16 ພຶດສະພານີ້ ສປປ ລາວ ມີຜູ້ຕິດເຊື້ອໂຄວິດ-19 ເພີ່ມຂຶ້ນ 21 ກໍລະນີ
ໃນວັນທີ 16 ພຶດສະພາ 2021, ທີ່ນະຄອນຫລວງວຽງຈັນ ທ່ານ ດຣ.ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່, ພ້ອມດ້ວຍ ທ່ານ ດຣ. ບົວເທບ ພູມິນ ຮອງຫົວໜ້າກົມປິ່ນປົວ ແລະ ຟື້ນຟູໜ້າທີ່ການ ກະຊວງສາທາລະນະສຸກ, ໄດ້ຕາງໜ້າກອງເລຂາ ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດ COVID-19 ໄດ້ລາຍງານໃຫ້ຮູ້ວ່າ: ໃນວັນທີ 15 ພຶດສະພາ 2021 ໄດ້ເກັບຕົວຢ່າງມາກວດວິເຄາະທັງໝົດ 1.427 ຕົວຢ່າງ, ໃນນັ້ນ ນະຄອນຫລວງ 941 ຕົວຢ່າງ ແລະ ຕ່າງແຂວງ 486 ຕົວຢາງ, ພົບຜູ້ຕິດເຊື້ອໃໝ່ 21 ຄົນ, ເຮັດໃຫ້ຜູ້ຕິດເຊື້ອສະສົມທັງໝົດເປັນ 1.591 ຄົນ, ເສຍຊີວິດໃໝ່ບໍ່ມີ, ເສຍຊິວິດສະສົມທັງໝົດ 02 ຄົນ.
ກ່ຽວກັບກໍລະນີ ຕິດເຊື້ອໃໝ່ 21 ຄົນ (ກໍລະນີຢັ້ງຢືນ ທີ 1.571-1.591) ມີລາຍລະອຽດດັ່ງຕໍ່ໄປນີ້: ຄົນເຈັບຕິດເຊື້ອໃໝ່ ຈາກນະຄອນຫລວງ 11 ຄົນນັ້ນ, ແມ່ນການຕິດເຊື້ອໃນຊຸມຊົນ, ສໍາລັບຈໍາປາສັກ 07 ຄົນ ແລະ ສະຫວັນນະເຂດ 03 ຄົນ ກໍລະນີກວດພົບເຊື້ອໃນແຮງງານລາວ ທີ່ກັບຄືນປະເທດຖືກກົດໝາຍ; ສໍາລັບນະຄອນຫລວງວຽງຈັນ ທີ່ກໍລະນີຕິດເຊື້ອໃໝ່ 11 ຄົນ ແມ່ນ ຕິດມາຈາກຸ່ມຄົນເຈັບທີ່ເສຍຊິວິດຜູ້ທີ 2, ກຸ່ມບໍລິສັດ ສັນຕິພາບ ສັງກະສີລາວ, ກຸ່ມພະນັກງານສະພາການຄ້າ, ກຸ່ມໃກ້ຊິດກັບພະນັກງານ T-Plus (Lao telecom company) ທີ່ອາໄສຢູ່ຫ້ອງແຖວ ບ້ານຫ້ວຍຫົງ, ກຸ່ມພະນັກງານອາສາສະໝັກ UNDP ແລະ ກຸ່ມພະນັກງານບຳນານກົມປິ່ນປົວ ແລະ ຟື້ນຟູໜ້າທີ່ການ; ປັດຈຸບັນມີຜູ້ຍັງຕິດຕາມປິ່ນປົວທົ່ວປະເທດທັງໝົດ 1.015 ຄົນ ໃນນັ້ນໄດ້ຮັບການປິ່ນປົວດີ ທັງໝົດ 574 ຄົນ (ໃໝ່ 19 ຄົນ) ແລະ ພວກກ່ຽວຈະຕ້ອງໄປສືບຕໍ່ຈຳກັດບໍລິເວນຢູ່ເຮືອນ ຫລື ສູນຈໍາກັດບໍລິເວນ ສໍາລັບຜູ້ທີ່ບໍ່ມີເງື່ອນໄຂ, ຈົນຄົບກຳນົດຕາມຄຳແນະນຳຂອງແພດຢ່າງເຄັງຄັດ, ແຍກຕົນເອງອອກຈາກຄົນໃນຄອບຄົວ, ບໍ່ໃຊ້ສິ່ງຂອງຮ່ວມກັນ ແລະ ມອບໃຫ້ອໍານາດການປົກຄອງເມືອງ/ບ້ານ ແລະ ເຈົ້າໜ້າທີ່ສູນ ລົງໄປຕິດ ຕາມກວດກາສຸຂະພາບຂອງພາກສ່ວນດັ່ງກ່າວ ເຊັ່ນ: ວັດແທກອຸນຫະພູມ, ສອບຖາມອາການ ຖ້າພົບເຫັນເປັນໄຂ້, ມີໄອ ແລະ ຈາມ ຕ້ອງຮີບຮ້ອນໄປພົບແພດຢູ່ ສະຖານທີ່ບໍລິການໃກ້ບ້ານທ່ານ. ທັງໝົດນີ້, ແມ່ນສ້າງຄວາມໝັ້ນໃຈໃຫ້ແກ່ສັງຄົມ ວ່າຄົນເຈັບທີ່ອອກຈາກໂຮງໝໍແມ່ນປະຕິບັດຕາມຄໍາແນະນໍາຢ່າງເຄັ່ງຄັດ ແລະ ບໍ່ອອກຈາກບ້ານຈົນໝົດກໍານົດ.
