ຈົ່ງມີສະຕິໃນການເສບຂ່າວໃນຊ່ວງບ້ານເມືອງຕ້ານສົງຄາມໂຄວິດ-19

ໂດຍ: ທິດກໍ່າ
ສະພາບປັດຈຸບັນ ເຮົາເຫັນວ່າແຫລ່ງຂ່າວຄາວ ຫລືວ່າ ບັນດາຂໍ້ມູນຂ່າວສານຈາກສື່ອອນລາຍມັນມາແຮງແຊງໜັງສືພິມລາຍວັນຈົນນັບມື້ຫລຸດໜ້ອຍຖອຍລົງ ແລະ ກຸດຫ້ຽນໄປແຕ່ລະໄລຍະດັ່ງເຮົາເຫັນມາໃນທຸກວັນນີ້. ໃນຂັ້ນຕໍ່ໄປ ຖ້າພວກເຮົາຍັງບໍ່ພ້ອມກັນຫາວິທີແກ້ໄຂ ເພື່ອເຮັດໃຫ້ມັນຍືນຍົງຄົງກະພັນຢູ່ໃນສັງຄົມລາວຕະຫລອດໄປ ເພາະວ່າຈຳນວນໜັງສືພິມກໍນັບມື້ຫລຸດລົງ ແລະ ຈຳນວນໜ້າໜັງສືພິມກໍນັບມື້ຈ່ອຍລົງ. ເວົ້າສະເພາະຢູ່ໃນປະເທດລາວຂອງພວກເຮົາແລ້ວ ນັບແຕ່ວົງການສື່ໃໝ່ໄດ້ເຂົ້າມາແທນສື່ມານີ້ ໄດ້ມີແຫລ່ງຂ່າວຈາກສຳນັກສື່ຕ່າງໆ ນັບທັງຂອງລັດ, ຂອງເອກະຊົນ ແລະ ທັງຂອງບຸກຄົນນັບມື້ແຕກໜໍ່ຈໍ່ແນວກວ້າງຂວາງ ແລະ ແຜ່ຂະຫຍາຍໄປໃນທຸກຈອກທຸກແຈ, ທຸກພື້ນທີ່ຂອງປະເທດ ມີສາລະພັດຂ່າວ ທັງຂ່າວດີ, ຂ່າວຮ້າຍ, ຂ່າວຈິງ, ຂ່າວປອມ ພວກເຮົາກໍສາມາດເຫັນໄດ້ຢ່າງວ່ອງໄວທັນໃຈ ຈົນມີບາງຄັ້ງ, ບາງວັນກໍມີກະແສເຮັດໃຫ້ຜູ້ບໍລິໂພກຕ້ອງເຈັບຫົວ ຍ້ອນວ່າມັນເປັນຂ່າວແທ້ ຫລື ຂ່າວເທັດ.
ແຕ່ວ່າແນວໃດກໍດີ, ຕາມທິດກໍ່າວິເຄາະເບິ່ງແລ້ວ ທາດແທ້ຂອງເລື່ອງມັນກໍມີທັງຂ່າວແທ້ ແລະ ຂ່າວປອມຄວບຄູ່ກັນໄປໃນສັງຄົມ ບໍ່ວ່າມື້ໃດຍາມໃດ ແລະ ຍຸກໃດສະໄໝໃດມັນກໍຍອມປະຕິເສດບໍ່ໄດ້ວ່າສຳຄັນ ແຕ່ວ່າເຮົາຈະເລືອກບໍລິໂພກ ແລະ ສັນຫາວ່າຂ່າວອັນໃດ, ຊະນິດໃດທີ່ມີເນື້ອຫາ ແລະ ມີຜົນປະໂຫຍດຕໍ່ຕົນເອງ, ສັງຄົມ ແລະ ປະເທດຊາດ.
