ຫ້າມເຂົ້າໄປອອກ ແລະ ເຮັດກິດຈະກຳກາງແຈ້ງ ຢູ່ບໍລິເວນ ເຂດເສດຖະກິດສະເພາະບຶງທາດຫລວງ

ກະຊວງແຜນການ ແລະ ການລົງທຶນ, ຫ້ອງການສົ່ງເສີມ ແລະ ຄຸ້ມຄງເຂດເສດຖະກິດພິເສດ ຄະນະຄຸ້ມຄອງເຂດເສດຖະກິດພິເສດນະຄອນຫລວງວຽງຈັນ, ໄດ້ອອກແຈ້ງການ ເລກທີ 618/ຄຂ ສພ.ນວ ລົງວັນທີ 13/05/2021, ຫ້າມບໍ່ໃຫ້ພະນັກງານ, ທະຫານຕຳຫລວດ, ນັກທຸລະກິດຊາວຄ້າຂາຍ ຕະຫລອດຮອດປະຊາຊົນ ເຂົ້າໄປອອກກຳລັງກາຍ, ຕຶກເບັດ, ຂາຍເຄື່ອງຕາມເສັ້ນທາງຕັດໃໝ່ ໂພນທັນ-ໂນນຫວາຍ ແລະ ເຮັດກິດຈະກຳກາງແຈ້ງອື່ນໆ ຢູ່ບໍລິເວນຂອບເຂດ ເຂດເສດຖະກິດສະເພາະບຶງທາດຫລວງຢ່າງເດັດຂາດ.

ຄະນະຄຸ້ມຄອງເຂດເສດຖະກິດພິເສດ ນະຄອນຫລວງວຽງຈັນ (ຄຂສພ.ນວ) ຂໍຖືເປັນກຽດແຈ້ງມາຍັງທ່ານຊາບ ວ່າ: ໃນໄລຍະຜ່ານມາ ເຫັນວ່າ ມີປະຊາຊົນໄດ້ອອກມາເຮັດກິດຈະກໍາກາງແຈ້ງ (ອອກກໍາລັງກາຍ), ຂາຍເຄື່ອງຕາມເສັ້ນທາງຕັດໃໝ່ໂພນທັນ-ໂນນຫວາຍ ແລະ ທາງເຂດກໍໄດ້ມີກິດຈະກໍາ ໃຫ້ປະ ຊາຊົນເຂົ້າມາຕຶກເບັດ ຢູ່ທີ່ໜອງໃຫຍ່ບຶງທາດຫລວງ ໃນເຂດເສດຖະກິດສະເພາະບຶງທາດຫລວງ ໄດ້ມີມວນຊົນອອກມາເຮັດກິດຈະກໍາດັ່ງກ່າວເປັນຈໍານວນຫລາຍ, ຊຶ່ງເຮັດໃຫ້ມີຄວາມສ່ຽງຕໍ່ການຕິດເຊື້ອ ແລະ ແຜ່ເຊື້ອພະຍາດໂຄວິດ-19 (COVID-19).

ສະນັ້ນ, ເພື່ອປະຕິບັດຄໍາສັ່ງຂອງທ່ານນາຍົກ ລັດຖະມົນຕີ ວ່າດ້ວຍການເພີ່ມທະວີມາດຕະການສະກັດກັ້ນ, ຄວບຄຸມ ແລະ ກຽມພ້ອມຮອບດ້ານ ເພື່ອຕ້ານພະຍາດໂຄວິດ-19 (COVID-19) ສະບັບເລກທີ 15/ນຍ, ລົງວັນທີ 21 ເມສາ 2021 ແລະ ຄໍາແນະນໍາ ການຈັດຕັ້ງປະຕິບັດຄໍາສັ່ງ ວ່າດ້ວຍການເພີ່ມທະວີມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດ (COVID-19) ສະບັບເລກທີ 006/ຈນວ ລົງວັນທີ 22 ເມສາ 2021 ທາງ ຄກສພ.ນວ ຈຶ່ງແຈ້ງການມາຍັງທ່ານດັ່ງນີ້:

