ມີບາງພາກສ່ວນຍັງຝ່າຝືນຄໍາສັ່ງທີ່ຂັ້ນເທິງໄດ້ປະກາດ ເອົາເຮືອອອກ ໄປໄຫລມອງ ແລະ ລັກລອບຂົນສົ່ງສິນຄ້າໃນຕອນກາງຄືນ ຕາມເຂດຊາຍແດນແມ່ນໍ້າຂອງ

ແຫລ່ງຂ່າວຈາກແຂວງບໍ່ແກ້ວ ໃຫ້ຮູ້ວ່າ: ວັນທີ 14 ພຶດສະພາ 2021 ນີ້, ຄະນະສະເພາະກິດ ກອງບັນຊາການ ປກສ ແຂວງບໍ່ແກ້ວ ເພື່ອຄວບຄຸມ ແລະ ແກ້ໄຂການລະບາດຂອງເຊື້ອພະຍາດໂຄວິດ-19, ພ້ອມດ້ວຍທີມງານ ສົມທົບກັບ ກອງບັນຊາການທະຫານແຂວງ, ພະແນກທາງນໍ້າໂຍທາທິການແຂວງ ແລະ ເມືອງ ໄດ້ລາດຕະເວນຕາມຂອບເຂດຊາຍແດນແມ່ນໍ້າຂອງ ແຕ່ຈຸດບ້ານປາກງາວ ຫາ ບ້ານດ່ານຖິ່ນ ເມືອງຫ້ວຍຊາຍ ແຂວງບໍ່ແກ້ວ ໂດຍມີ ທ່ານ ສຸວັດ ເພັງພະຈັນ ຮອງເຈົ້າເມືອງຫ້ວຍຊາຍ, ຜູ້ຊີ້ນໍາວຽກງານວັດທະນະທໍາ-ສັງຄົມ ເຂົ້າຮ່ວມຂະບວນ.

ການລົງກວດກາ-ລາດຕະເວນໃນຄັ້ງນີ້, ກໍເພື່ອຕິດຕາມ-ກວດກາ ການເຄື່ອນໄຫວ ແລະ ດຳລົງຊິວິດຂອງປະຊາຊົນບັນດາເຜົ່າຕາມແຄມແມ່ນໍ້າຂອງ ບໍ່ໃຫ້ມີການລັກລອບເຂົ້າ -ອອກເມືອງໂດຍບໍ່ຖືກຕ້ອງ, ການສວຍໃຊ້ໂອກາດຂົນສົ່ງສິນຄ້າເຖື່ອນ, ການຄ້າມະນຸດ, ອາວຸດ ແລະ ຢາເສບຕິດ ອັນເປັນການສ້າງຄວາມບໍ່ສະຫງົບສຸກ, ຄວາມບໍ່ເປັນລະບຽບ ຮຽບຮ້ອຍຕາມຊາຍແດນທັງ 2 ຝັ່ງແມ່ນໍ້າຂອງ.

ຜ່ານການລົງກວດກາລາດຕະເວນຄັ້ງນີ້ເຫັນວ່າ: ສະພາບປົກກະຕິ, ປະຊາຊົນທັງສອງຝັ່ງ ດຳລົງຊີວິດຕາມປົກະຕິ, ມີການຫາປາ ແລະ ປູກຝັງຕາມແຄມແມ່ນໍ້າ, ປະຊາຊົນສ່ວນຫລາຍແມ່ນໄດ້ຍົກເຮືອຂື້ນບົກ ຫລື ໃສ່ກະແຈໄວ້ ພາຍໃຕ້ການຄຸ້ມຄອງຂອງການຈັດ ຕັ້ງທີ່ຂື້ນກັບ. ແຕ່ມີບາງພາກສ່ວນຍັງຝ່າຝືນຄໍາສັ່ງທີ່ຂັ້ນເທິງໄດ້ປະກາດ ໂດຍການລັກ ລອບເອົາເຮືອອອກ ໄປໄຫລມອງ ແລະ ລັກລອບຂົນສົ່ງສິນຄ້າໃນຕອນກາງຄືນ, ໃນກໍລະ ນີດັ່ງກ່າວ ຫາກທາງເຈົ້າໜ້າທີ່ພົບເຫັນ ຈະມີການດຳເນີນຄະດີ ຕາມລະບຽບກົດໝາຍ ເພື່ອເຮັດໃຫ້ບ້ານເມືອງມີຄວາມສະຫງົບສຸກ ເປັນລະບຽບຮຽບຮ້ອຍ ແລະ ປອດໄພຈາກ ເຊື້ອພະຍາດ ໂຄວິດ -19.