ອິນເດຍສາຫັດ ! ໂຄວິດບໍ່ຫລຸດຜ່ອນ ຖືກພາຍຸໄຊໂຄນພັດຖະຫລົ່ມຊ້ຳອີກ

ຍອດຜູ້ເສຍຊີວິດຈາດພາຍຸໄຊໂຄນທີ່ພັດຖະຫລົ່ມທິດຕາເວັນຕົກຂອງອິນເດຍເພີ່ມເປັນ 12 ຄົນ ແລະ ປະຊາຊົນອີກປະມານ 150.000 ຄົນ ຕ້ອງອົບພະຍົບໄປບ່ອນປອດໄພ.

ອິດທິພົນຂອງພາຍຸໄຊໂຄນທີ່ຊື່ວ່າ: “ເຕາະແຕ” ເຮັດໃຫ້ເກີດຝົນຕົກໜັກ ແລະ ລົມພັດແຮງໃນລັດຄຸລະຊາດ ແລະ ພື້ນທີ່ທິດຕາເວັນຕົກຂອງອິນເດຍນັບແຕ່ວັນທີ 17 ພຶດສະພາ ປະຊາຊົນຈຳນວນຫລາຍຕ້ອງພົບກັບຄວາມຍາກລຳບາກຈາກສະພາບນໍ້າຖ້ວມກະທັນຫັນ, ຕົ້ນໄມ້ຫັກ, ອາຄານບ້ານເຮືອນເປ່ເພເສຍຫາຍ ຊໍ້າຕື່ມຄວາມຍາກລຳບາກຈາກວິກິດການລະບາດຂອງພະຍາດໂຄວິດ-19 ທີ່ເຮັດໃຫ້ມີຜູ້ເສຍຊີວິດ ແລະ ຕິດເຊື້ອເປັນຈຳນວນຫລາຍ.

ໂຮງໝໍຫລາຍແຫ່ງທີ່ມີຜູ້ຕິດເຊື້ອ-19 ລົ້ນມື ກໍໄດ້ຮັບຜົນກະທົບຈາກພາຍຸໄຊໂຄນນຳ, ຂະນະທີ່ໜ່ວຍບໍລິການສັກວັກຊີນບາງແຫ່ງໃນເມືອງມຸມໄບຖືກພາຍຸພັດເສຍຫາຍຈົນບໍ່ສາມາດໃຫ້ບໍລິການໄດ້.

ກົມອຸຕຸນິຍົມວິທະຍາຂອງອິນເດຍລາຍງານໃນວັນທີ 18 ພຶດສະພາວ່າ: ພາຍຸຍັງມີຄວາມຮຸນແຮງ, ແຕ່ເລີ່ມອ່ອນກຳລັງລົງແດ່ແລ້ວ.