ຖືກຫລອກຫລວງ ແລະ ລັກລອບເຮັດວຽກຢູ່ໄທແບບບໍ່ຖືກຕ້ອງຕາມລະບຽບກົດໝາຍ ແລະ ການຈັດຕັ້ງປະຕິບັດວຽກງານດັ່ງກ່າວກໍບໍ່ໄດ້ເສຍຄ່າໃຊ້ຈ່າຍໃດໆ, ໂດຍໄດ້ເລີ່ມເປີດສູນຕ້ອນຮັບແຮງງານສັນຊາດລາວເມື່ອເດືອນກັນຍາ 2016 ຜ່ານມານີ້ ແລະ ໂດຍມີຜູ້ໃຊ້ແຮງງານຈຳນວນ 7.800 ຫົວໜ່ວຍໄດ້ພາແຮງງານລາວຫລາຍກວ່າ 16 ພັນຄົນເຂົ້າຝຶກອົບຮົມແລ້ວ.