ສ.ເກົາຫລີ ສະເໜີເຈລະຈາ ທາງທະຫານກັບ ສປປ ເກົາຫລີ
ສ.ເກົາຫລີ ສະເໜີເຈລະຈາທາງທະຫານກັບ ສປປ ເກົາຫລີ ໃນອາທິດນີ້ ໂດຍຈະເປັນການເຈລະຈາລະດັບລັດຖະບານເທື່ອທຳອິດນັບແຕ່ທ້າຍປີ 2015 ແລະ ເປັນການຍື່ນໄມຕີຢ່າງເປັນທາງການເທື່ອທຳອິດຂອງລັດຖະບານ ມຸນ ແຈອິນ ທີ່ຂຶ້ນບໍລິຫານປະເທດໃນເດືອນພຶດສະພາ.
ຮອງລັດຖະມົນຕີກະຊວງປ້ອງກັນປະເທດ ສ.ເກົາຫລີ ຖະແຫລງຂ່າວໃນວັນທີ 17 ກໍລະກົດນີ້ວ່າ: ໄດ້ຂໍເຈລະຈາທາງທະຫານກັບ ສປປ ເກົາຫລີ ໃນວັນທີ 21 ກໍລະກົດ ຢູ່ອາຄານທົງອິວກັກ ເພື່ອຢຸດຕິການກະທຳອັນເປັນປໍລະປັກທັງໝົດທີ່ຈະເພີ່ມຄວາມເຄັ່ງຕຶງທາງທະຫານທີ່ເສັ້ນປັກປັນທາງທະຫານ. ເຖິງຢ່າງໃດກໍດີ, ຮອງລັດຖະມົນຕີກະຊວງປ້ອງກັນປະເທດ ບໍ່ໄດ້ລະບຸວ່າ: ການກະທຳອັນເປັນປໍລະປັກໝາຍເຖິງສິ່ງໃດ, ຜ່ານມາ ສ.ເກົາຫລີ ມັກໃຊ້ໝາຍເຖິງການກະຈາຍສຽງຜ່ານລຳໂພງຂ້າມຊາຍແດນ ແລະ ອື່ນໆ, ຂະນະທີ່ ສປປ ເກົາຫລີ ໝາຍເຖິງການຊ້ອມຮົບຮ່ວມ ສ.ເກົາຫລີ-ອາເມລິກາ.
ສ.ເກົາຫລີ ສະເໜີເລື່ອງນີ້ພາຍຫລັງປະທານາທິບໍດີ ມຸນ ແຈອິນ ກ່າວໃນອາທິດກ່ອນວ່າ: ຈຳເປັນຕ້ອງເປີດເຈລະຈາກັບ ສປປ ເກົາຫລີ ຢ່າງຮີບດ່ວນ ເພື່ອຄວບຄຸມໂຄງການອາວຸດນິວເຄຼຍ ແລະ ລູກສອນໄຟ ສປປ ເກົາຫລີ ໂດຍເຫັນວ່າຄວນຢຸດຕິການກະທຳທາງທະຫານອັນເປັນປໍລະປັກຕໍ່ກັນຢູ່ຊາຍແດນສອງປະເທດໃນວັນທີ 27 ກໍລະກົດນີ້ ເພາະເປັນວັນບັນລຸຂໍ້ຕົກລົງສະຫງົບເສິກຢຸດຕິສົງຄາມສອງເກົາຫລີໃນປີ 1953.
