ປະທານາທິບໍດີອີຢິບອະນຸມັດຂະຫຍາຍຄອງສຸເອສ ຄາດວ່າຈະສຳເລັດພາຍໃນເວລາ 2 ປີ
ວັນທີ 12 ພຶດສະພາ 2021, ສະຖານີໂທລະພາບທາງການອີຢິບ ລາຍງານວ່າ: ທ່ານ ອັບເດວ ຟັດຕາ ອັລ-ຊິຊີ ປະທານາທິບໍດີອີຢິບ ອະນຸມັດແຜນການຂອງອົງການຄອງສຸເອສ (SCA) ທີ່ມຸ່ງຂະຫຍາຍ ແລະ ຂຸດຊ່ວງໃຕ້ຂອງຄອງສຸເອສໃຫ້ກວ້າງ ແລະ ເລິກກວ່າເກົ່າ.
ໂຄງການນີ້ຈະຂະຫຍາຍຄອງສຸເອສຊ່ວງໜຶ່ງທີ່ມີໄລຍະທາງ 40 ກິໂລແມັດ ໃຫ້ກວ້າງ ແລະ ເລິກກວ່າເກົ່າ ລວມທັງຊ່ວຍທີ່ເຮືອຂົນສົ່ງຕູ້ຄອນເທນເນີ Ever Given ຄາຢູ່ ແລະ ປິດກັ້ນການສັນຈອນເປັນເວລາ 6 ວັນໃນເດືອນມີນາຜ່ານມາ.
ທ່ານ ຊິຊີ ກ່າວວ່າ: ໂຄງການນີ້ຄວນສຳເລັດພາຍໃນ 2 ປີ ໂດຍເຫດການເຮືອ Ever Given ຄວາມຍາວ 440 ແມັດຄາເມື່ອວັນທີ 23 ມີນາຜ່ານມາ ສະທ້ອນຄວາມຮີບດ່ວນຂອງການຂະຫຍາຍຄອງອັນເປັນທາງນໍ້າລະຫວ່າງປະເທດເສັ້ນນີ້.
ທ່ານ ໂອຊາມາ ເຣບີ ປະທານ SCA ລະບຸວ່າ: ຄອງສຸເອສຊ່ວງລະຫວ່າງເມືອງສຸເອສ ແລະ ທະເລສາບເດິ ບິດເທີ (The Bitter Lake) ທີ່ມີໄລຍະທາງ 30 ກິໂລແມັດ ຈະຖືກຂະຫຍາຍໃຫ້ກວ້າງ 40 ແມັດ ແລະ ຖືກຂຸດເພີ່ມຄວາມເລິກຈາກ 20 ແມັດເປັນ 21 ແມັດ.
ທ່ານ ຊິຊີ ເປີດເຜີຍການອະນຸມັດແຜນການເບື້ອງຕົ້ນລະຫວ່າງຮ່ວມພິທີເປີດໂຄງການທາງນໍ້າ, ການປະມົງ ແລະ ພິພິຕະພັນ ຜ່ານລະບົບວິດີໂອ ໂດຍພິທີດັ່ງກ່າວຈັດຂຶ້ນແຄມຄອງສຸເອສໃນແຂວງອິສໄມເລຍ ເມື່ອວັນທີ 11 ພຶດສະພາຜ່ານມາ.
ອ້າງອີງ: ສຳນັກຂ່າວຊິນຮົວ
