ຜູ້ນຳອິສລາແອນຊີ້ ການຖະຫລົ່ມກາຊາຕໍ່ເນື່ອງ ເຮັດໃຫ້ກຸ່ມຮາມາດລ້າຫລັງໄປຫລາຍປີ ມີຜູ້ເສຍຊີວິດແລ້ວຢ່າງໜ້ອຍ 215 ຄົນ

ວັນທີ 19 ພຶດສະພາ 2021, ນາຍົກລັດຖະມົນຕີ ເບນຈາມິນ ເນທັນຢາຮູ ຂອງອິສລາແອນ ຊີ້ວ່າ: ການຖະຫລົ່ມກາຊາຢ່າງຕໍ່ເນື່ອງ ສົ່ງຜົນໃຫ້ກຸ່ມຮາມາດລ້າຫລັງໄປຫລາຍປີ. ກະຊວງສາທາລະນະສຸກກາຊາເປີດເຜີຍ ມີຜູ້ເສຍຊີວິດແລ້ວຢ່າງໜ້ອຍ 215 ຄົນ ໃນຈຳນວນນີ້ເປັນຜູ້ຍິງ ແລະ ເດັກນ້ອຍເກືອບ 100 ຄົນ, ມີຜູ້ພັດຖິ່ນແລ້ວຫລາຍກວ່າ 52.000 ຄົນ. ຂະນະທີ່ໃນອິສລາແອນມີຜູ້ເສຍຊີວິດແລ້ວ 12 ຄົນ.

ຊາວປາແລັສຕິນຈຳນວນຫລາຍໃນເຂດເວສແບງ ແລະ ເຢຣູຊາແລັມຕາເວັນອອກຕ່າງປະທ້ວງເຫດໂຈມຕີທາງອາກາດຖະຫລົ່ມເຂດກາຊາຂອງອິສລາແອນ ໃນບາງພື້ນທີ່ຂອງອິສລາແອນທີ່ມີຊາວອິສລາແອນເຊື້ອສາຍອາຣັບອາໄສຢູ່ກໍຮ່ວມປະທ້ວງໃນຄັ້ງນີ້ນຳ, ຫລາຍພື້ນທີ່ລຸກລາມກາຍເປັນເຫດປະທະກັນ ໂດຍສະເພາະບໍລິເວນປະຕູດາມັດກັດໃນເຢຣູຊາແລັມ ທີ່ກອງກຳລັງອິສລາແອນຈັບຄົນຈຳນວນຫລາຍ.

ໃນວັນທີ 18 ພຶດສະພາ, ທາງການອິສລາແອນຍອມເປີດປະຕູ Kerem Shalom ທີ່ຢູ່ຕິດກັບເຂດກາຊາ ອະນຸຍາດໃຫ້ສົ່ງການຊ່ວຍເຫລືອເຂົ້າໄປໄດ້ ເຊິ່ງອົງການສະຫະປະຊາຊາດ (UN) ເຫັນພ້ອມຕໍ່ການຕັດສິນໃຈດັ່ງກ່າວ, ແຕ່ຢາກໃຫ້ເປີດເສັ້ນທາງຫລັກ (Erez Crossing) ເພື່ອໃຫ້ເຈົ້າໜ້າທີ່ຊ່ວຍເຫລືອດ້ານມະນຸດສະທຳ ແລະ ອຸປະກອນຈຳເປັນຕ່າງໆ ສາມາດເຄື່ອນຍ້າຍເຂົ້າໄປໃນເຂດກາຊາໄດ້ໄວຂຶ້ນ.

ກ່ອນທີ່ກອງກຳລັງຕິດອາວຸດຂອງປາແລັສຕິນຈະໃຊ້ປືນຄົກຍິງລູກລະເບີດໃສ່ພື້ນທີ່ດັ່ງກ່າວ ເປັນເຫດໃຫ້ມີຄົນໄທທີ່ເຮັດວຽກຢູ່ບໍລິເວນນັ້ນເສຍຊີວິດ, ທະຫານຄົນໜຶ່ງຂອງອິສລາແອນໄດ້ຮັບບາດເຈັບເລັກໜ້ອຍ ຈຶ່ງຕັດສິນໃຈປິດເສັ້ນທາງເຊື່ອມນັ້ນອີກ, ສ່ວນທາງເຂົ້າ Rafah Crossing ທີ່ເຊື່ອມກັບອີຢິບ ເຊິ່ງເປັນທາງເຂົ້າເຂດກາຊາທາງດຽວທີ່ບໍ່ໄດ້ຖືກຄວບຄຸມໂດຍອິສລາແອນ ຈຶ່ງກາຍເປັນເສັ້ນທາງຫລັກໃນການສົ່ງການຊ່ວຍເຫລືອໃຫ້ຄົນໃນເຂດກາຊາ.

ເບື້ອງຕົ້ນ ຝຣັ່ງຮ່າງທາງອອກຂອງວິກິດຮ່ວມກັບສະພາຄວາມໝັ້ນຄົງແຫ່ງສະຫະປະຊາຊາດ ລວມທັງຜູ້ນຳອີຢິບ ແລະ ຈໍແດນ ຮຽກຮ້ອງໃຫ້ມີການຢຸດຍິງລະຫວ່າງກັນ ໂດຍອີຢິບກຳລັງພະຍາຍາມອາສາເປັນຄົນກາງໃນການເຈລະຈາລະຫວ່າງອິສລາແອນ ແລະ ກຸ່ມຮາມັດ ກຸ່ມກອງກຳລັງຕິດອາວຸດປາແລັສຕິນ, ຂະນະທີ່ທາງການອິສລາແອນປະກາດຈະເດີນໜ້າໂຈມຕີກາຊາຕໍ່ເນື່ອງ ເພື່ອທຳລາຍຄວາມສາມາດຂອງກຸ່ມຮາມາດ ແລະ ຍິຮາດອິສລາມປາແລັສຕິນ.

ຄວາມຂັດແຍ່ງຮອບໃໝ່ນີ້ມີສາເຫດມາຈາກກຸ່ມຮາມາດທີ່ຕ້ອງການໃຫ້ກອງກຳລັງຂອງອິສລາແອນອອກໄປຈາກພື້ນທີ່ສັກສິດ Haram al-Sharif ທີ່ຊາວຢິວໃນອິສລາແອນຮູ້ຈັກກັນໃນຊື່ Temple Mount ລວມທັງພື້ນທີ່ໃກ້ຄຽງຄື Sheikh Jarrah ທີ່ມີຊາວອາຣັບອາໄສຢູ່ເປັນຈຳນວນຫລາຍ ແລະ ເປັນພື້ນທີ່ທີ່ຄອບຄົວຊາວປາແລັສຕິນຖືກຂັບໄລ່ອອກຈາກຊາວອິສລາແອນທີ່ມາຕັ້ງຖິ່ນຖານໃນພື້ນທີ່ດັ່ງກ່າວ ເປັນເຫດໃຫ້ກຸ່ມຮາມາດຍິງຈະຫລວດໃສ່ ຫລັງຄຳຂາດນັ້ນຖືກເມີນເສີຍ.

ອ້າງອີງ:

https://www.bbc.com/news/world-middle-east-57161333

https://www.bbc.com/news/newsbeat-44124396

https://www.reuters.com/…/israel-gaza-violence-shows…/