ສິງກະໂປສຶກສາຄວາມເປັນໄປໄດ້ທີ່ຈະຂະຫຍາຍໄລຍະເວລາເຂົ້າຮັບວັກຊີນໂດສທີ 2 ອອກໄປອີກ ຫລັງເນັ້ນສັກວັກຊີນໂດສທຳອິດໃຫ້ຫລາຍທີ່ສຸດກ່ອນ
ລັດຖະມົນຕີສາທາລະນະສຸກສິງກະໂປເປີດເຜີຍວ່າ: ທາງການກຳລັງສຶກສາຄວາມເປັນໄປໄດ້ທີ່ຂະຫຍາຍໄລຍະເວລາການເຂົ້າຮັບວັກຊີນຕ້ານໂຄວິດ-19 ໂດສທີ 2 ອອກໄປອີກ ຫວັງເນັ້ນສັກວັກຊີນໂດສທຳອິດໃຫ້ຫລາຍທີ່ສຸດເທົ່າທີ່ຈະເປັນໄປໄດ້ກ່ອນ. ປັດຈຸບັນ ສິງກະໂປອະນຸມັດການໃຊ້ວັກຊີນຈາກ Pfizer ແລະ Moderna ເປັນກໍລະນີສຸກເສີນແລ້ວ ໂດຍຕ້ອງສັກ 2 ໂດສ ແຕ່ລະໂດສຫ່າງກັນ 3 ແລະ 4 ອາທິດຕາມລຳດັບ.
ເບື້ອງຕົ້ນສິງກະໂປກຳລັງສຶກສາຄວາມເປັນໄປໄດ້ທີ່ຈະຂະຫຍາຍເວລາການເຂົ້າຮັບວັກຊີນໂດສທີ 2 ອອກໄປເປັນ 6-8 ອາທິດແທນ ເພື່ອໃຫ້ຊາວສິງກະໂປໄດ້ຮັບການສ້າງພູມຕ້ານທານຈາກວັກຊີນໂດສທຳອິດໃຫ້ຫລາຍທີ່ສຸດກ່ອນ ໃນຫລາຍປະເທດເຊັ່ນ: ອັງກິດ, ເດນມາກ, ນໍເວ, ຝຣັ່ງ, ການາດາ ແລະ ອາເມລິກາ ກໍດຳເນີນມາດຕະການໃນລັກສະນະນີ້ແລ້ວ ໂດຍສິງກະໂປເລີ່ມຕົ້ນສັກວັກຊີນໃຫ້ກຸ່ມສ່ຽງ ແລະ ບຸກຄະລາກອນທາງດ້ານການແພດແລ້ວ ນັບແຕ່ທ້າຍປີ 2020 ຜ່ານມາ.
ຫລ້າສຸດສິງກະໂປມີຜູ້ຕິດເຊື້ອສະສົມແລ້ວ 61.613 ຄົນ, ເສຍຊີວິດແລ້ວ 31 ຄົນ. ຂໍ້ມູນຈາກ Our Wolrd in Data ລາຍງານວ່າ: ປັດຈຸບັນທາງການສິງກະໂປເດີນໜ້າສັກວັກຊີນແລ້ວຫລາຍກວ່າ 3,2 ລ້ານໂດສ (ຮອດວັນທີ 13 ພຶດສະພາ) ມີຊາວສິງກະໂປ 1,9 ລ້ານຄົນຈາກປະຊາກອນທັງໝົດປະມານ 5,85 ລ້ານຄົນເຂົ້າຮັບວັກຊີນແລ້ວຢ່າງໜ້ອຍ 1 ໂດສ ໂດຍ 32,5% ຂອງປະຊາກອນທັງໝົດສັກວັກຊີນຄົບໂດສແລ້ວ.
ອ້າງອີງ:
- https://www.straitstimes.com/singapore/moh-studying-if-second-dose-of-covid-19-vaccine-can-be-given-later-to-give-more-people
- https://www.channelnewsasia.com/news/singapore/covid-19-vaccination-phase-2-one-dose-ong-ye-kung-singapore-14821224
- https://www.straitstimes.com/world/several-countries-delaying-second-covid-19-vaccine-dose
