ສະຫະລັດ ຕັດສິນໃຈ ໃຫ້ສິດຜະລິດວັກຊີນໂຄວິດ-19 ໃຫ້ກັບໂລກ
ລັດຖະບານຂອງປະທານາທິບໍດີ ໂຈໄບເດັນ ໄດ້ຕັດສິນໃຈແບ່ງປັນສິດຜະລິດວັກຊີນຕ້ານໂຄວິດ-19 ໃຫ້ກັບໂລກ. ຜູ້ຕາງໜ້າທາງການຄ້າຂອງສະຫະລັດ ທ່ານ Katherine Tai ຖະແຫຼງວ່າ: “ລັດຖະບານມີຄວາມເຊື່ອໝັ້ນຢ່າງຕາຍໃຈວ່າ ການໃຫ້ສິດຜະລິດວັກຊີນໂຄວິດ-19ໃຫ້ກັບໂລກ ຊຶ່ງເປັນຊັບສິນທາງປັນຍານັ້ນ ມັນຈະເປັນການປະກອບສ່ວນ ທັບມ້າງສິ່ງກີດຂວາງຂອງການຮັກສາລີຂະສິດຊັບສິນທາງປັນຍາໄວ້ ເພື່ອຢຸດຕິການລະບາດຂອງພະຍາດໂຄວິດ-19 ໃນທົ່ວໂລກ”.
ທ່ານ ນາງ Katherine Tai ກ່າວວ່າ: ການລະບາດຂອງ ໂຄວິດ-19 ມັນໄດ້ເຮັດໃຫ້ເກີດວິກິດການທາງດ້ານສາທາລະນະສຸກໃນທົ່ວໂລກ, ສະຖານະການທີ່ຜິດປົກກະຕິດັ່ງກ່າວ ມັນຮຽກຮ້ອງໃຫ້ມີຫຼາຍມາດຕະການທີ່ບໍ່ປົກກະຕິເຊັ່ນດຽວກັນ. ສຳນັກຂ່າວ ເອເອຟພີ ໃຫ້ຮູ້ວ່າ ທ່ານ Katherine Tai ໄດ້ພົບປະກັບການນຳຂອງບໍລິສັດໃຫ່ຍໃນການຜະລິດວັກຊີນໂຄວິດ-19 ໄຟເຊີ, ໂມເດິນນາ ແລະ ຈອນສັນ ແອນ ຈອນສັນ ຂອງສະຫະລັດ ໃນສອງສາມອາທິດທີ່ຜ່ານມາ ເພື່ອປຶກສາຫາລືກ່ຽວກັບບັນຫາດັ່ງກ່າວ.
ທ່ານ Katherine Tai ກ່າວວ່າ ສະຫະລັດຈະເຂົ້າຮ່ວມການເຈລະຈາ ໃນນັ້ນມີທັງອົງການການຄ້າໂລກ (WTO) ເພື່ອຕອບສະໜອງສິດໃນການຜະລິດວັກຊີນ ພ້ອມທັງກ່າວເຕືອນວ່າ ການເຈລະຈາຈະຕ້ອງໄດ້ໃຊ້ເວລາດົນສົມຄວນ ເພາະກົນໄກທີ່ຈະໃຫ້ການສະໜັບສະໜູນຂອງອົງການການຄ້າໂລກນັ້ນ ມີຄວາມສັບສົນຫຼາຍ.
ຜູ້ອຳນວຍການໃຫ່ຍຂອງອົງການອະນາໄມໂລກ ທ່ານ Tedros Adhanom Ghebreyesus ໄດ້ສະໜັບສະໜູນການຕັດສິນໃຈດັ່ງກ່າວຂອງສະຫະລັດອາເມລິກາ ແລະ ທັງຕີລາຄາສູງວ່າ ນີ້ມັນເປັນບາດກ້າວທີ່ຍິ່ງໃຫຍ່ ໃນການແບ່ງປັນວັກຊີນໃຫ້ມີຄວາມສະເໝີພາບເທົ່າທຽມກັນ.
ໃນຂະນະດຽວກັນ, ບັນດາອົງການຈັດຕັ້ງເຄື່ອນໄຫວດ້ານຕ່າງໆ ໃນແຖບປະກາດສະແດງຄວາມຜິດຫວັງຕໍ່ການຕັດສິນໃຈຄັ້ງນີ້ຂອງສະຫະລັດ. ໃນນັ້ນ ສະຫະພັນການຜະລິດ ແລະ ສະມາຄົມການຢາສາກົນ (IFPMA) ກ່າວວ່າ: ການທັບມ້າງສິ່ງກີດຂວາງຂອງການຮັກສາລີຂະສິດຊັບສິນທາງປັນຍາຕໍ່ກັບວັກຊີນໂຄວິດ-19 ນັ້ນ ຈະບໍ່ເພີ່ມຄວາມສາມາດການຜະລິດ ຫຼື ຕອບສະໜອງໃນວິທີການຕົວຈິງຕໍ່ກັບການຕ້ານການລະບາດຂອງພະຍາດໄດ້ແຕ່ຢ່າງໃດ, ແທນທີ່ບັນດາລັດຖະບານຕ່າງໆ ຈະສຸມໃສ່ແກ້ໄຂທາງດ້ານການຄ້າ, ແກ້ຂອດອຸດຕັນໃນການຕອບສະໜອງ ແລະ ແກ້ໄຂບັນຫາການຂາດແຄນວັດຖຸດິບເພື່ອຜະລິດວັກຊີນ.
ສະມາຄົມນັກວິທະຍາສາດ ເພື່ອການຜະລິດຢາຂອງສະຫະລັດ ຊຶ່ງເປັນອົງກອນເຄື່ອນໄຫທີ່ໃຫຍ່ທີ່ສຸດຂອງສະຫະລັດ ໄດ້ຕຳນິຕິຕຽນລັດຖະບານຂອງ ໂຈໄບເດັນວ່າ ນະໂຍບາຍຂອງ ປະທານາທິບໍດີ ໂຈໄບເດັນນັ້ນ ສະແດງໃຫ້ເຫັນວ່າ ຈະເຮັດໃຫ້ການຕ້ານພະຍາດລະບາດໄດ້ຮັບຜົນກະທົບຢ່າງຮ້າຍແຮງ. ການຕັດສິນໃຈດັ່ງກ່າວຈະສ້າງຄວາມສັບສົນລະຫວ່າງພາກລັດ ແລະ ເອກະຊົນ, ເຮັດໃຫ້ການຕອບສະໜອງອ່ອນເພຍລົງ ແລະ ຈະສ້າງເງື່ອນໄຂໃຫ້ວັກຊີນປອມລະບາດຂຶ້ນ.
