ໄຂ້ເລືອດອອກ ກັບອາການເລີ່ມຕົ້ນທີ່ຕ້ອງສັງເກດ
ຍ້ອນສະພາບອາກາດທີ່ອ່າວຮ້ອນຊຸ່ມຂອງປະເທດລາວເຮົາ ຈຶ່ງເອື້ອອຳນວຍຕໍ່ການຈະເລີນເຕີບໃຫຍ່ຂອງເຊື້ອໄວຣັສແດງກີ ບວກກັບມີຝົນຕົກ ເຮັດໃຫ້ໜອນນ້ຳຍຸງລາຍມີປະລິມານຫລາຍ ແລະ ເຕີບໃຫຍ່ໄດ້ດີ ໂດຍສະເພາະໃນຕົວເມືອງ ເມື່ອມີຝົນຕົກຫລາຍ ຄົນຢູ່ຮວມກັນໜາແໜ້ນ ໂອກາດທີ່ຈະແຜ່ລະບາດກໍເພີ່ມຂຶ້ນ. ໄວຣັສແດງກີ ເປັນສາເຫດຂອງໄຂ້ເລືອດອອກ ມີ 4 ສາຍພັນ ຄື : ແດງກີ 1, 2, 3 ແລະ 4 ເຊິ່ງປະເທດລາວເຮົາມີການລະບາດ 4 ສາຍພັນວົນວຽນກັນໄປຂຶ້ນກັບແຕ່ລະຂອບເຂດພື້ນທີ່. ໄວຣັສແດງດີມີຍຸງລາຍເຮືອນເປັນພາຫະນະນຳເຊື້ອພະຍາດ ໂດຍສະເພາະຍຸງລາຍໂຕແມ່ ເຊິ່ງກັດຕອນກາງເວັນ ແລະ ດູດເລືອດຄົນເປັນອາຫານເຂົ້າສູ່ກະເພາະ ສະສົມໃນແຊນຜິວໜັງກະເພາະຈົນເພີ່ມຈຳນວນຫລາຍຂຶ້ນ ເຂົ້າສູ່ຕ່ອມນ້ຳລາຍ ແລະ ເຂົ້າໃນຮ່າງກາຍຄົນທີ່ຖືກກັດເປັນລາຍຕໍ່ໄປ. ເຊື້ອໄວຣັສແດງກີມີໄລຍະຟັກໂຕໃນຍຸງປະມານ 8 – 12 ມື້ ເມື່ອຍຸງຕົວນີ້ໄປກັດຄົນອື່ນອີກກໍຈະປ່ອຍເຊື້ອໄວຣັສໄປຍັງຜູ້ທີ່ຖືກກັດ ເມື່ອເຊື້ອເຂົ້າສູ່ຮ່າງກາຍຄົນ ແລະ ຜ່ານໄລຍະຟັກໂຕດົນ 5 – 8 ມື້ ຫລື ສັ້ນທີ່ສຸດແມ່ນ 3 ມື້, ຍາວທີ່ສຸດແມ່ນ 15 ມື້ ກໍຈະເຮັດໃຫ້ເກີດອາການຂອງພະຍາດໄຂ້ເລືອດອອກໄດ້.
ອາການຂອງພະຍາດໄຂ້ເລືອດອອກ : ຈະແຕກຕ່າງກັນໄປ ຂຶ້ນກັບແຕ່ລະບຸກຄົນ ແຕ່ໂດຍສ່ວຍຫລາຍກໍຄື :
- ມີໄຂ້ສຸງກະທັນຫັນ ເກີນ 5 ອົງສາ ຫລື ອາດສູງເຖິງ 40 – 41 ອົງສາ ເຊິ່ງບາງຄົນອາດມີອາການຊັອກເກີດຂຶ້ນ ໂດຍສະເພາະໃນເດັກນ້ອຍທີ່ເຄີຍມີປະຫວັດການຊັອກມາກ່ອນ.
