ສະຫະລັດອາເມລິກາ ແລະ ນອກແວສືບຕໍ່ສະໜັບສະໜູນການສຳຫຼວດ ແລະ ກວດກູ້ລະເບີດບໍ່ທັນແຕກໃນ ສປປ ລາວ

ເພື່ອສືບຕໍ່ຄຳໝັ້ນສັນຍາທີ່ມີມາແຕ່ຍາວນານຂອງພວກເຂົາໃນການສະໜັບສະໜູນຂະແໜງການກວດກູ້ລະເບີດທີ່ບໍ່ທັນແຕກ (ລບຕ) ໃນ ສປປ ລາວ, ລັດຖະບານຂອງປະເທດສະຫະລັດອາເມລິກາ ແລະ ລັດຖະບານຂອງປະເທດນອກແວໄດ້ປະກາດໃນວັນທີ 7 ພຶດສະພາ ວ່າ: ອົງການ ຮາໂລ ທຣາສທ໌ ແລະ ອົງການຊ່ວຍເຫຼືອລ້າຂອງປະຊາຊົນນອກແວ (ອົງການ ເອັນພີເອ), ເຊິ່ງເປັນອົງການສໍາຫຼວດ ແລະ ກວດກູ້ ລບຕ, ໄດ້ເຊັນບົດບັນທຶກຄວາມເຂົ້າໃຈ (MOU) ກັບກະຊວງແຮງງານ ແລະ ສະຫວັດດີການສັງຄົມ, ຕາງໜ້າໂດຍຄະນະກຳມະການຄຸ້ມຄອງແຫ່ງຊາດເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ (ຫ້ອງການ ຄຊກລ).

ທຶນຊ່ວຍເຫຼືອຈາກປະເທດສະຫະລັດອາເມລິກາ ແລະ ປະເທດນອກແວໃນປີ 2021 ລວມທັງໝົດມີ 14.740.000 ໂດລາສະຫະລັດ ສຳລັບ ການປະຕິບັດງານຂອງອົງການ ຮາໂລ ທຣາສທ໌ ແລະ ອົງການ ເອັນພີເອ. ອົງການ ເອັນພີເອ ໄດ້ຮັບງົບປະມານຈໍານວນທັງໝົດ 7.740.000 ໂດລາສະຫະລັດ, ເຊິ່ງລວມເອົາ 7.000.000 ໂດລາສະຫະລັດ ຈາກສະຫະລັດອາເມລິກາ, 700.000 ໂດລາສະຫະລັດ ຈາກກະຊວງການຕ່າງປະເທດນອກແວ ແລະ 40.000 ໂດລາສະຫະລັດ ຈາກ ສະຫະພັນແຮງງານແຫ່ງປະເທດນອກແວ, ເຊິ່ງມີພາລະບົດບາດໃນການຄຸ້ມຄອງຊົນຊັ້ນແຮງງານຂອງປະເທດນອກແວ. ອົງການ ຮາໂລ ທຣາສທ໌ ໄດ້ຮັບທຶນຈໍານວນ 7.000.000 ໂດລາສະຫະລັດ ຈາກລັດຖະບານສະຫະລັດອາເມລິກາ ສຳລັບ ປີ 2021, ເພີ່ມເຕີມໃສ່ໂຄງການສຳຫຼວດທີ່ໄດ້ຮັບການສະໜັບສະໜູນຈາກປະເທດສະຫະລັດອາເມລິກາທີ່ມີຢູ່ແລ້ວ ເຊິ່ງຈະຈັດຕັ້ງປະຕິບັດ ຢູ່ ແຂວງສະຫວັນນະເຂດ ຈົນເຖິງເດືອນ ມິຖຸນາ ປີ 2022.

ດ້ວຍງົບປະມານທີ່ເພີ່ມຂຶ້ນຈາກປະເທດສະຫະລັດອາເມລິກາໃນປີ 2021, ທັງອົງການ ຮາໂລ ທຣາສທ໌ ແລະ ອົງການ ເອັນພີເອ ຈະຂະຫຍາຍການປະຕິບັດງານໃນດ້ານການສຳຫຼວດ ແລະ ກວດກູ້ ໃນບັນດາແຂວງພາກໃຕ້ຂອງ ສປປ ລາວ. ນີ້ຈະເພີ່ມຄວາມໄວຂອງການປະຕິບັດວຽກງານຊ່ວຍຊີວິດອັນສຳຄັນ ໃນການກຳຈັດໄພອັນຕະລາຍຈາກລະເບີດລູກຫວ່ານ ແລະ ລບຕ ຊະນິດອື່ນໆ ແລະ ສ້າງຜົນປະໂຫຍດທາງດ້ານເສດຖະກິດ-ສັງຄົມ ໃຫ້ແກ່ຫຼາຍພັນຄອບຄົວທີ່ອາໄສຢູ່ໃນຫຼາຍຮ້ອຍບ້ານ ຂອງແຂວງອັດຕະປຶ, ຈຳປາສັກ, ສາລະວັນ, ສະຫວັນນະເຂດ ແລະ ເຊກອງ. ທຶນສະໜັບສະໜູນທີ່ເພີ່ມຂຶ້ນຈາກປະເທດສະຫະລັດອາເມລິກາ ຍັງຊ່ວຍສະໜອງໂອກາດໃນການສ້າງວຽກເຮັດງານທໍາ ແລະ ອາຊີບໃໝ່ໃຫ້ແກ່ປະຊາຊົນຫຼາຍກວ່າ 460 ຄົນ ໃນພື້ນທີ່ການປະຕິບັດງານຂອງອົງການ ຮາໂລ ທຣາສທ໌ ແລະ ອົງການ ເອັນພີເອ.