1. ໃຫ້ຜູ້ພັດທະນາໂຈະ ຫລື ເລື່ອນກິດຈະກໍາຕຶກເບັດ ຢູ່ທີ່ໜອງໃຫຍ່ບຶງທາດຫລວງ ໃນເຂດເສດ ຖະກິດ, ສະເພາະບຶງທາດຫລວງ ອອກໄປກ່ອນ ຈົນກວ່າຈະໄດ້ຮັບອະນຸຍາດໃໝ່ຈາກ ຄຂສພ.ນວ; 2. ຫ້າມບໍ່ໃຫ້ຂາຍເຄື່ອງຕາມເສັ້ນທາງຕັດໃໝ່ ໂພນທັນ-ໂນນຫວາຍ ຢູ່ໃນເຂດເສດຖະກິດສະເພາະ ບຶງທາດ ຫລວງຢ່າງເດັດຂາດ; 3. ໃຫ້ປິດເສັ້ນທາງ ເຂົ້າ-ອອກ ຈາກເສັ້ນທາງຫລັກຂອງເຂດ ໄປຫາໜອງໃຫຍ່ບຶງທາດຫລວງ ໄປກ່ອນ(ຊົ່ວຄາວ) ຢູ່ພາຍໃນເຂດເສດຖະກິດສະເພາະ ບຶງທາດຫລວງ ທີ່ປະຊາຊົນມາອອກກໍາລັງກາຍ ແລະ ໃຊ້ບໍລິການ; 4. ຫ້າມປະຊາຊົນເຮັດກິດຈະກໍາກາງແຈ້ງ (ອອກກໍາລັງກາຍແລ່ນ, ຍ່າງ ແລະ ອື່ນໆ) ຢູ່ໃນເຂດເສດຖະກິດ ສະເພາະ ບຶງທາດຫລວງ ໃນໄລຍະການແຜ່ລະບາດພະຍາດໂຄວິດ- 19 (Lock Down) ຢ່າງເດັດຂາດ ແຕ່ວັນທີ 6-20 ພຶດສະພາ ຈົນກວ່າຈະມີຄໍາສັ່ງອອກມາໃໝ່; 5. ໃຫ້ເຂດເສດຖະກິດສະເພາະ ບຶງທາດຫລວງ ເອົາໃຈໃສ່ປະຕິບັດຄໍາສັ່ງຂອງທ່ານ ນາຍົກລັດຖະມົນຕີ ວ່າດ້ວຍການເພີ່ມທະວີ ມາດຕະການສະກັດກັ້ນ, ຄວບຄຸມ ແລະ ກຽມພ້ອມຮອບດ້ານ ເພື່ອຕ້ານພະຍາດໂຄວິດ-19 (COVID-19) ສະບັບເລກທີ 15/ນຍ ລົງວັນທີ 21 ເມສາ 2021, ຄໍາແນະນໍາການຈັດຕັ້ງປະ ຕິບັດຄໍາສັ່ງ ວ່າດ້ວຍການເພີ່ມທະວີມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດ-19 (COVID-19) ສະບັບເລກທີ OO6/ຈນວ ລົງວັນທີ 22 ເມສາ 2021, ແຈ້ງການຂອງຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ສະບັບເລກທີ 0440/ ຫຂສພ.05 ລົງວັນທີ 24 ເມສາ 2021 ແລະ ແຈ້ງການຂອງຄະນະຄຸ້ມຄອງເຂດເສດຖະກິດພິເສດ ນະຄອນຫລວງວຽງຈັນ ສະ ບັບເລກທີ 564/ຄຊສພ, ນວ ລົງວັນທີ 23 ເມສາ 2021 ທີ່ວາງອອກຢ່າງເຂັ້ມງວດ.