ເມື່ອຕັ້ງໂຈດກັນວ່າ, ໃນ ສປປ ລາວ ພວກເຮົາຈະເລືອກບໍລິໂພກຂ່າວຈາກສຳນັກໃດຈຶ່ງຈະດີ ແລະ ມີຄວາມຈິງກວ່າ ? ຄຳຕອບໂຈດກໍຄື ຕ້ອງແມ່່ນຂອງລັດ ຫລື ຖ້າແມ່ນຂອງເອກະຊົນກໍຕ້ອງມີສຳນັກ ແລະ ຜ່ານການອະນຸມັດຈາກອົງການຈັດຕັ້ງທີ່ກ່ຽວຂ້ອງ, ເວົ້າແຈ້ງກໍແມ່ນສຳນັກຂ່າວທີ່ມີທະບຽນອະນຸຍາດຢ່າງຖືກຕ້ອງ, ຢູ່ປະເທດເຮົາໃນປັດຈຸບັນ ໄດ້ມີສຳນັກຂ່າວຫລາຍແຫ່ງທີ່ເປັນຂອງລັດເຊັ່ນ: ສຳນັກຂ່າວສານປະເທດລາວ ນັບທັງວິທະຍຸ, ໂທລະພາບ, ໜັງສືພືມ, ວາລະສານຂອງສູນກາງ ແລະ ທ້ອງຖິ່ນ ແລະ ນອກຈາກນັ້ນ ກໍມີໜັງສືພິມຂອງອົງກອນຕ່າງໆທີ່ເປັນຂອງລັດ, ເປັນວິສາຫະກິດເຊັ່ນ: ໜັງສືພິມລາວພັດທະນາ, ໜັງສືພິມເສດຖະກິດ-ການຄ້າ, ປ້ອງກັນຊາດ, ປ້ອງກັນຄວາມສະຫງົບເຫລົ່ານີ້ເປັນຕົ້ນ. ນອກຈາກນັ້ນ ກໍແມ່ນໃນສື່ອອນລາຍທີ່ປາກົດເຫັນມາດົນກໍມີໂທລະໂຄ່ງ ແລະ ທີ່ເຫລືອນັ້ນກໍມີຫລາກຫລາຍ ທັງຂອງບຸກຄົນ, ນິຕິບຸກຄົນເຊັ່ນ: ໃນເຟສບຸກ, ຢູທູບ ແລະ ອື່ນໆ ເພື່ອຮັບໃຊ້ຕົນເອງ, ສັງຄົມ ແລະ ປະເທດຊາດ ເຊິ່ງບັນດາແຫລ່ງສື່ຕ່າງໆເຫລົ່ານີ້ກໍມີທັງລັກສະນະສ້າງສັນ ແລະ ບໍ່ສ້າງສັນ.
ເຖິງຢ່າງໃດກໍດີ, ຕາມທິດກໍ່າວ່າ ໃນຊ່ວງໄລຍະພວກເຮົາພວມປະຕິບັດບັນດາມາດຕະການຕ່າງໆຂອງລັດຖະບານ ແລະ ຄະນະສະເພາະກິດວາງອອກ ແມ່ນຂໍໃຫ້ມີການຮ່ວມມືກັນຢ່າງເຄັ່ງຂັດກວ້າງຂວາງ ແລະ ເຂັ້ມງວດ. ນອກຈາກນັ້ນ ທຸກສື່ກໍຕ້ອງເປັນເຈົ້າການເພື່ອໂຄສະນາບັນດາມາດຕະການຕ່າງໆໃຫ້ທຸກຄົນປະຕິບັດ, ການໂຄສະນາກໍຕ້ອງມີເນື້ອຫາທີ່ມີຄວາມຈິງຕາມຈັນຍາບັນຂອງນັກສື່ມວນຊົນ.
ໄປຄຽງຄູ່ກັນນັ້ນ, ຜູ້ບໍລິໂພກທັງຫລາຍກໍຕ້ອງມີສະຕິໃນການເສບຂ່າວເພື່ອບໍ່ຕົກຢູ່ໃນເລ່ກົນຂອງຜູ້ມີຈຸດປະສົງແບ່ງແຍກ, ໃສ່ຮ້າຍປ້າຍສີແນວທາງຂອງພັກ ແລະ ລັດຖະບານ ກໍຄືບັນດາມາດຕະການຕ່າງໆຂອງລັດຖະບານ ແລະ ຄະນະສະເພາະກິດວາງອອກ ເພື່ອຕ້ານ, ສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19. ນອກຈາກທີ່ໄດ້ກ່າວມານີ້ແລ້ວ ພວກເຮົາຕ້ອງຕີຕ້ານທຸກຖ້ອຍທຳນອງໃສ່ຮ້າຍປ້າຍສີຂອງບຸກຄົນ, ກຸ່ມຄົນບໍ່ດີທີ່ຢູ່ຕ່າງປະເທດ ເຊິ່ງຍາມໃດພວກເຮົາກໍພະຍາຍາມຫາທຸກວິທີ ເພື່ອສ້າງຄວາມແບ່ງແຍກລະຫວ່າງຄົນລາວດ້ວຍກັນ. ອັນສຳຄັນທີ່ສຸດແມ່ນເພື່ອດູດດຶງເອົາຄົນລາວທີ່ຢູ່ໃນປະເທດໃຫ້ໄປຫລົງເຊື່ອໃນອຸດົມການຂອງພວກເຂົາດ້ວຍວິທີຕ່າວໂຈມຕີພັກ ແລະ ລັດຖະບານເຮົາໃນຊ່ວງເກີດວິກິດໂຄວິດ-19 ນີ້.