- ມີເລືອດອອກຢູ່ຜິວໜັງເປັນຈຸດເລືອດນ້ອຍໆກະຈາຍຢູ່ຕາມແຂນ, ຂາ, ເລົາຄີງ, ກ້ອງຂີ້ແຮ້, ອາດມີເລືອດດັງອອກ ຫລື ເລືອດອອກຕາມເຟັນແຂ້ວ.
- ໃນຄົນທີ່ເປັນຮຸນແຮງມີອາດມີອາການຮາກ ແລະ ຖ່າຍເປັນເລືອດ ເຊິ່ງມັກຈະເປັນສີດຳ, ອາການເລືອດອອກໃນທາງເດີນອາຫານ ສ່ວນຫລາຍຈະເປັນຮ່ວມກັບອາການຊັອກ.
- ສິ່ງທີ່ຕ້ອງລະວັງຫລາຍທີ່ສຸດກໍຄື ອາການຊັອກ ທີ່ເຮັດໃຫ້ລະບົບການໄຫລວຽນເລືອດລົ້ມເຫລວ.
- ບາງຄົນມີອາການຕັບໃຫຍ່, ກົດເຈັບ ສ່ວນຫລາຍຈະຄຳພົບຕັບໃຫຍ່ໄດ້ປະມານມື້ທີ 3 – 4 ນັບຕັ້ງແຕ່ເລີ່ມປ່ວຍ, ຕັບຈະນຸ້ມ ແລະ ກົດເຈັບ.
- ມີສະພາບການໄຫລວຽນເລືອດລົ້ມເຫລວ ປະມານ 1 ໃນ 3 ຂອງຜູ້ປ່ວຍໄຂ້ເລືອດອອກ ຈະມີອາການຮຸນແຮງ ໂດຍເກີດຈາກສະພາບການໄຫລວຽນເລືອດລົ້ມເຫລວ ຫລື ອາການຊັອກ ເນື່ອງຈາກມີການຮົ່ວຂອງພາສມ່າອອກໄປຍັງຊ່ອງປອດ, ຊ່ອງທ້ອງ ເກີດອາການຊັອກ ສ່ວນຫລາຍຈະເກີດພ້ອມໆກັບມີໄຂ້ຫລຸດລົງຢ່າງວ່ອງໄວ, ເວລາທີ່ເກີດອາການຊັອກຈຶ່ງຂຶ້ນຢູ່ກັບໄລຍະເວລາທີ່ມີໄຂ້ ອາດເກີດໄດ້ຕັ້ງແຕ່ມື້ທີ 3 ຂອງພະຍາດ ຫລື ມື້ທີ 8 ຂອງພະຍາດ ຜູ້ປ່ວຍຈະມີອາການຮຸນແຮງຂຶ້ນ, ເລີ່ມມີອາການສັບສົນກະວົນກະວາຍ, ມື-ຕີນເຢັນ, ກຳມະຈອນຄ່ອຍ, ໄວ ແລະ ຄວາມດັນເລືອດປ່ຽນແປງ.
- ອາການປ່ວຍໄຂ້ເລືອດອອກເທື່ອທຳອິດຈະບໍ່ຄ່ອຍຮຸນແຮງຫລາຍ, ແຕ່ຫາກເປັນເທື່ອທີ 2 ຈະເກີດຄວາມຮຸນແຮງຫລາຍຂຶ້ນ ເຮັດໃຫ້ເລືອດອອກ ແລະ ຊັອກໄດ້. ສ່ວນການບົ່ງມະຕິພະຍາດໃນໄລຍະທຳອິດຈະແຍກຈາກອາການໄຂ້ທົ່ວໄປອ່າວຍາກ ຕ້ອງກວດຈາກການເຈາະເລືອດ ເຊິ່ງຫາກປ່ວຍພຽງ 1 – 2 ມື້ ການເຈາະເລືອດອາດຈະບໍ່ພົບເຊື້ອ ຕ້ອງໃຊ້ເວລາ 3 – 4 ມື້ ຂຶ້ນຢູ່ກັບປັດໄຈສ່ວນບຸກຄົນນຳ