ພ້ອມນີ້, ທ່ານ ດຣ. ຣັດຕະນະໄຊ ເພັດສຸວັນ ຍັງໃຫ້ຮູ້ວ່າ: ເພື່ອເລັ່ງລັດໃນການຄວບຄຸມການລະ ບາດຄັ້ງນີ້, ໃຫ້ຢຸດຕິລົງໂດຍໄວ ພັກ ກໍ່ຄື ລັດຖະບານ ແລະ ຄະນະສະເພາະກິດ ໄດ້ເຫັນຄວາມສໍາຄັນຂອງການສັກຢາປ້ອງກັນດ້ວຍວັກແຊງ, ເຊິ່ງເປັນວິທີດຽວ ທີ່ປະເທດຂອງພວກເຮົາສາມາດ ລອດພົ້ນຈາກການລະບາດ ຖ້າພວກເຮົາທັງໝົດຕັດສິນໃຈໄປສັກວັກແຊງ ຕາມສະຖານທີ່ຕ່າງໆ ທີ່ທາງກະຊວງສາທາ ລະນະສຸກ ໄດ້ກໍານົດໄວ້ ແລະ ເປົ້າໝາຍທີ່ພວກເຮົາຈະຕ້ອງສູ້ຊົນ ຄື ສັກໃຫ້ໄດ້ 50% ຂອງປະຊາກອນທົ່ວປະເທດ ແລະ ມາຮອດປັດຈຸບັນ ພວກເຮົາກໍ່ສາມາດສັກໄດ້ ເຂັ້ມທໍາອິດ 550.441 ຄົນ ແລະ ເຂັ້ມທີ 2 ສັກໄດ້ 90.205 ຄົນ ໃນນັ້ນກຸ່ມທີ່ສ່ຽງຄື ແພດໝໍ ແລະ ເຈົ້າໜ້າທີ່ຂະແໜງການຕ່າງໆ ແມ່ນໄດ້ຮັບການສັກຢາໃນອັດຕາທີ່ສູງ ແລະ ເປັນທີ່ເພິ່ງພໍໃຈ. ແຕ່ມີແຂວງຈໍານວນໜຶ່ງ ກໍ່ຍັງບໍ່ທັນບັນລຸໄດ້ຕາມເປົ້າໝາຍທີ່ໄດ້ວາງໄວ້, ເຊິ່ງຂ້າພະເຈົ້າ ຂໍຮຽກຮ້ອງໃຫ້ອໍານາດການປົກຄອງທ້ອງຖິ່ນ ແລະ ພະແນກທີ່ກ່ຽວ ຂ້ອງລົງຊີ້ນໍາຢ່າງໃກ້ຊິດ ເພື່ອເຮັດໃຫ້ອັດຕາການສັກວັກແຊງສູງຂຶ້ນ ແລະ ກໍ່ແມ່ນການປະກອບສ່ວນໃນການປ້ອງກັນ ແລະ ຄວບຄຸມການລະບາດ ຢູ່ໃນແຂວງຂອງທ່ານຮັບຜິດຊອບ.
